Deuteronômio 3

ኦገ ፆነተ

1 ሄሳፈ ጉየ፥ ኑኒ ስሚድ ባሳነ ኤፍያ ኦግያራ ከይዳ። ባሳነ ካዎይ ኦገይ፥ ባ ኦላንቾታ ኡባራ ኤድራአ ጌተትያ በሳን ኑራ ኦለታናዉ ከይስ። 2 ሽን ጎዳይ ታኮ፥ "እያዉ ያዮፋ፤ ታኒ እያ፥ እያ ኦላንቾታነ እያ ቢታ ኡባ ነ ኩሸን አዳ እማስ። ሀሰቦናን ኡትድ ካዎትዳ አሞረታ ካዋ ስሆና ቦላ ኦዳይሳዳ ኔኒ እያ ቦላ ኦና" ያግስ።

3 ሄሳ ግሾ፥ ጎዳይ ኑ ፆሳይ ባሳነ ካዋ ኦገነ እያ አሳ ኡባ ኑ ኩሸን አድ እሚስ፤ ኑኒ ኤንታፈ እሱዋካ አሾና ዉርስድ ዎዳ። 4 ሄ ዎደ ኑኒ እያ ካታማታ ኡባ ኦይክዳ፤ ኑኒ ኦይክቦና እስ ካታምካ ዴና፤ ሄስካ፥ ባሳነ ካዋ ኦገይ አርጎባ ቢታን አይስያ ኡሱፑን ታሙ ካታማታ ኡባ ኦይክዳ። 5 ሀ ካታማት ኡባይ አዱሳ ግምበን ድረትዳይሳታነ ፐንገት ኮበትዳይሳታ። ግምበ ድርስ ባይና ዳሮ ጉታትካ ደኦሶና። 6 ሀሰቦና ካዋ ስሆና ቦላ ኦዳይሳዳ ኑኒ ኤንታ ኩመ ይስዳ። ኤንታ ካታማታን ደእያ አደ፥ ማጫነ ናአ አሾና ይስዳ። 7 ሽን መሄ ኡባነ ካታማታፐ ድእዳባ ኑስ ኤክዳ።

8 ሄ ዎደ ኑኒ አርኖና ዛንጋራፐ ብድ አርሞና ዙማ ጋካናዉ ደእያ ቢታ፥ ዮርዳኖሰ ሻፋፐ ዶሎሀ ባጋራ ደእያ ናምኡ አሞረ ቢታታ ካዎታፐ ኤክዳ። 9 (ስዶና ቢታ አሳይ አርሞና ዙማ፥ ስርዮና ግድ ፄግያ ዎደ፥ አሞረ ቢታ አሳይ ሳንራ ግድ ፄጎሶና።) 10 ኑኒ ደምባ ቢታን ደእያ ካታማታ ኡባ፥ ጋላዳ ቢታ ኡባ፥ ባሳነ ቢታ ኡባነ ባሳነ ቢታን ኦገይ ሃርያ ሳላካነ ኤድራአ ካታማታ ጋካናዉ ደእያ በሳ ኦይክዳ። 11 (ራፋይመታፐ አትዳይ ባሳነ ካዋ ኦገ ፃላላ። እያ አርሳይ ብራታ አርስ፤ ሄ አርሳይ ሀች ጋካናዉ ራባ ጌተትያ አሞነታ ካታማን ደኤስ፤ እያ አዱሳተይ ሆስፑን ዋ፤ ጎምፓይ ኦይዱ ዋ።)

ዮርዳኖሰፐ ሄፍንን ኡትዳ ኮቻታ

12 ሄ ቢታ ኑኒ ላትዳፐ ጉየ፥ አርኖና ሻፋ ዶናን ደእያ አሮኤራ ካታማፐ ዶምድ ደእያ በሳነ ደረይ ዳርያ ጋላዳ ቢታፈ ባጋ ጉጃዳ እያ ካታማታራ ሮቤላስነ ጋደ ኮቻስ ታኒ እማስ። 13 ጋላዳፐ አትዳይሳነ ኦገይ ሃርያ ባሳነ ቢታ ኡባ ምናሰ ኮቻ ባጋስ እማስ፤ ሄስካ፥ አርጎባ ካዎተ። (ሄ ባሳነ ቢታይ ኡባይ ራፋይመታ ቢታ ጌተትድ ፄገቴስ። 14 ምናሰ ኮቻፈ ያእር ኩመ አርጎባ ቢታ ላትስ፤ ሄስካ ጌሹረታነ ማእካታ ቢታ ጋፃ ጋካናዉ ደእያ ባሳነ ቢታ። እ ሄ ካታማታ ባ ሱንን ፄገታና መላ ኦስ፤ ሄሳ ግሾ፥ ኤንቲ ሀች ጋካናዉ፥ ያእራ ካታማታ ጌተትድ ፄገቶሶና።)

15 ጋላዳ ቢታ ምናሰ ኮቸ ግድዳ ማክራስ እማስ። 16 ሮቤላነ ጋደ ኮቻስ ጋላዳፐ ብድ አርኖና ሻፋ ማታ ጋካናዉ ደእያ ቢታ እማስ። ዱገሀ ባጋራ አርኖና ሻፋፐ ባጋይ ኤንታ ዛዋ፤ ቃስ ፑደሀ ባጋራ አሞነታ ቢታስ ጋፃ ግድዳ ያቦቃ ሻፋይ ዛዋ። 17 ዉሎሀ ባጋራ፥ ኤንታ ዛዋይ አራባን ደእያ ዮርዳኖሰ ሻፋ ጋኬስ፤ ሄስካ ጋልላ አባፈ ዶምድ ፕስጋ ዙማ ፃጶን ደእያ ማፅነ አባ (ሃይቆ አባ) ጋካናሳ።

18 ሄ ዎደ ታኒ ህንተና ሀይሳዳ ያጋዳ ኪታስ። "ጎዳይ ህንተ ፆሳይ ሄ ቢታ ህንተ ላታና መላ ህንተዉ እሚስ። ህዛ ህንተዉ ደእያ ቶራንቾታ ኡባ ኦላ ሚሸ ዳንጭስድ፥ ህንተ እሻታ ግድዳ እስራኤለ አሳፐ ስን አተ። 19 ህንተዉ ዳሮ መሄይ ደኤይሳ ታኒ ኤራይስ፤ ሄሳ ግሾ፥ ህንተ ማቸት፥ ህንተ ናይትነ ህንተ መሄይ ታኒ ህንተዉ እምዳ ካታማታን ደእሾና። 20 ጎዳይ ህንተና ሸምፕስዳይሳዳ ህንተ እሻታ ሸምፕሳና ጋካናዉነ ዮርዳኖሰ ሻፋፐ ሄፍንን ጎዳይ፥ ህንተ ፆሳይ ኤንታዉ እምያ ቢታ ኤንቲ ኤካና ጋካናዉ ኤንታዉ ኦለትተ። ሄሳፈ ጉየ፥ ታኒ ህንተዉ እምዳ ቢታ ስመታ" ያግስ።

21 ታኒ ሄ ዎደ እያሱ ሀይሳዳ ያጋዳ ኪታስ። "ጎዳይ፥ ህንተ ፆሳይ ሀ ናምኡ ካዎታ ቦላ ኦዳባ ኡባ ኔኒ ነ አይፈን በአዳሳ፤ ህንተ ኦይካናዉ ብያ ካዎተታ ኡባ ቦላ ጎዳይ ሄሳዳ ኦና። 22 ህንተዉ ኦለተይ ጎዳ ህንተ ፆሳ ግድያ ግሾ፥ ኤንታዉ ያዮፍተ" ያጋስ።

ሙሰይ ካናነ ገልቤና

23 ሄ ዎደ ታኒ ሀይሳዳ ያጋዳ ጎዳ ምንዳ ዎሳስ። 24 "ኡባ ሃርያ ጎዳዉ፥ ነ ግታተነ ነ ምኖ ኩሽያ ታና፥ ነ አይልያ በሳናዉ ዶማዳሳ። ነ ኦያ ዎልቃማ ኦሶታ ኦናዉ ዳንዳኤይ ሳሎን ግድን ሳአን ሀራ ፆሲ ደኢ? 25 ጎዳዉ፥ ታኒ ባዳ ዮርዳኖሰ ሻፋፐ ሄፍንን ደእያ ደረይ ዳርያ ሎኦ ቢታነ ልባኖሰ ደርያ በአና መላ ታና የዳርክ" ያግስ።

26 ሽን ጎዳይ ህንተ ጋሶን ታና ሀንቀትድ ስኦናን እፅስ። ጎዳይ ታኮ፥ "ህዛ ነዉ ግዳና፤ ሀ ኦዳ ናምአን ደንዳ ሃሳዮፓ። 27 ሄሳ አጋዳ ደንዳ፤ ፕስጋ ዙማ ቦላ ከያ፤ ያን ኤቃዳ ሄ ቢታ ዉሎሀ ባጋ፥ ፑደሀ ባጋ፥ ዱገሀ ባጋነ ዶሎሀ ባጋ ነ አይፍያ ቁ ኦዳ ፄላ። ኔኒ ሀ ዮርዳኖሰ ሻፋ ፖሎ ፕናካ። 28 ሽን ኔኒ እያሱ ኪታ፤ እያ ዞራነ ምን። እ ሀ አሳ ካለድ ፕንናነ ሀ ኔኒ በእያ ቢታ ኤንታ ላትሳና" ያግስ።

29 ሄሳ ግሾ፥ ኑኒ ቤት-ፓኦራ ስንን ደእያ ዛንጋራን ጋምእዳ።