1 GODAY, «Isra7eeley buro

yidhan dishin dosadis.

Histtada ta naaza

ta Gibxe biittafe xeygadis.✝

2 Gido attiin ta istta xeygida keena

istti taappe gede

haakki haakki bida.

Ba7aales yarsho shiishshida;

iza misletasikka

exaane cuwasida.

3 Efreemes kusheza oykkada

hemeth tamaarsiday tana;

Gido attiin istta paththiday

tana gididayssa

istti eribeettenna.

4 Ta istta qadheta wodoroninne

siiqo sansalatan

taakko shiishshadis;

istta morgefe

qambara denththadis;

ziqqi ga hokkada istta mizadis.

5 «Histtiin istti

maaroteththan gelontta gishshas

duge Gibxe simmettennee?

Asoorey istta haarennee?

6 Istta iita halchcho gishshas

Morkke tooray istta

katamata olana;

istta katamata pengetakka

menththereththi yeggana.

Isttika mulera dhayana.

7 Ta derey

taappe haakkanaas koyides;

gidikkoka istti taakko Ubbaafe

Wolqqama Xoossako waassiko

ta istta ashshike.

8 «Efreemee! Ta nena

wostta aggaaganee?

Isra7eele ta nena

wostta aaththa immanee?

Ta kase Adaamaninne

Xaboymen ooththidayssaththo

wostta ne bolla ooththoo?

Ta wozinay giddon qaaxxides;

ta maaroteththay

nena ashshana dendides.✝

9 Tani intte giddon diza Geeshsha

Xoossa attiin as gidikke.

Ta hanqora intte intteko yiikke;

ta bosha hanqo

intte bolla yeddike;

Efreeme zaarada dhayssike.

10 «Tani GODAY istta ashshanaas

xaaggiza gaammo mala

tani ta qaala sissishin

istti tana kaallana;

ta nayti kokkorishe

arshey mokkiza baggafe yaana.

11 Gibxeppe kafo mala

Asooreppe haraphphe mala

piradhdhi yaana.

Tani istta isttasohon

woththana» gees.

12 GODAY, «Efreeme wordon

Isra7eeleykka genen

tana giddoththides;

Yuhuday Xoossas

haarettonttaade;

ammanettida Geeshshazara

eqettizaade» gees.