1 አማኖ ጉሳይ፥ ደማና ግድ ኡፋይሳን አማነትድ ናግያባነ ኑ በኦናባ በእያዳ ኦድ ኤክያባ። 2 በን አዋት አማኖን ፆሳፈ ማርካተ ኤክዶሶና።

3 አላመይ ፆሳ ቃላን መትዳይሳ ኑ አማኖን ኤሮስ። ቃስ በንትያባይ በንቶናባፐ መትስ።✝11:3 መ 1:1፤ ማዝ 33:6፥ 9፤ ዮሀ 1:3.

4 አበል ቃየላፐ አያ ያርሾ ፆሳስ ያርሽዳይ አማኖና። ፆሳይ አበላ እሙዋ ኡፋይትድ ኤክዳ ዎደ እ ፅሎ ግድዳይሳ ማርካትስ። አበል ሀር አቶሽን፥ ሀይቅድካ ባ አማኑዋን ሀእ ጋካናዉ ኦዴስ።✝11:4 መ 4:3-10.

5 ሄኖከይ ሀይቆና ሳሎ ብዳይ አማኖና። ፆሳይ እያ ኤክዳ ግሾ ኦንካ እያ በአናዉ ዳንዳእቤና። ሄኖከይ ሳሎ ኤከታናፐ ስን እ ፆሳ ኡፋይስዳ አስ ግደይስ ኦደትስ።✝11:5 መ 5:21-24. 6 አማኖይ ባይና ኦንካ ፆሳ ኡፋይሳናዉ ዳንዳኤና። ፆሳኮ ያ ኦንካ ፆሳይ ደኤይሳነ ባና ኮየይሳታስ ዎይቶ እመይሳ አማናናዉ ኮሼስ።

7 ኖሄይ ቡሮ በንቶናባስ ፆሲ እያዉ ኦድዳ ዎደ ፆሳስ ያይድ፥ ባናነ ባ ሶ አሳ አሻናዉ አማኖን ማርካበ ኬፅስ። ያትድ ባ አማኑዋን አላመ ፕርድድ፥ አማኖን በንትያ ፅሎተ ፆሳፈ ኤክስ።✝11:7 መ 6:13-22.

8 አብራሃመይ ላታ ኦድ ኤካና ቢታ ባና መላ ፆሳይ እያ ፄግዳ ዎደ ሀር አቶሽን፥ እ አዉ ብያኮ ኤሮና እፅኮካ ኪተትዳይ አማኖና።✝11:8 መ 12:1-5. 9 አብራሃመይ ፆሳይ እያዉ እማና ግዳ ቢታን በተ አሳዳ ደእዳይ አማኖና። ፆሳይ ሄ እማና ግዳይሳ እያራ እስፈ ላታናው ደእያ ይሳቃራነ ያይቆባራ ዎላ ዱንካነን ደእስ።✝11:9 መ 35:27. 10 እ፥ ፆሳይ ቆፕድ ኬፅዳ ፃላ ባሶይ ደእያ ካታማ ናጌስ።

11 ሳራ ባ ሁጰን ጭምዳባ ግድኮካ ኡፋይስ እምዳ ፆሳይ አማነትዳይሳ ግደይሳ ኤርዳ ግሾ ቃንታናዉ ዎልቃ ደምዳይ አማኖና።✝11:11 መ 18:11-14፤ 21:2. 12 ሄሳ ግሾ፥ ሀይቅዳ አስ ዳንያ እስ አድያፈ ሳሎ ፆልንቶ መላነ አባ ጋፃን ደእያ ታይቦይ ባይና ሻፈ መላ ዘረይ የለትዶሶና።✝11:12 መ 15:5፤ 22:17፤ 32:12.

13 ሄ አሳ ኡባይ ባንታዉ ጌተትዳ ኡፋይሳ ቃላ ኤኮና አማኖን ሀይቅዶሶና። ሽን ሃሆራ ሄሳ በእድ፥ ደምዳዳ ኦድ፥ ኡፋይሳን ኤክዶሶና። ቃስ ኤንቲ ሳአን እማነ በተ አስ ግደይሳ ኤርዶሶና።✝11:13 መ 23:4፤ 1 ታር 29:15፤ ማዝ 39:12. 14 ሄሳዳ ግያ አሳይ ባንታ ቢታ ናገይሳ ቆንጨን በሴስ። 15 ኤንቲ ሄ አግድ ከይዳ ቢታ ጉየ ቆፕዳባ ግድያኮ ጉየ ስማናዉ ዳንዳኦሶና። 16 ሽን ሀእ አድ ሎእያ ሳሎ ቢታ ላሞቶሶና። ሄሳ ግሾ፥ ፆሳይ ኤንታዉ ካታማ ጊግስዳ ግሾ፥ "ኤንታ ፆሳ" ጌተትድ ፄገታናዉ ዬላተና።

17 አብራሃመይ ፓጨትዳ ዎደ ይሳቃ ያርሽዳይ አማኖና። ሄ ኡፋይሳ ቃላ ኤክዳ አብራሃመይ ባ እስ ናኣ ያርሻናዉ ጊግስ።✝11:17 መ 22:1-14. 18 ፆሳይ አብራሃመኮ፥ "ነ ዘረይ ይሳቃ ባጋራ ፄገታና" ያግድ ኦድስ።✝11:18 መ 21:12. 19 ፆሳይ ሀይቆፐ ደንናዉ ዳንዳኤይሳ አብራሃመይ አማንዳ ግሾ፥ ይሳቃ ሀይቆፐ ፓፅ ደንድዳዳ ኦድ ዛር ኤክስ።

20 ይሳቅ ዎደፐ ሀናናባ ኤርድ ያይቆባነ ኤሳዌ አንጅዳይ አማኖና።✝11:20 መ 27:27-29፥ 39-40.

21 ያይቆብ ሀይቃና ሀንሸ፥ እስ እስ ዮሰፋ ናይታ አንጅዳይነ ጉፈ ቦላ ካትድ ጎይንዳይ አማኖና።✝11:21 መ 47:3፤ 48:1-20.

22 ዮሰፍ ሀይቃናዉ ማትዳ ዎደ እስራኤለ አሳይ ግብፀፈ ከያናይሳ ኦድዳይነ ባ መቀ ኦናባ ኤንታ ኪትዳይ አማኖና።✝11:22 መ 50:24-25፤ ከሳ 13:19.

23 ሙሰይ የለትዳፐ ጉየ እያ አያነ እያ አዋይ ማላ ሎኦ ናአ ግድዳይሳ በእድ ሄ አጌና ቆትዳይ አማኖና፤ ኤንቲ ካዋ አዋጁዋ ባብቦኮና።✝11:23 ከሳ 1:22፤ 2:2.

24 ሙሰይ ድጭዳፐ ጉየ ግብፀ ካዋ ናኤ ናአ ጌተታናይሳ እፅዳይ አማኖና።✝11:24 ከሳ 2:10-12. 25 ሙሰይ ናጋራን ጉ ዎደስ ኡፋይታናፐ፥ ፆሳ አሳራ ዋየ ኤካናይሳ ዶርስ። 26 እ ዎደፐ ደማና ዎይቱዋ ትሽ ኦድ ፄልዳ ግሾ፥ ግብፀ ሻሉዋፐ አድ ክርስቶሳ ግሾ ቦረታናይስ ዳሮ አያ ዱረተ ግድዳይሳ ኤርስ።

27 ሙሰይ ካዋ ሀንቁዋ ያዮና፥ ግብፀፈ ከይዳይ አማኖና። በንቶና ፆሳ በእዳ አሳዳ ሀንድ ባ ቆፋን ገንጭስ። 28 ሀይቆ ኤህያ ኪታንቾይ እስራኤለ አሳ ባይራ ናይታ ዎና መላ ሙሰይ ፓስካነ ሱ ዉርፀ ዎጋ ኦዳይ አማኖና።✝11:28 ከሳ 12:21-30.

29 እስራኤለ አሳይ መላ ቢታራ ሄመትያዳ ሄመትድ፥ ዞኦ አባ ፕንዳይ አማኖና። ሽን ግብፀ አሳይ ገላናዉ ፓጭድ በእያ ዎደ ሃይ ኤንታ ምትስ።✝11:29 ከሳ 14:21-31.

30 እስራኤለ አሳይ እያርኮ ካታማ ሹቻ ድርሳ ላፑን ጋላስ ዩይድ፥ ኩንድስዳይ አማኖና።✝11:30 እያ 6:12-21. 31 ላይምያ ራኣባ ቢታ ዎቸይሳታ ሞክዳ ግሾ፥ ኪተቶና አሳራ ሀይቆና አትዳይ አማኖና።✝11:31 እያ 2:1-21፤ 6:22-25.

32 ህዛ፥ ሀራ ታ አይ ጎ? ገድዮናባ፥ ባራቃባ፥ ሳምሶናባ፥ ዮፍታሄባ፥ ዳዊታባ፥ ሳሜላባ፥ ቃስ ናበታባ ኦዳናዉ ታዉ ዎደይ ግደና።✝11:32 አይሰ 6:11—8:32፤ 4:6—5:31፤ 13:2-16፤ 11:1-12፤ 1 ሳሜ 16:1፤ 1 ካዎ 2:11፤ 1 ሳሜ 1:1-25. 33 ኤንቲ አማኖን ካዎተታ ፆንዶሶና፤ ፅሎተን አይስዶሶና፤ ፆሳይ እማና ግዳ ኡፋይሳ ኤክዶሶና፤ ጋሞታ ዶና ጎርድዶሶና፤✝11:33 ዳነ 6:1-27. 34 ታማ ዎልቃ ቶይስዶሶና፤ ሞርከታ ማሻፈ አትዶሶና፤ ባንታ ዳቡራን ምንዶሶና፤ ኦላን ዎልቃማ ግድዶሶና፤ አላጋ ቶራ ጎድዶሶና።✝11:34 ዳነ 3:1-30. 35 ማጫሳት ባንታ ሀይቅዳይሳታ ሀይቆፐ ፓፅን ኤክዶሶና።

ቃስ ሀራት አያ ሀይቆፐ ደንዱዋ ኤካናዉ ኮይድ ቃሾፐ ብለታናይሳ እፅዶሶና።✝11:35 1 ካዎ 17:17-24፤ 2 ካዎ 4:25-37. 36 ሀራት አሳን ቦረትድ ልሶን ጋራፈትዶሶና፤ ሀራት ሳንላታን ቃሸትድ ቃሾ ኬን የገትዶሶና።✝11:36 1 ካዎ 22:26-27፤ 2 ታር 18:25-26፤ ኤርም 20:2፤ 37:15፤ 38:6. 37 ኤንቲ ሹቻን ጫደትዶሶና፤ ማጋዘን ናምአ ከይድ ጳልቀትዶሶና፤ ፓጨትዶሶና፤ ማሻን ሀይቅዶሶና፤ ኤንታዉ ኡባባይ ይን መቶትዶሶና። ዶርሳ እተነ ዴሻ እተ ማእድ ዩይዶሶና።✝11:37 2 ታር 24:21. 38 ኤንታዉ ሀ አላመይ ጊጎና እፅን መላ ቢታን፥ ደረ ቦላ፥ ጎንጎሎንነ ኦላ ግዶን ዩይዶሶና።

39 ፆሳይ ኤንታ አማኑዋባ ማርካትኮካ፥ ሄ ኡባይ ጌተትዳ ኡፋይሳ ቃላ ኤክቦኮና። 40 ፆሳይ ኑስ ሎኦባ ቆፕ ዎዳ ግሾ ኤንቲ ኑኒ ባይና ፖሎ ግዶኮና።