मीका 3

मीका का वजेसे इस्राएलहोन का अगुवाहोन कि निंदा

1 मेने बोल्यो : हे याकुब का प्रधानहोन, हे इस्राएल का घराना का न्यायियोहोन, सुनो! का न्याय को भेद जान नो तुमारो काम नि? 2 तुम तो भलइ से बुरो, अरु बुराइ से प्रेम रखस हइ, मानो, तुम दुन्या पर से उनकी खाल उधडी लेस,अरु उनकी हड्डीहोन पर से उनको मास निकाली लेस हइ; 3 अतना ही नी वरन तुम मरा दुन्या को मास खय भी लेता, अरु उनकी खाल उधडस हइ; तुम उनकी हड्डिहोन खे हन्डी मे बनान का लिये तोडी डालस अरु उनको मास हण्डा मे बनान का लिये टुकडा-टुकडा करस हइ. 4 वे वा टेम यहोवा की दुहाई दिये, पन उ उनकी नि सुनणको, वरन वा टेम उ उनका बुरा कामहोन का कारण उनसे मुन्डो फिरय लिये. 5 यहोवा को यो वचन हइ कि जो भविष्यद्वक्ता मरी प्रजा खे भटकय देस हइ, अरु जब उनखे खान खे मिलस हइ तब "शान्ति कि घोषना करस हइ" अरु यदि कोय उनखे मुंडा मे कुछ नि दे, ते ओका खिलाप झगडो करन खे तैयार हुइ जास हइ. 6 या कारन तुम पर असी रात आये, कि तुम खे दर्शन नि मिलनको, अरु तुम असा अंधकार मे पड्ये कि भविष्य कि बात नी बतय सक्ये. भविष्यव्दक्ताहोन का लिये सुर्य अस्त हुये, अरु दिन र्हेते उन पर अधियारो छय जाये. 7 दर्शन देखनवाला, अरु भविष्य बोलनवाला को मुन्डो कालो हुये; अरु वे सब का सब अपना मुडा खे येका लिये झाकनु की परमेश्वर का तरप से उत्तर नि मिले. 8 पन मी तो यहोवा की आत्मा से शक्ती, न्याय अरु ताकत पयखे परिपुर्न हइ कि मी याकुब खे ओको अपराध अरु इस्राएल खे ओको पाप जतय सक्यु. 9 हे याकुब का घराना का प्रधानहोन, हे इस्राएल का घराना का न्यायियोहोन, हे न्याय से घुस्सा करनवाला अरु सब सीधी बात खे टेढी-मेढी करनवाला, या बात सुनो, 10 तुम सिय्योन शहर कि हत्या करिखे अरु यरुशलेम कि कुटिलता करीखे मजबुत करस हइ. 11 उनको प्रधान घुस लि लिखे बिचार कर्ये, अरु याजक दाम लि लिखे व्यवस्था कि बात सिखास हइ, अरु भविष्यव्दक्ता रुपया का लिये भविष्य बोलस हइ; ते भी वे यो बोलीखे यहोवा पर भरोसो रखस हइ,"यहोवा हमारा बिच मे हइ, येकालिये कोय विपत्ती हम पर नि आनकी." 12 येकालिये तुमारा कारन सिय्योन जोतीखे खेत बनायो जाये, अरु यरुशलेम खण्डरहोन को ढेर हुइ जाये, अरु जो सीनै टेकडी पर परमेश्वर को भवन बन्यो हइ ,उ उचो स्थान सो हुइ जाये.✝3:12 यिर्मया 26:18