1 Efreemey Isra7eele dereza giddon

bonchchetti diza gishshas

izi haasayshin asay

ubbay kokkorees.

Gido attiin ba7aales

goynnida gishshas

qohides; hayqqides.

2 Ha7ikka nagara bolla

nagara gujjida;

bantta cinccateththan misleta

baas giigsida;

birappe eeqa xoossata

banttas medhdhida;

heyti wurikka

asa kushen oosettidayta;

hayta ha asata gishshas,

«As yarsho histti shiishsheettes;

mara mislen oosettida eeqa

xoossata yeereettes» geetettides.

3 Hessa gaason istti wontta

maalado shaara mala

coo tim7i gaana;

maalado xaaza malakka coo

wodhdhi dhayana;

woykko bangga bukkiza baleppe

gote carkoy efiza

suulla mala gidana;

woykko keeththafe

kezidi beettishe

coo dhayza cuwa mala gidana.

4 GODAY, «Nena Gibxeppe kessiday

tana GODAA ne Xoossa;

nees taappe attiin

hara Xoossi deenna;

nena ashshiday taappe attiin

hara xoos gidenna.

5 Bazzo biittan

kaththinne haaththi bayndason

nena ishalsa woththadis.

6 Gido attiin ta miziin

istti kallida;

kallidi otorettida;

hessafe guye tana balida.✝

7 Hessa gishshas tani istta bolla

gaammo mala yaana;

maahe mala oge bolla

zamada uttana.

8 Izi marati bonqqettida zardo mala

ta istta shocananne

puuzereththana;

ta istta gaammo mala

puuzereththa mittana;

wora do7a mala duusereththana.

9 «Isra7eele derezoo!

Ne ta bolla dendida gishshassinne

nena maaddiza tanara

ne eqettida gishshas

ne dhayana;

10 Ne tana, ‹Taas kawonne

halaqata imma› gadasa;

histtiin ha7i nena ashshana

kawoy awan dizee?

Ne katamatan diza

halaqati ubbay

ha7i awan dizoo?✝

11 Ta hanqettashe

inttes kawo immadis;

gido attiin tani boshankka

iza shaaradis.✝

12 «Efreeme qohoy doorettides;

iza nagaraykka

mazgaben xaafettides.

13 Miixay oykkida maccassa mala

iza bolla metoy yaana;

izi gidikko

aadho erateththi baynda

eeya naa;

yelettiza wodey gakkiin

ba aayey uloppe yelettanaas

koyontta naa mala.

14 Tani nena

duufo wolqqafe ashshana;

hayqoppeka wozzana.

Hayqoo! Ne wodhiza wolqqay

awan dizee?

Duufozoo! Neni as dhayssiza

wolqqay awan dizee?

Tani izas qadhettike.✝

15 Izi ba ishata giddon

dure gidikkoka

GODAAPPE kiitettida carkoy

arshey mokkiza baggara

bazzo biittafe dendidi yaana.

Pulttoy to7ana;

haaththa olaykka melana;

izas diza al7o aqotay

minjja keeththafe bonqqettana.

16 Samaariya asay

bantta Xoossa bolla

makkallida gishshas

bantta qoho tookkana;

mashshankka siifettana;

qeeri nayti biitta bolla

dinccettana;

qanththara diza maccassata

uloy daakettana» gees.