1 አሳ ኡባይ ዮርዳኖሰ ፕንዳፐ ጉየ ጎዳይ እያሱኮ፥ 2 "እስ እስ እስራኤለ ኮቻፈ እስ እስ አስ ኤካዳ ታማነ ናምኡ አሳታ ዶራ። 3 ሄ አሳት ዮርዳኖሰ ሻፋ ግዶን ካህነት ኤቅዳ በሳፈ ታማነ ናምኡ ሹቻታ ኤካና መላነ ሄ ሹቻታ ሀች ህንተ ዱንካንድ አቅያ በሳን ዎና መላ ኦዳ" ያግስ።

4 እያሱይ እስራኤለ ዘረታፐ ዶረትዳ ታማነ ናምኡ አሳታ ፄግስ። 5 ኤንታኮ፥ "ጎዳ ህንተ ፆሳ ጫቆ ታቦተይ ደእያ በሳ ጉየ ዮርዳኖሰ ሻፋ ገልድ፥ እስ እስ እስራኤለ ዘረታ ታይቦን ኡባይ እስ እስ ሹች ህንተ ሀሸን ቶክተ። 6 ሀ ሹቻት፥ ጎዳይ ሀች ኦዳባ ህንተና ቆፍስያ ማላታ ግዳና። ዎንቶ ህንተ ናይት፥ ‘ሀ ሹቻት አይብሴ?’ ያግድ ኦይችያ ዎደ፥ 7 ህንተ ዛሪድ፥ ‘ጎዳ ጫቆ ታቦተይ ፕንያ ዎደ ዮርዳኖሰ ሃይ ጎገ አግስ። ሄሳ ግሾ፥ ሀ ሹቻት ሀ በሳን ሀንዳባ እስራኤለ አሳ ኡባ ዎደ ቆፍስያባ ግዳና’ " ያግስ።

8 ሄ አሳት እያሱይ ኪትዳይሳዳ ኦዶሶና። ጎዳይ እያሱስ ኦድዳይሳዳ፥ እስራኤለ ዘረታ ታይቦን ዮርዳኖሰ ሻፋፐ ታማነ ናምኡ ሹቻታ ኤፍድ፥ ኤንቲ አቅያ በሳን ዎዶሶና። 9 እያሱይ፥ ካህነት ዮርዳኖሰ ሻፋን ጫቆ ታቦትያ ቶክድ፥ ኤቅዳ በሳን ታማነ ናምኡ ሹቻታ ኤስስ። ሄ ሹቻት ሀች ጋካናዉ ያን ደኦሶና። 10 ሙሰይ እያሱ ኪትዳይሳ መላ፥ ጎዳይ እያሱ ኪትዳባ ኡባይ ፖለታና ጋካናዉ፥ ጫቆ ታቦትያ ቶክዳ ካህነት ዮርዳኖሰ ሻፋን ኤቅድ ጋምእዶሶና። አሳይ ኤለስድ ሻፋ ፕንዶሶና። 11 አሳ ኡባይ፥ ፕንዳፐ ጉየ፥ ጎዳ ጫቆ ታቦትያ ቶክዳ ካህነት አሳፐ ስን አድ ካለዶሶና። 12 ሙሰይ ኪትዳይሳዳ፥ ሮቤላነ ጋዳ ኮቻት፥ ቃስ ምናሰ ኮቻፈ ባጋይ ኦላስ ዳንጨትድ፥ አሳፐ ስንትድ ፕንዶሶና። 13 ዳሮተን ኦይታሙ ሙኩሉ ግድያ ኦላንቾት፥ ጎዳ ስንን፥ እያርኮ ማታን ደእያ ደንባን ኦለታናዉ ሺቅዶሶና። 14 ሄ ጋላስ፥ ጎዳይ እያሱ እስራኤለ አሳ ኡባ ስንን ቁ ቁ ኦስ። ኤንቲ ሙሰ ቦንችዳይሳዳ እያሱካ እያ ደኦ ላይ ኡባን ቦንችዶሶና።

15 ጎዳይ እያሱኮ፥ 16 "ጫቆ ታቦትያ ቶክዳ ካህነት ዮርዳኖሰ ሻፋፐ ከያና መላ ኦዳ" ያግስ። 17 እያሱይ ካህነት ዮርዳኖሰ ሻፋፐ ከያና መላ ኦድስ። 18 ጎዳ ጫቆ ታቦትያ ቶክዳ ካህነት ዮርዳኖሰ ሻፋፐ ከይዶሶና። ኤንታ ቶሆይ መላ ቢታ የዳ ዎደ ኤለስድ፥ ዮርዳኖሰ ሃይ ባ በሳ ስሚድ፥ ካሰ ጎገይሳዳ ጋፃ ጋክድ ጎገ ኦይክስ።

19 አሳይ ኮይሮ አጌናን ታማን ጋላሳን ዮርዳኖሰ ሻፋ ፕንድ፥ እያርኮስ ዶሎሀ ባጋን ደእያ ጋልጋላን ዱንካንዶሶና። 20 እያሱይ ዮርዳኖሰ ሻፋፐ ኤከትዳ ታማነ ናምኡ ሹቻታ ጋልጋላን ኤስድ፥ 21 እስራኤለ አሳኮ ሀይሳዳ ያግስ፤ "ዎንቶ ህንተ ናይት፥ ‘ሀ ሹቻት አይብሴ?’ ያግድ ህንተና ኦይችያ ዎደ፥ 22 ‘እስራኤለ አሳይ ዮርዳኖሰ ሻፋ መላ ቢታራ የድ ፕንዳይሳ ቆፍስያባ’ ያግድ ኦዴታ። 23 ኑኒ ፕናና ጋካናዉ፥ ጎዳይ፥ ኑ ፆሳይ ዞኦ አባ ካሰ ኑ ስንን መልስዳይሳዳ፥ ህንተካ ፕናና ጋካናስ፥ ጎዳይ፥ ህንተ ፆሳይ ዮርዳኖሰ ሻፋ ህንተ ስንን መልስዳይሳ ኦድተ። 24 ሄሳ ግሾ፥ ቢታን ደእያ አሳ ኡባይ፥ ጎዳ ዎልቃይ አይ መላ ግቴኮ ኤራና፤ ህንተካ ጎዳ፥ ህንተ ፆሳ፥ መርናዉ ቦንቻና" ያግስ።