1 Isra7eele asawu! Ufayettofte!

Hara kawoteththata mala

ufays nococu goopite!

Ays giikko intte intte Xoossas

ammanettibeekketa;

kaththa bale ubbaan

laymateththas

2 Hessa gishshas hayssafe guye

intte kaththa baleppe kath,

woyne gum7izasohoppe

woyne ushshu demmeketa.

Ooraththa woyne ushshika

inttes paccana.

3 Isra7eele derey GODAY

isttas immida biittan uttenna.

Efreemey duge Gibxe simmana;

Asoorekka biidi tunida kath maana.

4 Heen GODAAS woyne ushshu

yarshanaas dandayettenna;

istta yarshoyka

GODAA ufayssenna.

Hessa gishshas isttas yarshozi

shochcha kath gidana;

iza miza ubbay tunana.

He kaththazi coo gafas

miza kath gidana attiin

GODAA keeth yarshos shiiqenna.

5 Histtiin intte dumma dumma

ba7aale gallassataninne

GODAA ba7aale gallassatan

ay ooththeetii?

6 Istti bashshafe attanaas betikkoka

Gibxey istta shiishshana;

Memppisa geetettizason

istta moogana;

istti haarida biray wurikka

sharafa may7i attana;

istta duussaso

ubbaa agunththi laattana.

7 Qaxxayana wodey gakkides;

Pirda gallassika gakkides;

hessa Isra7eele asay ero.

Intte ooththida nagaray

daro gidida gishshassinne

intte morkketeththi gita gidida

gishshas nabey eeya mala,

Xoossa Ayanay iza bolla

shempidaadey

gooshsha mala qoodettides.✝

8 Nabey Xoossara gididi

Efreeme naagizaade;

gido attiin iza oge

ubbaan woximadey,

iza Xoossa Keeththan ixoy

iza naagees.

9 Isra7eele asay

kase Gibi7a wode diza

asa mala keehi tunides;

Xoossi istta qohoza qoppidi

istta nagara gishshas

istta qaxxayana.✝

10 GODAY,

«Tani Isra7eele asaa demmida wode

taas bazzo biittan

woyne miththa ayfe

demmida misatides.

Tani kase intte aawata

be7ida wode

taas koyro kaxxida balase miththa

ayfe be7idaa misatides.

Istti Ba7aali-Pe7oore gakkida wode

banttanateththa yeellachchiza

eeqa xoossas dummasida.

Isttika he ba siiqiza

eeqa xoossaa mala tunida.✝

11 Efreeme bonchchoy

kafoy piradhdhiza mala

piradhdhi dhayana;

hayssafe guye naa qanththateththi,

shaaraynne naa yeloykka deenna.

12 Naa yelidi dichchikokka

istti dhoommana gakkanaas

ta istta wodhana.

Ta isttafe ta ayfeso zaarida wode

isttas aayye ana!

13 Efreemey Xiroose mala

lo7o gaden tokettiin be7adis;

Ha7i gidikko Efreemey

ba nayta shemppo wodhizaytas

aaththi immana.

14 GODAWU! Ne ha deraas

ay immanee?

Awucayiza ulonne

shulla dhanth imma!

15 «Istti Gelgelan

ooththida iitateththaa

gaason ta istta ixxadis;

istti ooththida iita ooso gishshas

ta keeththafe ta istta gooddana;

hayssafe guyekka

ta istta dosikke;

istta kaaleththizayti

ubbay makkallanchchata.

16 Efreemey shocettides;

isttas xaphoykka melides;

Istti ishalon dichchida nayta

ta wodhana» gees.

17 Istti azazettontta ixxida gishshas

ta Xoossi istta yeggi aggana;

isttika kawoteththata giddon

coo toylattana.