1 ሀ ማፃፋን ፃፈትዳ ቃላ ኡባይ ዮርዳኖሰ ሻፋፐ ሄፍንን ደእያ መላ ቢታን ኤንቲ ደእሽን፥ ሙሰይ እስራኤለ አሳስ ኦድዳ ቃላ። ሄ ዎደ ኤንቲ ሱፋፐ ስን ባጋራ ፓራና ካታማስ እስ ባጋራ፥ ቃስ ቶፌላ፥ ላባና፥ ሀፀሮታነ ድዛባ ካታማታ ግዶን ደእያ ዮርዳኖሰ ዛንጋራን ደኦሶና። 2 ሳይረ ደርያ ባጋራ ኮሬባ ዙማፐ ብድ ቃደስ-ባርነ ጋካናዉ ቶሆን ታማነ እስ ጋላሳ ኦገ።

3 ግብፀፈ ኤንቲ ከይዳ ኦይታማን ላይን፥ ታማነ እስን አጌናን፥ ኮይሮ ጋላሳን፥ ጎዳይ ኤንታባ ሙሰ ኪትዳባ ኡባ እስራኤለ አሳስ ኦድስ። 4 ሄስ ሀንዳይ ሀሰቦና ካታማን ካዎትድ አሞረታ ሃርያ ስሆናነ አስታሮታንነ ኤድራአን ካዎትድ ባሳነ ሃርያ ኦገ፥ ሙሰይ ፆንዳፐ ጉየና።

5 አሳይ ዮርዳኖሰፐ ዶሎሀ ባጋራ፥ ሞአበን ደእሽን፥ ሙሰይ ሀ ህግያ ሀይሳዳ ያግድ ኤንታዉ ቆንጭሰ ዶምስ።

6 ኑኒ ኮሬባ ዙማ ቦላ ደእሽን፥ ጎዳይ፥ ኑ ፆሳይ ኑኮ ሀይሳዳ ያግስ። "ህንተ ሀ ደርያ ቦላ ዳሮ ጋምእደታ። 7 ዱንካንያ ላልተ፤ ደንድድ ደረይ ዳርያ አሞረታ ቢታነ አራባን ደእያ ኤንታ ዩሹዋን ደእያ ቢታ ኡባ ቢተ። ሄስካ ዮርዳኖሰ ዛንጋራ፥ ገዘነ ጋ ቢታ፥ ነገባነ መደትራነ አባ ጋፃ አተ። ካናነ ቢታ ቢተ፤ ልባኖሰ ደረታ ካንድ፥ ኤፍራፂሳ ሻፋ ጋካናዉ ቢተ። 8 ሄኮ፥ ታኒ ህንተዉ ሀ ቢታ እማስ። ብድ ህንተ አዋታስ፥ አብራሃመስ፥ ይሳቃስ፥ ያይቆባስነ ኤንታ ሼሻስ እማናዉ ጎዳይ ጫቅዳ ቢታ ላትተ" ያግስ።

9 ሙሰይ አሳኮ፥ "ሄ ዎደ ታኒ ህንተዉ ሀይሳዳ ያጋዳ ኦዳስ፤ ታኒ ታርካ ህንተና ቶካናዉ ዳንዳእከ። 10 ጎዳይ፥ ህንተ ፆሳይ ህንተ ታይቡዋ ሳሎ ፆልንቶዳ ዳርስስ። 11 ጎዳይ ህንተ አዋታ ፆሳይ፥ ህንተና ሀይሳፈ አድ ሙኩሉ ቶሆ ጉጅድ ዳርሶነ እ ግዳይሳዳ ህንተና አንጆ። 12 ሽን ህንተ መቱዋ፥ ህንተ ቶሁዋነ ህንተ ኦሻ ኡባ ታኒ ታርካ ዋታ ቶካናዉ ዳንዳአይና? 13 ህንተ ኮቻታፐ ጭንጫ፥ አኬካንቾነ ቦንቸትዳ አሳታ ዶርተ፤ ታኒ ህንተ ቦላ ኤንታ ሀላቃ ኦና" ያግስ።

14 ህንተ ዛሪድ፥ "ነ ቆፋይ ሎኦ" ያግደታ። 15 ሄሳ ግሾ፥ ታኒ ህንተ ኮቻፈ ጭንጫነ ቦንቸትዳ አሳታ ኤካዳ፥ ሻላቃ፥ ማቶ ሀላቃ፥ ሀምሳላቃነ አስራላቃ፥ ህንተና አይሰይሳታ ኦዳ ህንተ ቦላ ሹማስ።

16 ታኒ ኤንታ፥ "ህንተ እሻታ ግዶን ደእያ ኦዳ ስእተ፤ ሄ ኦዳይ እስ እስራኤለ አሳፐነ እያ እሻፐ ግዶን ዎይኮ እስራኤለ አሳፐነ ሀራ ደረ አሳፐ ግዶን ደእያባ ግድኮካ፥ ኦዳ ስእድ ሱረ ፕርድተ። 17 ፕርድ ፆሳባ ግድያ ግሾ፥ ህንተ ፕርዳን እስ ባጋ ማዶፍተ፤ ግታ ስኤይሳዳ ጉ ስእተ፤ አሳ ሶምኦስ ያዮፍተ። ዳሮ ዴፆ ግድዳ ኦዳታ ታኮ ኤህተ፤ ሄሳ ታኒ ስአና።" 18 ህንተ ኦናባ ኡባ ታ ሄ ዎደ ህንተና ኪታና።

19 ሄሳፈ ጉየ፥ "ኑኒ ኮሬባ ዙማፐ ደንድዳ፤ ጎዳይ ኑ ፆሳይ ኑና ኪትዳይሳዳ፥ ደረይ ዳርያ አሞረታ ቢታ ብያ ኦገን ደእያ ሄ ህንተ በእዳ ግታነ ያሽያ መላ ቢታ ካንድ ቃደስ-ባርነ ጋክዳ። 20 ጎዳይ ኑ ፆሳይ ኑና ላትስያ፥ ደረይ ዳርያ አሞረታ ቢታይ ሀይሳ። 21 ጎዳይ ህንተ ፆሳይ ሀ ቢታ ህንተዉ እሚስ። ጎዳይ ህንተ አዋታ ፆሳይ ህንተዉ ኦድዳይሳዳ ከይድ፥ ሀ ቢታ ላትተ፤ ያዮፍተ፤ ኡፋይስ ቃንፆፍተ" ያጋስ።

22 ህንተ ኡባይ ታኮ ይድ፥ "ሄ ቢታ ፆሞስድ፥ ኑ ባናዉ በሲያ ኦግያባነ ገላና ካታማታ ሀኖታ ነዉ ኤህያ አሳታ ኑፐ ስን የዶስ" ያግደታ።

23 ሄ ቆፋይ ታዉ ሎኦ ዳንን፥ ህንተፈ ታማነ ናምኡ አሳ፥ ኮቻፈ ኮቻፈ እስ አስ ዶራስ። 24 ኤንቲ ብድ፥ ሄ ደረይ ዳርያ ቢታ ካንድ፥ ኤሽኮላ ዛንጋራ ጋካናዉ ደእያ ቢታ ዎችዶሶና። 25 ሄ ቢታን ዶልያባፐ ጉ አይፈ ባንታ ኩሸን ኦይክድ ኑኮ ይዶሶና። ቃስ፥ "ጎዳይ ኑ ፆሳይ ኑስ እምያ ቢታይ ሎኦ ቢታ" ግያ ዎረ ኤክድ ይዶሶና።

26 ሽን ህንተ ጎዳ ህንተ ፆሳ ኪታ እፃስ ግድ ያ ቦና እፅደታ። 27 ህንተ ዱንካንያ ግዶን እሶይ እሱዋራ ሀይሳዳ ያግድ ዙዙምደታ። "ጎዳይ ኑና እፅዳ ግሾ፥ ይሳናዉ አሞረ ቢታ አሳታ ኩሸን አድ እማናዉ ግብፀ ቢታፈ ከስስ። 28 ያትን ያ አይስ ባኔ? ኑ እሻት፥ ‘ሄ ቢታን ደእያ አሳት ኑፐ ዳሮሶናነ አዱቆሶና። ካታማትካ ግታነ ሳሎ ጋካናዉ ግምበትዳይሳታ። ሄሳ ቦላ ቃስ አናቀ ጌተትያ ዳሮ አዱሳ አሳታ ያን በእዳ’ ያግድ፥ ኑ ዎዛና ትልእስዶሶና" ያግደታ።

29 ያትን ታኒ፥ "ያዮፍተ ዎይኮ ዳጋሞፍተ። 30 ህንተ ስንራ ብያ ጎዳይ ህንተ ፆሳይ ካሰ ግብፀን ህንተ አይፍያ ስንን ህንተዉ ኦዳይሳዳ ሀእካ ህንተዉ እ ኦለታና። 31 ቃስ ህንተ ሀ መላ ቢታ ጋካናዉ ይዳ ኦገ ኡባን አስ ባ ናአ ቶከይሳዳ ጎዳይ ህንተ ፆሳይ ህንተና ቶክዳይሳ በእደታ" ያጋስ።

32,33 ሀ ኡባይ ሀንንካ፥ ህንተ ዱንካናና በሳነ ህንተ ባና ኦግያ በሳናዉ ቃማ ታማ ቱሳን፥ ጋላስ ሻራ ቱሳን ህንተና ካለዳ ጎዳ ህንተ ፆሳ አማንበከታ።

34 "ጎዳይ ህንተ ሃሳያ ስእድ ሀንቀትስ፤ ሀይሳዳ ያግድ ጫቅስ፤ 35 ታኒ ህንተ ማይዛታስ እማና ጋዳ ጫቅዳ ሀ ሎኦ ቢታ፥ ሀ ኢታ የለተፈ እሶይካ በኤና። 36 ሀ ቢታ በአናይ ዮፎና ናኣ ካለባ ፃላላ። እ የዳ ቢታ እያስነ እያ ኮቻስ እማና፤ እ ባ ኩመ ዎዛናፐ ጎዳ ካልስ" ያግድ ጫቅስ።

37 ህንተ ጋሶን ጎዳይ ታ ቦላካ ሀንቀትድ፥ ሀይሳዳ ያግስ፤ "ሀር አቶሽን፥ ነካ ሄ ቢታ ገላካ። 38 ሽን ነና ማድያ ናወ ናአይ፥ እያሱይ ሄ ቢታ ገላና። እ እስራኤለ አሳ ሄ ቢታ ላትሳናዉ ደእያ ግሾ ኔኒ እያ ምን። 39 ህንተ፥ ኑ ናይት ድኤታና ግዳ ጉት፥ ኢታነ ኬሀ ሻክድ ኤሮና ህንተ ናይት ሄ ቢታ ገላና። ታኒ ሄ ቢታ ኤንታዉ እማና፤ ኤንትካ ላታና። 40 ሽን ህንተ ጉየ ስሚድ፥ ዞኦ አባ ኤፍያ ኦግያ ኦይክድ፥ መላ ቢታ ቢተ" ያግስ።

41 ህንተ ዛሪድ፥ "ኑኒ ጎዳ ቦላ ናጋራ ኦዳ፤ ሀእ ኑኒ ጎዳይ ኑ ፆሳይ ኪተይሳዳ፥ ከይድ ኦለታና" ያግደታ። ህንተ ኡባይ ኦላ ሚሸ ዳንጭድ፥ ደረይ ዳርያ ቢታ ከይድ ኦለታናይሳ ላፋባ ኦድ ቆፕደታ።

42 ሽን ጎዳይ ታኮ፥ "ታኒ ኤንታራ ዶና ግሾ፥ ኤንቲ ከይድ ኦለቶና መላ ኦዳ። አካይ፥ ጊኮ፥ ኤንታ ሞርከት ኤንታ ፆናና" ያግስ። 43 ያግን፥ ታኒ ህንተዉ ኦዳስ፥ ሽን ህንተ ጎዳ ኪታ እፅደታፐ አትሽን፥ ታ ኦደይሳ ስእቤከታ፤ ያትድ ኦቶሮን ደረይ ዳርያ ቢታ ከይደታ። 44 ሄ ደረይ ዳርያ ቢታን ደእያ አሞረት ህንተራ ኦላ ጋሄትድ፥ ህንተና ማ ጎደይሳዳ ጎድድ፥ ሳይረ ቢታፈ ብድ ሆርማ ጋካናዉ ሾጭዶሶና። 45 ህንተ ጉየ ስሚድ፥ ጎዳኮ ዬክደታ፤ ሽን ጎዳይ ህንተ ዬሁዋ ስእቤና ዎይኮ ሀይዝቤና። 46 ሄሳ ግሾ፥ ህንተ ቃደሳን አዱሳ ዎደ ጋምእደታ።