1 Hanno biittay bolla diza asa ubbaa bolla

GODAY shiishshiza mootoy dees.

Hessa gishshas Isra7eele asawu!

Izi inttena gizayssa siyite;

«Hanno biittay bollafe

ammaneteththay,

siiqoynne Xoos eroy dhaydes.

2 Haan dizay qanggeth, wordo,

shemppo wodho, laymateththinne

caaqqida qaala muusi xalla dees.

Geneynne shemppo wodhoy

dari dari bees.

3 Hessa gaason biittay bolla

koshay yees;

izi bolla dizay wuri gilqees;

meheti, do7ati, kafotinne

Abba giddon diza moleti

ubbay wureettes.»

4 GODAY, «Intteno qeeseto

ta inttena mootiza miishshi dees;

hessa gishshas oonikka

hara asara palamettofo;

qasse oonikka hara as mootoppo.

5 Intte omarsinne gallas

dhuphetteeta;

nabetikka inttenara

dhuphetteettes.

Hessa gishshas tani intte aayo

Isra7eele dhayssana.

6 Ta derezas erateththi

paccida gishshas dhaydes.

Intte tana eranaas

koyontta gishshas

tanikka intte taas qeeseta gidi

ooththana mala koykke.

Intte ta woga balettida gishshas

tanikka intte nayta balana.

7 Qeeseta qooday dari dari bishin

istti ta bolla ooththida nagaray

dari dari bides;

bantta bonchchoka

kawushshan laammida.

8 Ta dereza nagaray

isttas muussas kiyides;

hessa gishshas derey

nagara ooththizayssa

keehi dosida.

9 Intte qeesetikka deraappe

dummatekketa;

hessa gishshas ta ubbaaka

izaade hano mala iza qaxxayana;

iza ooso malakka izas immana.

10 Ta derey tana GODAA

aggida gishshas

istti maanashin

kallettenna;

laymatanashin

corattettenna» gees.

11 «Laymateththas,

Caalida woyne ushshas,

mal7o woyne ushsha suukes

banttana aaththi immida;

hessantti ta dereza

wozina ekkida.

12 Hessa gishshas miththafe oosettida

eeqa xoossa zore oychcheettes;

istti izan maroththiza guufezikka

isttas zaaro immiza misatees;

laymateththa qofay baleththides;

bantta Xoossaas

ammanettibeettenna.

13 Zumay dizason dizason

yarsho yarsheettes;

zumbullata bolla,

gita daashsha miththata

kuwa garsan

xuugettiza yarsho yarsheettes.

Hessa gaason intte macca nayti

layman daana;

intte nayta machcheti laymatana.

14 Intte macca naytinne

intte nayta machcheti

laymatishin tani istta qaxxaykke;

gaasoykka intte attumasati

layma maccassatara suuketeettes;

eeqa xoossatas laymateththa

yarsho shiishshizaytara

intteka izaththo yarsheeta.

Hessa gishshas akeekay baynda

derey dhayana.

15 «Intteno Isra7eele asatoo!

Intte laymatikkoka

Yuhuda asay

laymatana mala ooththofte;

hessa gishshas taas goynnanaas

Gelgela woykko

Beeti-Awene*

geetettizaso boopite;

‹De7o GODAY beyiin› giidi

ta sunththan caaqqofte.

16 Isra7eele derey makkallanchcha

ussa mala makkallides;

histtiin GODAY istta

dorsa laaqqata mala

lo7oson wostti heemmanee?

17 Efreemey eeqa xoossata goynon

oykettida gishshas

istta gede aggaagite.

18 Woyne ushshu uyidaappe guye

laymateettes.

Istta ayssizaytikka

yeellachchiza miish doseettes.

19 Istta gote carkoy pitti efana;

istta yarshoy istta bolla

yeella ehana.