1 እስራኤለ አሳይ ጎዳ ስንን ዛሪድ ኢታባ ኦዶሶና። ሄሳ ግሾ፥ ጎዳይ ኤንታ ምድያመ አሳስ አድ እምን ላፑን ላይ ኤንታ ሃርዶሶና። 2 ምድያመ አሳይ እስራኤለ አሳ ኡንኤን፥ ኤንታፈ አታናዉ ደረ ቦላ፥ ጎንጎሎንነ ሆምኦን ባንታ ካ ቆስዶሶና። 3 እስራኤለ አሳይ ካ ዘርያ ዎደ ኡባን፥ ምድያመ አሳይ አማለቃ አሳራነ ዶሎሀ ባጋ አሳራ ይድ ኤንታ ኦሎሶና። 4 ኤንቲ ሄ ቢታን ዱንካንድ፥ ጋዛ ጋካናዉ፥ ቢታ ቦላ ዶልዳባ ኡባ ይሶሶና። ዶርሰ፥ መሄነ ሀረ ላግድ ኤፍያ ግሾ፥ እስራኤለ አሳስ አይባካ አሾኮና። 5 ባንታ መህያነ ባንታ ዱንካንያ ኤክድ፥ ቦለይ ያዳ ዳርድ ዮሶና። ኤንታነ ኤንታ ግማለታ ታይባናዉ ዳንዳኤተና፤ ኤንቲ ይሸ ቢታ ይሶሶና። 6 እስራኤለ አሳይ ምድያመታ ጋሶን ዳሮ መቶትዶሶና፤ ማደ ደማናዉ ጎዳኮ ዋስዶሶና።

7 ምድያመታ ጋሶን እስራኤለ አሳይ ጎዳኮ ዋስዳ ዎደ፥ 8 ጎዳይ ኤንታዉ እስ ናበ ኪትን፥ ናበይ ኤንታኮ፥ "ጎዳይ እስራኤለ ፆሳይ ሀይሳዳ ያጌስ፤ ግብፀፈ፥ አይለተ ቢታፈ ታ ህንተና ከሳስ። 9 ታኒ ህንተና ግብፀ አሳ ኩሸፐነ ኡንኤያ አሳ ኡባ ኩሸፐ አሻስ። ህንተ ስንፈ ኡንኤያ አሳ ጎዳዳ ኤንታ ቢታ ህንተዉ እማስ። 10 ታኒ ህንተና፥ ‘ታኒ ጎዳ ህንተ ፆሳ፤ ህንተ ኤንታ ቢታ ላትዳ አሞረታ ፆሳታ ጎይኖፍተ’ ያጋስ። ሽን ህንተ ታ ቃላ ስኦና እፅደታ" ያግስ።

11 ሄሳፈ ጉየ፥ ጎዳ ኪታንቾይ ኦፍራ ጌተትያ በሳን ደእያ አበዜራ አድያ እዮኣሳ ዎላ ጋርሳን ኡትስ። ሄ ዎደ እዮኣሳ ናአይ ገድዮን ምድያመ አሳፐ ቆሰተድ ዎይነ ጉምእያ በሳን ግስተ ቡኬስ። 12 ያን ጎዳ ኪታንቾይ እያዉ ቆንጭድ፥ "ላ ነኖ፥ ምኖ ኦላንቻዉ፥ ጎዳይ ኔራ ደኤስ" ያግስ።

13 ገድዮን፥ "ታ ጎዳዉ፥ ጎዳይ ኑራ ደእያባ ግድኮ ሀ መቶ ኡባይ ኑና አይስ ጋክዴ? ኑ አዋት፥ ‘ጎዳይ ኑና ግብፀ ቢታፈ ከስስ’ ያግድ ኑስ ኦድዳ ማላልስያ እያ ኦሶት ኡባይ አዉን ደኢ? ሽን ሀእ ጎዳይ ኑና ኩመ አግስ፤ ምድያመ አሳስ አድ እሚስ" ያግስ።

14 ሄሳፈ ጉየ ጎዳይ እያኮ ስሚድ፥ "ነዉ ደእያ ሀ ዎልቃን ባዳ እስራኤለ አሳ ምድያመ ኩሸፐ አሻ። ነና ኪተይ ታና" ያግስ።

15 ገድዮን ዛሪድ፥ "አቤት ጎዳዉ፥ ታኒ እስራኤለ አሳ ዋታዳ አሾ? ታ ያራይ ምናሰ ኮቻ ኡባፈ አዳ ላፋ፤ ታኒ ታ አዋ ሶ አሳ ኡባፈ ጉ" ያግስ።

16 ጎዳይ፥ "ታኒ ኔራ ግዳና፤ እስ አስ ሾጭያ መላ ኔኒ ምድያመ አሳ ሾጫዳ ፆናና" ያግስ።

17 ገድዮን፥ "ኔኒ ታናን ኡፋይትያባ ግድኮ፥ ቱማ ታራ ኦደተይ ኔኒ ጎዳ ግድኮ፥ ነና ኤርስያ ማላ ታና በሳ። 18 ታኒ ጉየ ስማ ባዳ ታ ያርሹዋ ኤሀና ጋካናዉ ሀያና ሀይሳፈ ቦፓ" ያግስ።

ጎዳይ፥ "ኔኒ ስማና ጋካናዉ ታኒ ሀይሳን ናጋና" ያግስ።

19 ገድዮን ሶ ገልድ፥ ኡርገ ዴሽ ሹክድ ካስ፤ ታሙ ክሎ ግራመ ግድያ ለ ኤክድ ኡይ ኡክስ። አሹዋ ጋይታን ዎድ፥ ጫምባ ሻተን ትግድ፥ ዎላ ጋርሳን ኡትዳ ጎዳ ኪታንቹዋስ ሺሽስ። 20 ፆሳ ኪታንቾይ፥ "አሹዋነ ኡይ ሀ ሹቻ ቦላ ዎ፤ ጫምባ እያ ቦላ ትጋ" ያግስ። ገድዮን ኪተትዳይሳዳ ኦስ። 21 ጎዳ ኪታንቾይ ባ ኩሸን ኦይክዳ ፃምኣ ፄራን አሹዋነ ኡይ ቦችን ታም ሹቻ ግዶፈ ከይድ፥ አሹዋነ ኡይ ምስ። ሄሳፈ ጉየ፥ ጎዳ ኪታንቾይ እያ ስንፈ ጌምስ።

22 ገድዮን በእዳይ ጎዳ ኪታንቹዋ ግደይሳ አኬክዳ ዎደ፥ "ጎዳ ፆሳዉ ታና አየ! ታኒ ጎዳ ኪታንቹዋ ታ አይፈን በአስ" ያግስ።

23 ሽን ጎዳይ፥ "ሳሮይ ነዉ ግዶ፤ ያዮፋ! ነ ሀይቃካ" ያግስ። 24 ገድዮን ጎዳስ ያርሾ በሲ ያን ጊግስድ፥ "ጎዳይ ሳሮ ፆሲ" ያግድ ፄግስ። ሄ ያርሾ በሳይ አብኤዜራ ኮቻባ ግድዳ ኦፍራን ሀች ጋካናዉ ኤቅድ ደኤስ።

25 ሄ ቃማ ጎዳይ ገድዮናኮ፥ "ነ አዋ ኮርማታፐ ላፑን ላይ ግድዳ ሎኦ ኮርማ ኤካ። ነ አዋይ ባኣለ ኤቃስ ያርሽያ በሳ ላላ፤ እያ ማታን ደእያ አሼራ ኤቃ ምስልያ መንረ የጋ። 26 ሀ ዙማ ሁጰን ጎዳስ ነ ፆሳስ፥ ሹቻን ያርሾ በሲ ሎይዳ ጊግሳ። ሄሳፈ ጉየ፥ ኔኒ መንረዳ አሼራ ኤቃ ምስልያ ቀረ ኤዳ፥ ሄ ኮርማ ፁሳ ያርሾ ኦዳ ያርሻ" ያግስ። 27 ገድዮን ባ ኦሳንቾታፐ ታማታ ኤክድ፥ ጎዳይ እያዉ ኦድዳይሳዳ ኦስ። ሽን እ ባ አዋ ሶ አሳስነ ካታማን ደእያ አሳስ ያይዳ ግሾ ጋላስ ኦናይሳ አግድ ቃማ ኦስ።

28 ዎንታ ጉራ ካታማ አሳይ ደንድያ ዎደ ባኣለ ኤቃ ያርሾ በሳይ ላለትን፥ እያ ማታን ደእያ አሼራ ምስለይ መቅድ ዎዳይሳ በእዶሶና። ቃስ ሄ በሳን ያርሾ በሲ ጊግዳይሳነ እያ ቦላ ኮርማ ያርሽዳይሳ በእዶሶና። 29 ኤንቲ እሶይ እሱዋ፥ "ላ ሀይሳ ኦዳይ ኦኔ?" ያግድ ኦይችዶሶና። ኤንቲ ሄሳ ፕልግድ በእዳ ዎደ ሄሳ ኦዳይ እዮኣሳ ናኣ ገድዮና ግደይሳ ኤርዶሶና። 30 ሄሳፈ ጉየ፥ ካታማ አሳይ እዮኣሳኮ፥ "ባኣለ ያርሾ በሳ ላልዳ ግሾነ እያ ማታን ደእያ አሼራ ምስልያ መንረድ የግዳ ግሾ ነ ናኣ ሃ ከሳ፤ ኑ እያ ዎና" ያግዶሶና።

31 ሽን እዮኣስ ባ ቦላ ደንድዳ አሳኮ፥ "ህንተ ባኣለስ ሞተተቲ? ዎይኮ ህንተ እያ አሻናዉ ኮዬቲ? ህንተ ግዶፈ እያዉ ሞተትያ አስ ደእኮ፥ ሳእ ዎንታናዉ እ ሀይቆ። ባኣለይ ፆሰ ግድኮ ባ ያርሾ በሳ ላልዳይሳራ እ ባዉ ሞተቶ" ያግስ። 32 ሄ ጋላስ እዮኣስ፥ "ላለትዳይ እያ ያርሾ በሳ ግድያ ግሾ እያራ ባኣለይ ሞተቶ" ያግድ ገድዮና የሩባኣላ ግድ ሱንስ።

33 ሄሳፈ ጉየ፥ ምድያመ፥ አማለቃነ ዶሎሀ ባጋ ቢታ አሳይ እስፈ ሺቅድ፥ ዮርዳኖሰ ሻፋ ፕንድ እዝራኤላ ዛንጋራን ዱንካንዶሶና። 34 ጎዳ አያናይ ገድዮና ቦላ ዎን አብኤዘራ ኮች ግድዳ አሳ ኡባይ ባና ካላና መላ ኤንታ ፄጋናዉ ሞይዘ ፑንስ። 35 ምናሰ ኮቻ ኡባስ ኪታ የድድ፥ ባና ካላና መላ ኤንታ ፄግስስ። ቃስ አሴራ፥ ዛብሎናነ ንፍታለመ ኮቻታስ ኪታ የድን፥ ኤንቲ እያራ ኦላስ ባናዉ ከይዶሶና።

36 ገድዮን ፆሳኮ፥ "ነ ታዉ ቃላ ገልዳይሳዳ እስራኤለ አሳ አሻናዉ ታና ዶርዳባ ግድኮ፥ 37 ሄኮ፥ ታኒ ግስተ ቡክያ ዉዱማን ፓደትዳ ዶርሰ እክሰ ዎና። ሀራ ቢታ ኡባይ መላ ግድድ ሄ እክስያ ቦላ ፃላላ አክ ዎኮ ነ ኦድዳይሳዳ እስራኤለ አሳ ታ ኩሸን አሻናይሳ ታ ኤራና" ያግስ። 38 እ ግዳይሳዳ ሀንስ። ዎንተ ጋላስ ዎንታ ጉራ ደንድድ፥ ዶርሳ እክስያ ጉምእዳ ዎደ እስ ፃሮ ግድያ ሃ እያፐ ከይስ።

39 ቃስ ገድዮን፥ "ሀያና ሀንቀቶፋ፤ ታኒ ነና ጉጃዳካ ሀራ ኦይሾ ኦይቻና። ዶርሳ እክስያ ቦላ ሀራ ማላ በሳና መላ ኦይቻይስ። ሀእ ዶርሳ እክሰይ መላ ግድን ዩሹዋን ደእያ ቢታይ አካትድ ላካናዳ ኦ" ያግስ። 40 ሄ ቃማ ፆሳይ ሄ ማላ ኦስ። ዎንተ ጋላስ ዶርሳ እክሰይ መላ ግድን ቢታ ኡባይ አካትድ ላክስ።