Hose7e Tinbite 12

1 Efreemey carko heenththanchcha;

gallas kumeth arshey mokkiza

bagga carko kaallees;

wordonne makkalla darsees.

Asoore deraara

caaqo qaala gelees;

wogara zayte Gibxe biitta yeddees.

2 GODAY Yuhuda deraa bolla

shiishshiza mootoy dees;

izi Yaaqoobe iza

hanota mala qaxxayana.

Iza ooso mala izas immana.

3 Yaaqoobey buro

ba aayey ulon dishe

ba isha toho qirphe oykkides;

Asa zawa gakkidaappe guye

oossara baaxetides.✝12:3 Medhe 25:26✝12:3-4 Medhe 32:24-26

4 Kiitanchchara baaxetidi

iza xoonides;

iza sinththan teema demmanaas

yeekki woossides;

izakka Beetelen demmides;

heen izara haasayettides.✝12:4 Medhe 28:10-22

5 GODAY Ubbaafe Wolqqama Xoossay

izas erettida sunththay GODAA.

6 Hessa gishshas

ne Xoossako simma;

siiqonne tumu pirda

lo7eththa oykka;

ubba wode ne Xoossan ammanetta.

7 «Zal7anchchati

wordo geeddaran bayzeettes;

shocechchoka doseettes.

8 Efreemey, ‹Tani dure;

ta duretadis;

taas hayssi ubbay dishin

ay qohoykka

woykko nagaray

ta bolla gakkenna›

gi ceeqettees.

9 «Inttena Gibxe biittafe kessida

GODAA intte Xoossay tana;

layththa ba7aale gallas

kase intte ooththiza mala

intte intte dunkaanen daana mala

ta ooththana.✝12:9 Lewe 23:42-43

10 «Tani kasetada nabetas yootadis;

daro ajjuuta ta istta bessadis;

istta baggara leemison yootadis.

11 Gala7aaden iitateththi kumides;

asaykka shufuro xalla.

Gelgelan mirgota yarshos

shiishshizoo?

Istta yarshizasoy meqerettidi

goshsha giddon korettida

shuchcha mala gidana» gees.

12 Yaaqoobey Mesphexoomiya

baqatides;

Isra7eeley machcho ekkanaas

heen haggazides;

izis immana ciloosha gishshas

dors heemmides.✝12:12 Medhe 29:1-20

13 GODAY nabe baggara Isra7eele

Gibxeppe kessides,

nabeza baggara istta

ishalsi oykkides.✝12:13 Kessa 12:50-51

14 Gido attiin Efreemey

iza keehi hanqeththides;

iza GODAY izi suuth gussida mala

qohoza iza bolla gaththana;

izi leqqiza leqoza gishshas

izas bessizaaz qanxxana.