1 तकोआवासी गाव को आमोस जो मेडा-बकरिहोन खे चरानआलो मे से थो, ओको यो वचन हइ जो उ ने यहूदा को राजो उजिय्याह का, अरू योआश को बेटो इस्राएल को राजो यारोबाम का दिनहोन मे, भूकम्प से दो साल पहले, इस्राएल का बारे मे दर्शन देखीखे बोले :

2 "यहोवा सिय्योन से गरज्ये, अरू यरुशलेम से अपना शब्द सुनाये; तब ठाठ्यो को चराइहोन दुख करे, अरू कर्म्मेल टेकडी कि चोटी झुली जाये✝."

3 यहोवा यो बोलस हइ : "दमिश्क का बार-बार कऱ्या अपराधहोन का कारण मी ओको दन्ड नी छोडु*; क्योंकि उनने गिलाद का दावनकरनआलो लोहा को अवजार से खुदी डाल्यो हइ. 4 येकालिये मी हजाएल का किल्ला मे अंगार लगायु, अरू ओका से बेन्हदद को किल्ला भी भस्म हुये जाये. 5 मी दमिश्क का अंदर जान का दरवाजा खे तोडी डाल्यु, अरू आवेन नामको तराइ का र्हेनआलाहोन खे अरू बेतएदेन का घर मे ऱ्हेनवालो राजा खे खतम कऱ्यु; अरू आराम का दुनीया बन्दी हुइखे कीर खे जाया, यहोवा को योही वचन हइ."✝

6 यहोवा यो बोलस हइ : "गाजा का बार-बार कऱ्या अपराधहोन का कारण मी ओको दन्ड नी छोड्यु*; क्योंकि उ सब दुनीयाहोन खे बन्दी बनयखे ली गयो कि उनखे एदोम का वश मे करी दे. 7 येकालिये मी गाजा बागुड मे अंगार लगायु अरू ओका से ओको किल्ला भस्म हुइ जाये. 8 मी अशदोद का र्हेनआलाहोन खे अरू अश्कलोन का राजा खे भी खतम कऱ्यु; मी अपना हाथ एक्रोन का खिलाप चलायु, अरू कुछ पलिश्ती दुनीया खतम हुइ," परमेश्वर यहोवा को यही वचन हइ.

9 यहोवा यो बोलस हइ : "सोर का बार-बार कऱ्या अपराधहोन का कारण मी ओको दन्ड नी छोड्यु✝; क्योंकि उनने सब दुनीयाहोन खे बन्दी बनयखे एदोम का कुल मे करी दियो अरू भइ का सात करी वाचा को याद नी कऱ्यो. 10 येकालिये मी सोर कि शहरपनाह पर अंगार लगायु, अरू ओकासे ओको किल्लो भी भस्म हुइ जाये."✝

11 यहोवा यो बोलस हइ : "एदोम का बार-बार कऱ्या अपराधहोन का कारण मी ओको दन्ड नी छोड्यु*; क्योंकि ओने अपना भइ खे तलवार लिये हुयो हकाले अरू कुछ भी दया न करी*, पन घुस्सा से उनखे लगातार चिरतो ही ऱ्हे, अरू अपना रोष खे हमेशा का लिये बनाये ऱ्हीये. 12 येकालिये मी तेमान नगर मे अंगार लगायु, अरू ओका से बोस्रा को किल्लो भस्म हुइ जाये."

13 यहोवा यो बोलस हइ : "अम्मोन का बार-बार कऱ्या अपराधहोन का कारण मी ओको दन्ड नी छोड्यु* क्योंकि उनने अपनी सीमा खे बड्य लेन का लिये गिलाद इलाका कि गर्भिणा बइहोन को पेट चीरी डाले. 14 येकालिये मी रब्बा कि बागुड मे अंगार लगायु, अरू ओकासे ओको किल्ला भी भस्म हुइ जाये. उ लडय का दिन मे ललकार हुये, उ हवा धुन्द वरन् भुतडा को दिन हुये; 15 अरू उनको राजो अपना अधिकारीहोन सब गुलामी मे जाये," यहोवा का उइ वचन हइ.✝