इस्राएल का वजेसे परमेश्वर कि चुगली
1 जो बात यहोवा बोलस हई, ओखे सुनो: उठीखे टेकडीहोन का सामने वादविवाद कर, अरु टेकडी भी तरी सुन्ये 2 हे टेकडीहोन, अरु हे धरती कि हमेशा कि नीव, यहोवा को वादविवाद सुन, किवकि यहोवा कि अपनी प्रजा पर आरोप लगास हइ, अरु उ इस्राएल से वादविवाद करस हइ. 3 "हे मरी प्रजा म ने तरो का बिगाड्यो हइ? मेखे बता कि कोय बात से मे ने तुमखे दु:ख दियो हइ? 4 मि तो तोखे मिस्र देश से निकाली लि आयो, अरु गुलामी का घर मे से तोखे छुडय लायो; अरु तरी अगुवाइ करन खे मूसा, हारुन अरु मिर्याम खे भेजी दियो.6:4 निर्गमन 4:10-16; 12:50-51; 15:20 5 हे मरि प्रजा याद कर, कि मोआब को राजो बालाक ने तरा खिलाप कोन सी युक्ती करि, अरु बोर को बेटो बिलाम ने ओखे का राय दि, अरु शित्तीम से गिलगाल तक की बातहोन खे याद कर, जेकासे तु यहोवा का अच्छा काम खे समझी सक्ये."
परमेश्वर का चाहस हइ
6 "मि का लिखे यहोवा का सामने अउ, अरु उपर ऱ्हेनवाला परमेश्वर का सामने झुकु? का मि होमबली का लिये एक साल का बछडा लिखे ओका सामने अउ? 7 का यहोवा हजारो मेढा मे से, यहा जैतुन का तेल कि लाखो नद्दीहोन से प्रसन्न हुये? का मी अपनो अपराध का प्रायश्चित मे अपनो पहला बेटा का अपना पाप का बदला मे अपना जन्माए हुये कोय खे दिउ?" 8 हे इन्सान, उ तोखे बतय चुक्यो हइ कि अछो का हइ; अरु यहोवा तरा से येखे छोड अरु का चाहस हइ, कि तु न्याय से काम कर्ये, अरु कृपा से प्रिति रख्ये, अरु अपना परमेश्वर का सात नम्रता से चल्ये? 9 यहोवा को बोल यरुशलेम नगर खे बुलय री हइ, डिमाकआलो इन्सान यहोवा का नाम को डर मानस हइ : येकालिये सजा कि बातहोन पर ध्यान दे जेका पास दण्ड देन को अधिकार हइ! 10 का अब तक दूष्ट का घर मे दुष्टता से पायो हुयो धन अरु छोटो माप गलत नि हइ? 11 का मि कपट को तराजु अरु अपनी थैली मे तराजु गोटा रखनवाला खे लिखे पवित्र ठय्रु सकस हइ? 12 तरा धनवान दुनिया अत्याचार करस हइ; अरु तरा निवासी झुट बोलस हइ अरु उनकी जीब धोको देनवाली बात करस हइ. 13 यो कारन मि तोखे मारते मारते भोत हि घायल करुस हइ, अरु तरा पाप होन का कारन तोखे खे उजाडी दियु. 14 तु खाये, पर तृप्त नि हुये, तरो पेट हमेशा खाली ही ऱ्हिये: अरु तु अपनी सम्मती लिखे चल्ये, पन नि बचय सक्ये, अरु जो कुछ तु बचय भी लिये, ओखे मी तलवार चलयखे लिटवय दियु. 15 तु बोऐ, पन लग्ये नि : तु जैतुन को तेल निकाल्ये, पन लगाये नि पाये : अरु अंगूर खुन्दे, पन दाखमधु पिनो नि पाये. 16 किवकी वे ओम्री का विधिहोन पर अरु अहाब का घराना का सब कामहोन पर चलता र्हिये : अरु तुम उनकी युक्तिहोन का जसो चलस हइ : येकालिये मि तोखे उजाडी दियु, यो नगर मे र्हेनवाला दुनिया तुमारी मजाक उडाये, अरु तुम मरि प्रजा कि निन्दा सह्ये.6:16 1 राजे 16:23-34; 21:25-26