Hebreus 12

ፆሳይ ኑስ አዋ

1 ህዛ፥ ሻራዳ ኑ ዩሹዋን ዳርዳ ሀይሳ መላ ማርካት ኑ ማታን ደእያ ግሾ ኑና ብያ ኡባነ ኦይክድ ሃርያ ናጋራ ድግድ፥ ኑ ስንን ደእያ ጋደ ዎ ገንጫን ዎፆስ። 2 ኑ አማኑዋስ ኦገ ዶይዳይሳነ ኑ ዉርሰ ፖሉዋኮ ኑና ጋያ የሱሳ ቦላ ኑ አይፍያ ዎስ። የሱሲ ዎደፐ ደእያ ኡፋይሳ ግሾ ማስቃልያ ዋይያ ዳንዳእድ፥ ዬላ ሀይቁዋ ካድ፥ ፆሳፈ ኡሻቻ ባጋን ኡትስ።

3 ህዛ፥ ህንተ ዶጭድ ኡፋይስ ቃንፆና መላ ናጋራንቾታ እፁዋ ዳንዳእዳ የሱሳ ቆፕተ። 4 ናጋራራ ደእያ ባፅያን ቡሮ ሱ ጉሳና ጋካናዉ ኤቀትበከታ። 5 ፆሳይ ባ ቃላን፥ ባ ናይታዳ ህንተና ዞርዳይሳ ዶግደታ።✝12:5 እዮ 5:17፤ ሌም 3:11-12.

"ታ ናአዉ፥ ፆሳ ሴራ ለቆፋ፤

እ ነና ሴርያ ዎደ ኡፋይስ ቃንፆፋ።

6 ጎዳይ ባ ዶስያ ኡራ ሴሬስ፤

ቃስ ባ ናአዳ ኤክያ ኡባ ጋራፈስ" ያጌስ።

7 ፆሳይ ህንተና ባ ናይታዳ ሴርያ ዎደ ገንጭተ፤ አዋይ ሴሮና ናእ ኦኔ? 8 ፆሳይ ባ ናይታ ኡባ ሴሬስ፤ ህንተ ሴረቶና እፅኮ ቱማ እያ ናይታ ግዶናሽን ባላኮ ናይታ። 9 ቃስ ኑና የልዳ ኑ አዋት ኑና ሴሮሶና፤ ኑካ ኤንታና ቦንቾስ። ያትን፥ ኑኒ ኑ አያና አዋስ ዋንድ አድ ሃረቶኮ? 10 ህዛ፥ ኑ አዋት ባንታዉ ሎኦ ዳንዳ መላ ጉ ዎደስ ኑና ሴርዶሶና። ሽን ፆሳይ ኑ ጎአስ፥ ኑ እያ ጌሻተን ሻከታና መላ ሴሬስ። 11 ኑኒ ሴረትያ ዎደ ይሎዬስፐ አትሽን፥ ኡፋይሰና። ሽን ጉየፐ ሴረተ ሜዘትዳ አሳስ ሴራይ፥ ሳሮይ ኩምዳ ፅሎተ አይፈ አይፍሴስ።

ዞረነ ናግሶ

12 ህዛ፥ ህንተ አርጋጭዳ ቀስያነ ህንተ ዳቡርዳ ጉልባታ ምንተ።✝12:12 እሳ 35:3. 13 ዎበይ ፓፃና መላፐ አትሽን፥ አድ መቆና መላ ህንተ ቶሁዋስ ሱረ ኦገ ጊግስተ።✝12:13 ሌም 4:26.

14 አሳ ኡባራ ሳሮ ዳናዉነ ጌሻተን ዳናዉ ምንተ፤ ጌሻተ ባይና ኦንካ ጎዳ በአናዉ ዳንዳኤና። 15 ህንተፈ ኦደስካ ፆሳ አ ኬሀተይ ፓጮናዳ፥ ቃስ ጫሞ አይፈ አይፍድ ዳሮ አሳ ቱንስያነ ይስያ ዘረዳ ግዶና መላ ናገትተ።✝12:15 ዛረ 29:18. 16 ህንተ ግዶን ላይማትያ አስ ዎይኮ እስ ቶሆ ምያ ካስ ባ ባይራተ ቶችድ ባይዝዳ ኤሳዌ መላ አስ ዶና መላ ናገትተ።✝12:16 መ 25:29-34. 17 ጉየፐ ኤሳዌይ ሄ አንጁዋ ኤካናዉ ኮይዳ ዎደ ድገትዳይሳ ኤሬታ። እ ሄ አንጁዋ አፉን ምንድ ኮይኮካ፥ ደማናዉ ዳንዳእቤና፤ እ ናጋራፐ ስማናዉ ቃዳ ደምቤና።✝12:17 መ 27:30-40.

18 ህንተ ኩሸን ቦሸትያ ሲና ደርያኮ፥ ኤፅያ ታማኮ፥ ማኮ፥ ጫጋናኮ፥ ጎትያኮ፥✝12:18 ከሳ 4:11-12፤ 19:16-22፤ 20:18-21. 19 ሞይዘ ፑኑኮ ዎይኮ ቃላይ ስኤትያ በሳኮ ይቤከታ። ሄ ቃላ ስእዳ አሳይ ሀራ ጉዣ ቃላ ስኦና መላ ዎስዶሶና። 20 አይስ ጊኮ፥ "ሀር አቶሽን፥ ዶእ ሄ ዙማ ቦችኮ፥ ሹቻን ጫደትድ ሀይቆ" ያግዳ ኪታ ኤንቲ ቶካናዉ ዳንዳእቦኮና።✝12:20 ከሳ 19:12-13. 21 ሄ ሀንያባይ ዳሮ ዳጋንያባ ግድዳ ግሾ ሙሰይካ፥ "ታኒ ያሻን ኮኮራስ" ያግስ።✝12:21 ዛረ 9:19.

22 ሽን ህንተ ፅዮነ ዙማኮ፥ ደኦ ፆሳይ ደእያ የሩሳላመ ካታማኮ፥ እስፈ ሺቅድ ኡፋይትያ ዳሮ ሙኩሉ ኪታንቾታኮ ሳሉዋ ይደታ። 23 ኤንታ ሱንይ ሳሎን ፃፈትዳ ዎሳ ኬ ባይራ ናይታኮ፥ አሳ ኡባ ዳይና ግድዳ ፆሳኮ፥ ፖሎ ግድዳ ፅሎ አሳ አያናታኮ ይደታ። 24 ኦራ ጫቁዋስ ግዶ ግድድ ስገያ የሱሳኮ፥ አበላ ሱፈ አያባ ኦድያ ዉርፀትዳ ሱኮ ይደታ።✝12:24 መ 4:10.

25 ህንተዉ ኦድያ ኡራ ቃላ እፃስ ጎና መላ ናገትተ። ካሰይሳት ሳአን ግድድ ኦድዳ ኪታ ስኦና እፅድ፥ ከስ ኤክቦናባ ግድኮ፥ ያትን፥ ሳሎን ግድድ ኦድያ ቃላ ኑኒ እፃስ ጊኮ ዋንድ ከስ ኤካኔ?✝12:25 ከሳ 20:22. 26 ሄ ዎደ እያ ቃላይ ሳአ ቃስ። ሽን ሀእ ታኒ፥ "ሳአ ፃላላ ግዶናሽን፥ እስ ቶሆ ዛራዳ ሳሉዋካ ቃና" ያግስ።✝12:26 ሀገ 2:6. 27 "እስ ቶሆ ዛራዳ" ግያ ቃላይ ቃፆናባይ ምንድ ዳናይሳ፥ ቃስ ቃፅያ መትዳባት ያናይሳ በሴስ።

28 ኑኒ ቃፃናዉ ዳንዳኦና ካዎተ ኤክያ ግሾ ፆሳ ጋላቶስ፤ ፆሳ ኡፋይስያ ኦገን ቦንቾንነ ያሻተን እያ ጎይኖስ። 29 ህዛ፥ ኑ ፆሳይ ቱማ ፁግያ ታማ።✝12:29 ዛረ 4:24.