1 अब हे भोत दलहोन कि नगरी, दल बांधी बाधीखे जमा हुये किवकि ओने हम दुन्या खे घेरी लियो हइ; वे इस्राएल का न्यायी का गालपर सोटा मार्ये.
बैतलहम से एक राजा को आन कि वादा
2 हे एप्राता बैतलहम, यदी तु असो छोटो हइ कि यहुदा का हजारो मे गिन्या नि जाता, ते भी तरा मे से मरा लिये एक अदमी निकल्ये, जो इस्राएलिहोन मे राज करनवालो हुये; अरु उनको निकलनो प्राचीनकाल से, वरन अनादिकाल से होतो आयो हइ.5:2 मत्ती 2:6; यहून्ना 7:42 3 या कारन उ उनखे वा टेम तक छोड्यो र्हिये, जब तक पेटसे बइ बच्चा पैदा नि करे; तब इस्राएलिहोन का पास ओका बच्या हुया भैइ लोटीखे उनसे मिली जाये. 4 अरु उ खडो हुयखे यहोवा कि दि हुई शक्ती से, अरु अपना परमेश्वर यहोवा का नाम का प्रताप से, उनकी चरवाही कर्ये. अरु वे सुरक्षित र्हिये, किवकी अब उ धरती का छोर तक महान ठयर्हे.
छुटकारो अरु दण्ड
5 अरु उ शान्ति को मुल हुये, जब अश्शुरी सेना हमारा देश पर चढाई कर्ये, अरु हमारा राज भवन मे पाय रख्ये, तब हम उनका खिलाप सात चरवाहे वरन आठ प्रधान इन्सान खडा करे. 6 अरु वे अश्शुर का देश को वरन प्रवेश का जगाहोन तक निम्रोद का देश खे तलवार चलयखे मारि लिये; अरु जब अश्शुरी दुन्या हमारा देश मे आये, अरु ओकी सिमा का अंदर पाय रख्ये तब उ इन्सान हम खे उनसे बचाए.5:6 उत्पत्ति 10:8-11 7 तब याकुब का बच्या हुया दुन्या भोत राज्यहोन का बीच असो काम दिये, जसो यहोवा का तरप से पडनवाली ओस,अरु घास पर की वर्षा,जो कोय का लिये नि ठयर्हे अरु इंसानहोन कि बाट नि जोहती. 8 अरु याकुब का बच्या हुया दुन्या राजहोन मे अरु देश देश का दुन्या का बीच असो हुये जसो जंगल का जगली जनवरहोन मे सेर, या भेड-बकरीहोन का झुण्डहोन मे जवान शेर होस हइ, किवकी जब उ उनका बीच मे से जाए, ते खुन्दते अरु फाडतो जाये, अरु कोय बच्यो नि सक्ये. 9 तरो हात तरा विरोधीहोन पर पड्ये, अरु तरा सब दुश्मन नष्ट हुई जाये. 10 यहोवा कि या बोली हइ वा टेम मे तरा घोडा का तरा बिच मे से नाश कर्यु अरु तरो रथहोन को विनाश कर्यु. 11 मी तरा देश का नगरहोन खे भी नष्ट कर्यु, अरु तरा किलाहोन खे गिरय दियु. 12 मी तुमारा जादु-टोना खे खतम करी दियु, अरु तरा यहा भविष्य कि बात बतानवाला जिन्दा नी ऱ्हिये. 13 अरु मी तुमारी मुर्तीहोन अरु तुमारा बिच से तुमारा पुजा का पत्थरहोन खे खतम कऱ्यु अरु तुम फिर कभी अपना हात से बनय हुइ सामनहोन की आराधना नी करी पाये. 14 अरु मि तरी अशेरा नामक मुर्तीहोन खे तरी जमिन मे से उखाड डाल्यु, अरु तरा नगरहोन को विनाश कर्यु. 15 अरु मि राज-राज से जो मरो बोल्यो नि मानती, उनका से मी भयंकर घुस्सा का सात बदलो लियु.