1 አማኖ ጉሳይ፥ ደማና ግድ ኡፋይሳን አማነትድ ናግያባነ ኑ በኦናባ በእያዳ ኦድ ኤክያባ። 2 በን አዋት አማኖን ፆሳፈ ማርካተ ኤክዶሶና።

3 አላመይ ፆሳ ቃላን መትዳይሳ ኑ አማኖን ኤሮስ። ቃስ በንትያባይ በንቶናባፐ መትስ።✝

4 አበል ቃየላፐ አያ ያርሾ ፆሳስ ያርሽዳይ አማኖና። ፆሳይ አበላ እሙዋ ኡፋይትድ ኤክዳ ዎደ እ ፅሎ ግድዳይሳ ማርካትስ። አበል ሀር አቶሽን፥ ሀይቅድካ ባ አማኑዋን ሀእ ጋካናዉ ኦዴስ።✝

5 ሄኖከይ ሀይቆና ሳሎ ብዳይ አማኖና። ፆሳይ እያ ኤክዳ ግሾ ኦንካ እያ በአናዉ ዳንዳእቤና። ሄኖከይ ሳሎ ኤከታናፐ ስን እ ፆሳ ኡፋይስዳ አስ ግደይስ ኦደትስ።✝ 6 አማኖይ ባይና ኦንካ ፆሳ ኡፋይሳናዉ ዳንዳኤና። ፆሳኮ ያ ኦንካ ፆሳይ ደኤይሳነ ባና ኮየይሳታስ ዎይቶ እመይሳ አማናናዉ ኮሼስ።

7 ኖሄይ ቡሮ በንቶናባስ ፆሲ እያዉ ኦድዳ ዎደ ፆሳስ ያይድ፥ ባናነ ባ ሶ አሳ አሻናዉ አማኖን ማርካበ ኬፅስ። ያትድ ባ አማኑዋን አላመ ፕርድድ፥ አማኖን በንትያ ፅሎተ ፆሳፈ ኤክስ።✝

8 አብራሃመይ ላታ ኦድ ኤካና ቢታ ባና መላ ፆሳይ እያ ፄግዳ ዎደ ሀር አቶሽን፥ እ አዉ ብያኮ ኤሮና እፅኮካ ኪተትዳይ አማኖና።✝ 9 አብራሃመይ ፆሳይ እያዉ እማና ግዳ ቢታን በተ አሳዳ ደእዳይ አማኖና። ፆሳይ ሄ እማና ግዳይሳ እያራ እስፈ ላታናው ደእያ ይሳቃራነ ያይቆባራ ዎላ ዱንካነን ደእስ።✝ 10 እ፥ ፆሳይ ቆፕድ ኬፅዳ ፃላ ባሶይ ደእያ ካታማ ናጌስ።

11 ሳራ ባ ሁጰን ጭምዳባ ግድኮካ ኡፋይስ እምዳ ፆሳይ አማነትዳይሳ ግደይሳ ኤርዳ ግሾ ቃንታናዉ ዎልቃ ደምዳይ አማኖና።✝ 12 ሄሳ ግሾ፥ ሀይቅዳ አስ ዳንያ እስ አድያፈ ሳሎ ፆልንቶ መላነ አባ ጋፃን ደእያ ታይቦይ ባይና ሻፈ መላ ዘረይ የለትዶሶና።✝

13 ሄ አሳ ኡባይ ባንታዉ ጌተትዳ ኡፋይሳ ቃላ ኤኮና አማኖን ሀይቅዶሶና። ሽን ሃሆራ ሄሳ በእድ፥ ደምዳዳ ኦድ፥ ኡፋይሳን ኤክዶሶና። ቃስ ኤንቲ ሳአን እማነ በተ አስ ግደይሳ ኤርዶሶና።✝ 14 ሄሳዳ ግያ አሳይ ባንታ ቢታ ናገይሳ ቆንጨን በሴስ። 15 ኤንቲ ሄ አግድ ከይዳ ቢታ ጉየ ቆፕዳባ ግድያኮ ጉየ ስማናዉ ዳንዳኦሶና። 16 ሽን ሀእ አድ ሎእያ ሳሎ ቢታ ላሞቶሶና። ሄሳ ግሾ፥ ፆሳይ ኤንታዉ ካታማ ጊግስዳ ግሾ፥ "ኤንታ ፆሳ" ጌተትድ ፄገታናዉ ዬላተና።

17 አብራሃመይ ፓጨትዳ ዎደ ይሳቃ ያርሽዳይ አማኖና። ሄ ኡፋይሳ ቃላ ኤክዳ አብራሃመይ ባ እስ ናኣ ያርሻናዉ ጊግስ።✝ 18 ፆሳይ አብራሃመኮ፥ "ነ ዘረይ ይሳቃ ባጋራ ፄገታና" ያግድ ኦድስ።✝ 19 ፆሳይ ሀይቆፐ ደንናዉ ዳንዳኤይሳ አብራሃመይ አማንዳ ግሾ፥ ይሳቃ ሀይቆፐ ፓፅ ደንድዳዳ ኦድ ዛር ኤክስ።

20 ይሳቅ ዎደፐ ሀናናባ ኤርድ ያይቆባነ ኤሳዌ አንጅዳይ አማኖና።✝

21 ያይቆብ ሀይቃና ሀንሸ፥ እስ እስ ዮሰፋ ናይታ አንጅዳይነ ጉፈ ቦላ ካትድ ጎይንዳይ አማኖና።✝

22 ዮሰፍ ሀይቃናዉ ማትዳ ዎደ እስራኤለ አሳይ ግብፀፈ ከያናይሳ ኦድዳይነ ባ መቀ ኦናባ ኤንታ ኪትዳይ አማኖና።✝

23 ሙሰይ የለትዳፐ ጉየ እያ አያነ እያ አዋይ ማላ ሎኦ ናአ ግድዳይሳ በእድ ሄ አጌና ቆትዳይ አማኖና፤ ኤንቲ ካዋ አዋጁዋ ባብቦኮና።✝

24 ሙሰይ ድጭዳፐ ጉየ ግብፀ ካዋ ናኤ ናአ ጌተታናይሳ እፅዳይ አማኖና።✝ 25 ሙሰይ ናጋራን ጉ ዎደስ ኡፋይታናፐ፥ ፆሳ አሳራ ዋየ ኤካናይሳ ዶርስ። 26 እ ዎደፐ ደማና ዎይቱዋ ትሽ ኦድ ፄልዳ ግሾ፥ ግብፀ ሻሉዋፐ አድ ክርስቶሳ ግሾ ቦረታናይስ ዳሮ አያ ዱረተ ግድዳይሳ ኤርስ።

27 ሙሰይ ካዋ ሀንቁዋ ያዮና፥ ግብፀፈ ከይዳይ አማኖና። በንቶና ፆሳ በእዳ አሳዳ ሀንድ ባ ቆፋን ገንጭስ። 28 ሀይቆ ኤህያ ኪታንቾይ እስራኤለ አሳ ባይራ ናይታ ዎና መላ ሙሰይ ፓስካነ ሱ ዉርፀ ዎጋ ኦዳይ አማኖና።✝

29 እስራኤለ አሳይ መላ ቢታራ ሄመትያዳ ሄመትድ፥ ዞኦ አባ ፕንዳይ አማኖና። ሽን ግብፀ አሳይ ገላናዉ ፓጭድ በእያ ዎደ ሃይ ኤንታ ምትስ።✝

30 እስራኤለ አሳይ እያርኮ ካታማ ሹቻ ድርሳ ላፑን ጋላስ ዩይድ፥ ኩንድስዳይ አማኖና።✝ 31 ላይምያ ራኣባ ቢታ ዎቸይሳታ ሞክዳ ግሾ፥ ኪተቶና አሳራ ሀይቆና አትዳይ አማኖና።✝

32 ህዛ፥ ሀራ ታ አይ ጎ? ገድዮናባ፥ ባራቃባ፥ ሳምሶናባ፥ ዮፍታሄባ፥ ዳዊታባ፥ ሳሜላባ፥ ቃስ ናበታባ ኦዳናዉ ታዉ ዎደይ ግደና።✝ 33 ኤንቲ አማኖን ካዎተታ ፆንዶሶና፤ ፅሎተን አይስዶሶና፤ ፆሳይ እማና ግዳ ኡፋይሳ ኤክዶሶና፤ ጋሞታ ዶና ጎርድዶሶና፤✝ 34 ታማ ዎልቃ ቶይስዶሶና፤ ሞርከታ ማሻፈ አትዶሶና፤ ባንታ ዳቡራን ምንዶሶና፤ ኦላን ዎልቃማ ግድዶሶና፤ አላጋ ቶራ ጎድዶሶና።✝ 35 ማጫሳት ባንታ ሀይቅዳይሳታ ሀይቆፐ ፓፅን ኤክዶሶና።

ቃስ ሀራት አያ ሀይቆፐ ደንዱዋ ኤካናዉ ኮይድ ቃሾፐ ብለታናይሳ እፅዶሶና።✝ 36 ሀራት አሳን ቦረትድ ልሶን ጋራፈትዶሶና፤ ሀራት ሳንላታን ቃሸትድ ቃሾ ኬን የገትዶሶና።✝ 37 ኤንቲ ሹቻን ጫደትዶሶና፤ ማጋዘን ናምአ ከይድ ጳልቀትዶሶና፤ ፓጨትዶሶና፤ ማሻን ሀይቅዶሶና፤ ኤንታዉ ኡባባይ ይን መቶትዶሶና። ዶርሳ እተነ ዴሻ እተ ማእድ ዩይዶሶና።✝ 38 ኤንታዉ ሀ አላመይ ጊጎና እፅን መላ ቢታን፥ ደረ ቦላ፥ ጎንጎሎንነ ኦላ ግዶን ዩይዶሶና።

39 ፆሳይ ኤንታ አማኑዋባ ማርካትኮካ፥ ሄ ኡባይ ጌተትዳ ኡፋይሳ ቃላ ኤክቦኮና። 40 ፆሳይ ኑስ ሎኦባ ቆፕ ዎዳ ግሾ ኤንቲ ኑኒ ባይና ፖሎ ግዶኮና።