1 परमेश्वर यहोवा ने मेखे यो बतायो अरू मी का देखुस हइ कि ओने पिछली घास का उगन का सुरु मे टोटरहोन पैदा करी; अरू उ राजा को पिक काटन का बाद की पिछली घास थी. 2 जब वे जमिन का सब घास खय चुकी, तब मे ने बोल्यो, "हे परमेश्वर यहोवा, माफ कर! नी ते याकूब कसो स्थिर ऱ्ही सखे? उ भोत छोटो हइ!" 3 येका बारे मे यहोवा ने मन बदल्यो, अरू ओने बोल्यो, "असी बात अब नी हुये."

4 परमेश्वर यहोवा ने मेखे यो बतायो अरू का देखुस हइ कि परमेश्वर यहोवा ने अंगार का वजेसे मुकद्दमा लड़न खे बुलायो, अरु अंगार से महासागर सुखी गयो, अरू जमिन भी भस्म होन लगी थी. 5 तब मे ने बोल्यो, "हे परमेश्वर यहोवा, रुखी जा! नी ते याकूब कसो स्थिर ऱ्ही सखे? उ भोत छोटो हइ." 6 येका बारे मे भी यहोवा पछतायो; अरू परमेश्वर यहोवा ने बोल्यो, "असी बात फिर नी हुये."

7 ओने मेखे यो भी बतायो मे ने देख्यो कि प्रभु गोलो लगइखे बनय हुइ कोई दिवाल पर खडो हइ, अरू ओका हाथ मे गोलो हइ. 8 यहोवा ने मरा से बोल्यो, "हे आमोस, तोखे का देख्ये पड़स हइ?" मे ने बोल्यो, "एक गोलो." तब परमेश्वर ने बोल्यो, "देख, मी अपनी जनंता इस्राएल का बीच मे गोलो लगायु. अब मी उनके बिना दण्ड दिये नी छोडु. 9 इसहाक कि उची जगा उजाडी जाये, अरू इस्राएल कि पवित्रजगा खण्डर बनी जाये, अरू मी यारोबाम का घराना पर तलवार खीची हुइ चडय कऱ्यु."

10 तब बेतेल का याजक अमस्याह ने इस्राएल का राजा यारोबाम का पास बुलावो भेज्यो, "आमोस ने इस्राएल का घराना का बीच मे तरा से षडयन्त्र कि बात बोली हइ; ओका पुरो वचनहोन खे देस नी सय सक्यो. 11 क्योंकि आमोस यो बोलस हइ, ‘यारोबाम तलवार से माऱ्यो जाये, अरू इस्राएल का दुनियाहोन के अपना देश से बंन्दी बनयके निकाली दियो जाये.’" 12 तब अमस्याह ने आमोस से बोल्यो, "हे दर्शन देखनआला, यहा से निकली खे यहुदा देश मे भागी जा, अरु वही रोटी खय खे, अरू वही भविष्यव्दाणी कऱ्यो करे; 13 पन बेतेल मे फिर कभी भविष्यव्दाणी नी करनु, क्युकी यो राजा को पवित्रजगा अरु राज-नगर हइ." 14 आमोस ने उत्तर दिखे अमस्याह से बोल्यो, "मी नी ते भविष्यद्वक्ता थो, अरू नी भविष्यद्वक्ता को बेटो; मी तो ठाठ्यो, अरू गुलेर का झाडहोन खे छाटनआलो थो, 15 अरू यहोवा ने मेखे मेडा-बकरिहोन का पीछे पीछे घुमना से बुलय खे बोल्यो, ‘जा, मरी जनंता इस्राएल से भविष्यद्वाणी कर.’ 16 येकालिये अब तू यहोवा को वचन सुन, तू बोलस हइ, ‘इस्राएल का खिलाप भविष्यवाणी मत कर; अरू इसहाक का घराना का खिलाप बार बार वचन मत सुना*.’ 17 येका कारण यहोवा यो बोलस हइ : ‘तरी बय नगर मे वेश्या हुये जाये, अरू तरा बेटा-बेटीहोन तलवार से माऱ्या जाये, अरू तरी जमीन रस्सी डालीखे बाटी ली जाये; अरू तू खुद अशुध्द देस मे मारे, अरु इस्राएल का दुनियाहोन के अपना देश से बंन्दी बनयके निकाली दियो जाये.’ "