1 हाय ओका पर,जो बिछाना पर पड्या हुया बुराइयाहोन कि कल्पना करस अरु दुष्ट करम कि इच्छा करस हइ,अरु बलवन्त होन का कारन भोर को दिन निकलते ही वे ओखे पुरो करस हइ. 2 वे खेतहोन को लालुच करीखे उनखे भी ली लेस हइ; अरु घरहोन को लालुच करीखे उनखे भी ली लेस हइ; अरु ओका घराना समेत अदमी पर, अरु ओका निज भाग समेत कोय अदमी पर धोखो अरु अत्याचार करस हइ. 3 यो कारन, यहोवा यो बोलस हइ, मी यो कुल पर असी विपत्ती डालन पर हइ, जेका निचे से तुम अपनी गर्दन हटय नि सक्ये; नि अपनो माथो उचो करी हुये चली सक्ये; किवकि उ विपत्ती को टेम हुये.स 4 उ टेम पर यो अत्यन्त शोक को गानो दृष्टान्त की रिति पर गायो जाये; "हमारो तो सत्यानाश हुइ गयो; उ मरा दुन्या का भाग खे बिगाडस हइ; हाय, उ ओखे मरासे कत्तो दुर करी देस हइ! उ हमारो खेत धोको देन वाला का हातहोन मे दि देस हइ." 5 यहोवा कि मण्डली मे चिट्टी डालिखे अरु रस्सी से गीनीखे जमिन खे बाटनवालो कोय नी हुये अरु तुम खे जमिन को टुकडो भी नी मिले. 6 भविष्यवक्ता बोलस हइ, "भविष्यवाणी मत करनु. या बात का बारे भविष्यवाणी मत करनु! ताकी हम पर कोय अपमान सहनु नि पडे." 7 हे याकुब का घराना, का यो बोल्यो जाये कि यहोवा कि आत्मा मे धीरज नी हइ? का यो काम ओको कर्यो हुयो हइ? का मरा वचनहोन से ओको भलो नि होइ जो सिधासे चलस हइ? 8 पन कल की बात हइ कि मरी प्रजा दुश्मन बनीखे मरा खिलाप उठी हइ; तुम शांन्त अरु भोला-भाला रस्ता पर चलनवाला का आंग पर से चद्दर छिनी लेस हइ जो लडइ को बिचार नि करस हुये बेधडक चली जास हइ. 9 मरी प्रजा की लुगैनहोन खे तुम उनखे सुखी घरहोन से निकाली देस हइ; अरु उनका छोटा बच्चाहोन से तुम मरी दी हुइ अच्छी चिजहोन खे हमेशा का लिये छुडय लेस हइ. 10 उठो, चल्या जाओ! किवकि या तुमारी आरामजगा नि हइ; येको कारन वा अशुद्दता हइ जो कठीन दु:ख का सात तुमारो नास कर्ये. 11 यदि कोय झुठी आत्मा मे चलता हुया झुठी अरु व्यर्थ बातहोन बोलस अरु बोलस कि मि तुमखे नित्य दाखमधु अरु दारु का लिये प्रचार सुनातो र्हियु, ते उ ये दुन्याहोन को भविष्यदक्ता ठयर्हे. 12 हे याकुब, मि निश्चय तुम सभी खे जमा कर्यु; मि इस्राएल का बचा हुया खे निश्चय जमा कर्यु; अरु कोठा की भेड-बकरीहोन का जसो एक संग रख्यु. वा झुण्ड का सामने जो अछी चरय मे हइ, वे इंसानहोन की बहुतायत का मारे कोलाहाल मचाये. 13 उनका आगे-आगे कोठा खे तोडनआला गया हइ, येकालीये वे भी ओखे तोडी रा हइ, अरु फाटक से हुयखे निकली जय रा हइ; उनको राजो उनका आगे-आगे गयो मनजे यहोवा उनखे रस्ता बतानवालो हुये.