አይሰይሳታ ማፃፋ 7

ገድዮን ምድያመ ፆኑዋ

1 ዎንተ ጋላስ የሩባኣላ ጌተትያ ገድዮንነ እያራ ደእያ አሳ ኡባይ ዎንታ ጉራ ደንድድ ብድ፥ ሀሮዳ ፑልቱዋ ማታን ዱንካንዶሶና። ምድያመ አሳይ ኤንታፈ ፑደሀ ባጋራ ሞረ ዙማ ማታን ደእያ ዛንጋራን ዱንካንዶሶና። 2 ጎዳይ ገድዮናኮ፥ "ኔራ ደእያ አሳይ ዳሮ ግድያ ግሾነ እስራኤለ አሳይ፥ ‘ኑኒ ኑ ዎልቃን ፆንዳ’ ግድ ታ ቦላ ጬቀቶና መላ ታኒ ምድያመታ ህንተ ኩሸን አዳ እምከ። 3 ሄሳ ግሾ፥ አሳኮ፥ ‘ያይያ አስ ደእኮ ጋላዳ ዙማፐ ስሚድ ጉየ ባ ሶ ሶ ቦ’ ያጋዳ አዋጃ" ያግስ። ያትን፥ ላታማነ ናምኡ ሙኩሉ አሳይ ጉየ ስምን ታሙ ሙኩሉ አስ አትስ።

4 ግዶሽን፥ ጎዳይ ገድዮናኮ፥ "ሀእካ አሳይ ዳሮ። ነ ኤንታ ኤካዳ ዱገ ሻፋ ዎ፤ ታኒ ኤንታ ያን ፓጫና። ታኒ፥ ‘ሀይስ ኔራ ቦ’ ገይስ ኔራ ቦ፤ ታኒ፥ ‘ሀይስ ኔራ ቦፖ’ ገይስ ቦፖ" ያግስ።

5 ገድዮን አሳ ሻፉ ኤክድ ብስ። ጎዳይ እያኮ፥ "ሀ አሳ ግዶፈ ጉልባትድ ሃ ኡየይሳታነ ካናዳ ሃ እንፃርሳን ኡየይሳታ ሻካ" ያግስ። 6 ባንታ ኩሸን ሃ ኡየይሳታ ታይቦይ ሄ ፄታ፤ ሽን አትዳይሳት ኡባይ ሃ ጉልባትድ ኡይዶሶና።

7 ጎዳይ ገድዮናኮ፥ "ባንታ ኩሸን ሃ ኮጰትድ ኡይዳ ሄ ፄቱ አሳታን ታኒ ህንተና አሻና፤ ምድያመታ ህንተዉ አዳ እማና። ሽን አትዳ አሳ ኡባይ ባ ሶ ሶ ስሞ" ያግስ። 8 ሄሳ ግሾ፥ ገድዮን አሳታ ሽንቅያነ ኤንታ ሞይዝያ ኤክዳ ሄ ፄቱ አሳታ ባራ አሽድ፥ ሀንኮ አሳ ኡባ ኤንታ ሶ ሶ የድስ። ሀ ኡባይ ሀንያ ዎደ ምድያመ ኦላንቾት ኤንታፈ ጋርሳ ባጋራ ደእያ ዛንጋራን ዱንካንድ ኡትዶሶና። 9 ሄ ቃማ ጎዳይ ገድዮናኮ፥ "ታኒ ነዉ አዳ እምዳ ግሾ ደንዳዳ ኤንቲ ዱንካንዳ በሳን ደእሽን ኦላ። 10 ኔኒ ኤንታ ኦላናዉ ያይኮ ነ ኦሳንቹዋ ፑራ ኤካዳ ኤንቲ ዱንካንዳ በሳ ዱገ ዎ። 11 ኤንቲ ግያባ ስአ። ሄሳፈ ጉየ፥ ኔኒ ኤንታ ኦላናዉ ምኖተ ደማና" ያግስ።

ገድዮንነ እያ አይለይ ፑር፥ ምድያመት ዱንካንዳ በሳ ማታን ናግያ ኦላንቾታኮ ብዶሶና። 12 ሄ ዎደ ቦለዳ ዳርዳ ምድያመት፥ አማለቃትነ ዶሎሀ ባጋ አሳ ኡባይ ዛንጋራን ዱንካንድ ኡትዶሶና። ኤንታ ግማለት አባ ጋፃን ደእያ ሻፈ መላ ታይባናዉ ዳንዳኤተና።

13 ገድዮን ያ ጋክያ ዎደ እስ አደይ ባ አሙሁዋ ባ ላግያስ ኦድሽን ስእስ። ሄስካ፥ "እስ ባንጋ ኡይ ኦኮለት ጋክድ ምድያመታ ዱንካንያ ዶምእስ፤ ዱንካነይ ሽረት ዎድ ምጨትስ" ያግስ።

14 እያ ላገይ ዛሪድ፥ "ሄስ እስራኤለ አድያ፥ እዮኣሳ ናኣ ገድዮና ማሻፈ አትሽን፥ ሀራባ ግደና። ፆሳይ ምድያመነ ምድያመታራ ደእያ ኦላንቾታ ኡባ ገድዮናስ አድ እሚስ" ያግስ።

15 ገድዮን ሄ አሙሁዋነ እያ ብርሸ ስእዳ ዎደ ጉልባትድ ፆሳ ጎይንስ። እስራኤለ አሳይ ዱንካንዳ በሳ ጉየ ስሚድ፥ "ደንድተ፤ ጎዳይ ምድያመ ኦላንቾታ ህንተ ኩሸን አድ እሚስ" ያግስ። 16 ሄ ፄቱ አሳታ ሄ ጩጋን ሻክድ ኤንታዉ ሁጰን ሁጰን እስ እስ ሞይዘነ ግዶን ኤፅያ ፆምፐይ ደእያ እስ እስ ፃሮ እሚስ። 17 ገድዮን ኤንታኮ፥ "ታና ፄልተ፤ ታኒ ኤንቲ ዱንካንዳ በሳ ጋክያ ዎደ ኦይሳዳ ህንተካ ኦተ። 18 ታነ ታራ ደኤይሳት ኡባይ ሞይዘ ፑንይ ዎደ ህንተካ ኤንቲ ዱንካንዳ በሳ ዩሹዋን ኤቅድ ሞይዘ ፑንሸ፥ ‘ጎዳሳነ ገድዮናሳ’ ያግድ ዋስተ" ያግስ።

19 ግድ ብላሄ ግድያ ዎደ ናገይሳት ላመትዳፐ ጉየ ገድዮንነ እያራ ደእያ ፄቱ አሳት ብድ፥ ምድያመት ዱንካንዳ በሳ ጋክድ ባንታ ሞይዝያ ፑንዶሶና፤ ኦይክዳ ፃሩዋ መንዶሶና። 20 ሀራ ባጋራ ደእያ ናምኡ ጩጋይ ሄሳዳ ኦዶሶና። ባንታ ሀድርሳ ኩሸን ኤፅያ ፆምፐ፥ ባንታ ኡሻቻ ኩሸን ሞይዘ ኦይክድ፥ "ጎዳነ ገድዮና ማሻ" ያግድ ዋስዶሶና። 21 አሳ ኡባይ ምድያመት ዱንካንዳ በሳ ዩሾን ባ በሳን በሳን ኤቅዳሽን፥ ምድያመ ኦላንቾት ኡባይ ዋስሸ ባቃትዶሶና። 22 ሄ ፄቱ አሳይ ባንታ ሞይዝያ ፑንዳ ዎደ ሞርከ ኦላንቾት ባንታ ማሻ እሶይ እሱዋ ቦላ ደንና መላ ጎዳይ ኦስ። አትዳ ኦላንቾት ፃራራኮ ስሚድ ቤት-ሽፃ ጋካናዉ፥ ያፐ አድ፥ ፃባታ ማታን ደእያ አቤል-ማሆላ ጋካናዉ ባቃትዶሶና። 23 ሄሳፈ ጉየ ንፍታለመ፥ አሴራነ ምናሰ ኮቻት ፄገትድ፥ ሺቅድ ምድያመታ የደዶሶና። 24 ደረይ ዳርያ ኤፍሬማ ቢታን ደእያ አሳኮ ገድዮን ኪትድ፥ "ምድያመታ ኦላናዉ ዱገ ዎድ ቤት-ባራ ጋካናዉ ደእያ ዮርዳኖሰን ገልያ ሻፋታ ኤንታፈ ካሰትድ ኦይክተ" ያግስ። ኤፍሬማ አሳ ኡባይ ፄገትድ፥ ሺቅድ ቤት-ባራ ጋካናዉ ዮርዳኖሰን ገልያ ሻፋታ ኦይክዶሶና። 25 ኤንቲ ኦሬባነ ዘባ ጌተትያ ናምኡ ምድያመ ሀላቃታ ድእዶሶና። ኦሬባ፥ "ኦሬባ ዛላ" ጌተትያ በሳን፥ ቃስ ዘባ፥ "ዘባ ዎይነ ጉምእያ በሲ" ጌተትያ በሳን ዎዶሶና። ሄሳፈ ጉየ፥ አትዳ ምድያመታ የደድ፥ ኦሬባነ ዘባ ቆያ ቃንፅድ ኤንታ ሁጵያ፥ ዮርዳኖሰ ሻፋፐ ሄፍንን ደእያ ገድዮናኮ ኤህዶሶና።