1 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 2 ኡባፈ ዎልቃማ ጎዳይ፥ "ታኒ ፅዮነስ ዳሮ ቃታይስ፤ እ ምሻይ ታና ፁጌስ። 3 ታኒ ፅዮነ ስማዳ የሩሳላመን ዳና። ቃስ የሩሳላመይ አማንያ ካታማ ጌተታዳ ኤረታና። ኡባፈ ዎልቃማ ጎዳ ዙማይ ጌሻ ዙማ ጌተትድ ፄገታና" ያጌስ።

4 ኡባፈ ዎልቃማ ጎዳይ፥ "ጭምድ ጉፈራ ብያ አደይነ ማጫሳይ ካሰይሳዳ የሩሳላመ ዳባባን ኡታና። 5 የሩሳላመ ካታማ ኦገት ካእያ አደነ ማጫ ናይታን ኩማና" ያጌስ።

6 "አትዳ አሳስ ሄስ ማላልስያባ ግድኮካ፥ ታና ሄስ ማላልስያባዬ? ያጌስ ኡባፈ ዎልቃማ ጎዳይ። 7 ሄኮ ታኒ ታ አሳ ዶሎሀፐነ ዉሎሀፐ ሺሻና። 8 ኤንቲ የሩሳላመን ዳና መላ ኦና። ኤንቲ ታ አሰ ግዳና፤ ታኒ ፅሎነ አማንያ ኤንታ ፆሳ ግዳና" ያጌስ ኡባፈ ዎልቃማ ጎዳይ።

9 ኡባፈ ዎልቃማ ጎዳይ ሀይሳዳ ያጌስ፦ "ህንተኖ፥ ኡባፈ ዎልቃማ ጎዳ ኬ ባሶይ የገትዳ ጋላሳፐ ዶምድ ናበት ኦድዳ ቃላ ስእዳይሳቶ፥ ህንተ ኩሽያ ምንተ፤ ኦሱዋ ምንድ ፖልተ። 10 ሄ ዎድያፐ ካሰ አሳስ ዳሞዘይ፥ መህያስ ቃንፀትያ ከር ባዋ። ታኒ አሳ ኡባ እሱዋ እሱዋ ቦላ ሞርከተን ደንዳ ግሾ፥ ገለይሳስነ ከየይሳስ ሳሮይ ባዋ። 11 ሽን ሀእ ታኒ ሀ አትዳ አሳ ቦላ ካሰ ኦዳይሳዳ ኦከ" ያጌስ ኡባፈ ዎልቃማ ጎዳይ።

12 "ኤንቲ ዘርዳ ኡባይ ዶላና፤ ዎይነይ ባ አይፍያ እማና፤ ጎሻይ ካን ኩማና፤ ሳሎት ባንታ እራ እማና። ሀይሳ ኡባ አትዳ አሳስ ላታ ኦዳ እማና። 13 ህንተኖ፥ ይሁዳ አሳዉ፥ እስራኤለ አሳዉ፥ ካዎተታ ግዶን ህንተ ባደትዳይሳታ ግድደታ፥ ሽን ሀእ ታኒ ህንተና አሻና፤ ህንተ አንጀትዳይሳታ ግዳና። ያዮፍተ! ህንተ ኩሽያ ምንተ!" ያጌስ።

14 "ህንተ ማይዛት ታና ይሎይዳ ዎደ ኤንታ ቃይ ባይና ሴራናዉ ቆፋ ቃቻስ። 15 ሀእ ታኒ የሩሳላመስነ ይሁዳስ ሎኦባ ኦናዉ ቆፋ ቃቻስ። ህዛ ያዮፍተ! 16 ህንተ ኦናዉ ኮሽያባይ ሀይሳ፦ እሶይ እሱዋራ ቱማ ኦደትተ፤ ፕርዳ ዳባባን ቱማነ ሳሩዋ ኤህያ ፕርዳ ፕርድተ። 17 እሶይ እሱዋ ቆሀናዉ ኢታባ ህንተ ዎዛናን ማቀቶፍተ፤ ዎርዶን ጫቆፍተ። ሀይሳታ ኡባ ታኒ እፃይስ" ያጌስ ኡባፈ ዎልቃማ ጎዳይ።

18 ኡባፈ ዎልቃማ ጎዳ ቃላይ ቃስካ ታኮ ሀይሳዳ ያግድ ይስ፦ 19 "ኦይዳን፥ እቻሻን፥ ላፑንነ ታማን አጌናን ህንተ ፆምዳ ፆማይ ይሁዳ አሳስ ኡፋይስነ እንጀ ዎደ ግዳና። ሄሳ ግሾ፥ ህንተ ቱማተነ ሳሮተ ዶስተ" ያጌስ።

20 "ዳሮ አሳይነ ዳሮ ካታማታን ደእያ አሳይ የሩሳላመ ያና። 21 እስ ካታማን ደእያ አሳይ ሀራ ካታማን ደእያ አሳኮ ብድ፥ ‘ጎዳ አንጆይ ያና መላ ዎሳናዉነ ኡባፈ ዎልቃማ ጎዳ ኮያናዉ አነ ቦስ፤ ታንካ ባይስ’ ያጋና። 22 ቃስ ዳሮ አሳይነ ዎልቃማ ካዎተት ኡባፈ ዎልቃማ ጎዳ ኮያናዉነ ዎሳናዉ የሩሳላመ ያና። 23 ሄ ጋላሳታን ዱማ ዱማ ቃላን ሃሳያ ካዎተታ ኡባፈ ታሙ አሳት ይድ፥ እስ አይሁደ አድያ ማኡዋ ማጫራ ኦይክድ፥ ‘ፆሳይ ህንተራ ደኤይሳ ኑኒ ስእዳ ግሾ፥ ኑኒ ህንተራ ባና’ ያጋና" ያጌስ ኡባፈ ዎልቃማ ጎዳይ።