1 «Asay tanara diza

caaqo qaala laallides;

ta woga bollaka makkallides.

Hessa gaason morkkey

arganththa mala

GODAA keeththa bolla

alaanththees.

Hessa gishshas

istti naagettana mala

zaye punna!

2 Isttika, ‹Xoossawu!

Nu nena eroos› gishe

taakko waasseettes.

3 Gido attiin Isra7eele asay

lo7o miish ixxida gishshas

morkkey istta gooddana.

4 «Ta sheney baynda istti baas

kawota kawoththida;

tana oychchontta dishe

daannata doorida;

ba birappenne ba worqqafe

bana dhayssana eeqa xoossata

baas ooththida.

5 Samaariya dere asatoo!

mari misatissi intte medhdhida

eeqa xoossati tana shaatteettes.

Ta hanqoy intte bolla

tama mala eexxees;

intte mooro ooson

ayde gakkanaas intte gam7anee?

6 Hiillanchchay mara misle

medhdhida eeqa xoossati

Xoos gidanaas dandayettenna.

Hessa gishshas

mar misati oosettida

Samaariya eeqa xoossati

meqeretti wodhdhana.

7 Istti carko zeridi gote shiishshana;

buuxa bolla ayfey deenna;

dhiilleyka beettenna;

ayfikkoka allagati maana.

8 Isra7eeley

hara kawoteththata giddon

hiraysso miishsha mala gidida.

9 Barkka bazzo biittan toylattiza

hardida mala

gede Asoore dere bida.

Bana maaddana mala

kawotas miishshe immidi

baas dabbo shammida.

10 Istti bana kawotas

aaththi bayzikkoka

ha7i ta istta shiishshana;

kawotinne daannati

istta bolla gaththiza

metoppe dendidayssan

istti guuxxi guuxxi baana.

11 «Efreemey nagara wursanaas

daro yarshosoho ooththides;

gido attiin he yarshosohoti

nagara ooththizaso gidida.

12 Ta isttas ta wogaa garsan diza

daro miishshata xaafadis.

Istti gidikko

hada miishsha mala qoodida.

13 Istti lo7o yarsho shiishsheettes

he yarsho ashozakka meettes;

gido attiin GODAY

isttan ufayettibeenna.

Hessa gishshas izi istta

iitateththaa zaari qoppana;

istta nagara gishshas qaxxayana.

Isttika Gibxe simmana.

14 «Isra7eele derey

baas gita kawoteththa

keeththata keexxides;

gido attiin bana medhdhidayssa balides.

Yuhuda dereykka daro mino

katamata ooththides;

gido attiin tani he katamata bolla

tama yeddana;

istta miixataka

tamay maana» gides.