2 Coríntios 11

Paʉlo nɨ Itʉmi aʉteele

1 Bahu aza mʉgimye iniino, palʉng’wɨ nɨ kɨna nɨmʉpʉngʉ. Mʉgimye iniino. 2 Nʉmʉkee ikʉlʉ, ingɨ ʉkeli wane ʉpumile kʉng’wi Itunda, ndogoelyo ʉnyenye mɨhanga mʉnanso nʉwakɨlɨ kʉmanya mitʉnja, nʉnene nʉmʉlongeeye mʉgoha ʉng’wɨ du ingɨ Kilisito. 3 Ingɨ nogopile kɨna, anga ɨnzoka kʉ ʉhʉgu wakwe ɨkamʉkongela ʉ Hawa, masɨgo anyu ahumile kʉpɨʉlwa, maleka ʉhʉɨɨli wanyu nʉwa tai kʉng’wa Kilisito. 4 Ndogoelyo mʉntʉ wɨhi anga waze wamʉtanantye mpola yang’wa Yesʉ nʉ wɨsa nʉyʉ nɨkʉmʉtanantilye, ʉnyenye mʉkʉsɨngɨɨlya kʉ mɨkono ɨbɨɨlɨ. Hangɨ mʉmʉgombile Ng’wahʉ Ng’welʉ wɨsa nʉyo naɨkʉmʉtanantɨɨye ang’wɨ mpola yisa ni Nkani Nza naɨkʉmʉtanantɨɨye ʉnyenye.

5 Shanga nsɨgile kɨna ʉnene nɨmʉniino kʉkɨla "itʉmi nɨakʉlʉ." 6 Palʉng’wɨ nɨ kɨna shanga nihumile kʉtambʉla kɨsa, ingɨ nɨngile makani ɨdʉ, ikani ɨlɨ kalɨɨka kɨhenga kʉng’wanyu, matungo ɨhi hangɨ kʉnzɨla yɨhi.

7 Ʉnene aɨntanantilye kʉng’wanyu Nkani Nza nɨyang’wi Itunda shanga mpegwe kɨnyamʉlɨmo kɨhi, aɨnɨninompilye ʉnyenye mʉhume kʉkʉligwa. Itɨɨ, aɨntendile ʉbɨɨ ne? 8 Naɨkʉmitʉmɨla ʉnyenye mʉlɨmo, anɨsɨngɨɨlya mpia kʉpuma milʉndo ʉngɨɨza nʉwa antʉ nɨamʉhʉɨɨe ʉ Kilisito. Aɨyihanga kʉahegelya maintʉao nihume kʉmʉaɨɨlya ʉnyenye. 9 Ʉnene naɨkɨpalʉng’wɨ nʉnyenye apo naɨntakile mpia shanga aɨnɨmʉnyoma mʉntʉ wɨhi, ahʉɨɨli ɨanyu kʉpuma kʉ Makedonia ɨndetela maintʉ ɨhi nɨndoilwe. Aɨnɨmʉkendegeli nangalu ndeke kʉmʉlemeelya kʉmpyani ɨhi, hangɨ kʉlongoleka kʉtulaʉʉ. 10 Kʉtilɨ anga mʉntʉ mʉ kɨsalɨ ka Akaya nʉhumile kʉngilya kikʉlya kikani nɨlanso, ntambʉe itɨ kʉnsoko atai ang’wa Kilisito nɨmolɨ mʉng’wane. 11 Nɨkɨ kʉtambula itɨ, Itɨɨ kʉnsoko shanga nʉmʉloilwene ʉnyenye? Itunda ʉlɨngile kina nʉmʉloilwe.

12 Kʉlongoleka kitʉma anga nɨkitʉma itungo ɨlɨ, ingɨ ndeke kʉapa lyoma awo nɨakʉduma nkikʉlya kɨna agwe akituma mʉlɨmo anga ʉsese. 13 Ndogoelyo, antʉ nɨanso ingɨ itʉmi aʉteele, nɨɨkongela mʉlɨmo wao nʉkisania kɨna nɨanso itʉmi atai nɨang’wa Kilisito. 14 Mʉleke kʉkʉɨlwa kʉng’witʉ. Kʉnsoko shetani nʉyo witendisa kɨna nʉng’wenso malaɨka nʉwa nzelya. 15 Kʉlʉlo shanga ikani nʉlakʉkʉɨlwa anga ɨtule nɨ itʉmi akwe nɨanso akisanya kɨna itʉmi nɨagombekile pang’wi Itunda. Mpeloao akʉpantika anga nɨatendile.

Lwago nʉla Mitʉmi Paʉlo

16 Kʉtambʉla hangɨ mʉntʉ wɨhi waleke kʉmona kɨna nɨmʉpʉngʉ. Ingɨ anga mʉmone itɨ, ʉʉgwa, nɨhoeeli anga nɨmʉpʉngʉ ingɨ nʉnene mpantɨke kaniino nikakiketela. 17 Makani akikʉlya nɨkʉmatambʉla itungo ɨlɨ shanga apumile kʉng’wi Isekʉlʉ, ingɨ ingɨ ikani nɨlanso lɨlo kiloelya, kʉtambʉla anga mʉntʉ nɨ mʉpʉngʉ. 18 Kʉlʉlo antʉ ɨdʉ ikʉlya kʉmpyani akɨʉntʉ, nʉnene ga kikʉlya. 19 Ʉnyenye mʉkete mahala, yɨyo nsoko mɨgimya ʉʉpʉngʉ nɨakʉtenda antʉ. 20 Mɨgimya nʉ mʉntʉ ga nʉwɨmʉtenda ʉnyenye mɨatʉʉng’wa, nʉ mʉntʉ nʉwɨmʉhegelya maintʉ anyu nʉ mʉntʉ nɨɨlɨla kʉ mɨgongo a antʉ nʉ mʉntʉ nʉwikʉlya nʉ mʉntʉ nʉwɨmʉtʉkɨla! 21 Nihumilwe mɨnyala kʉlʉnga kɨna ʉsese aɨkɨagila ngulu kitʉma makani aya.

Anga ɨze ʉkolɨ mʉntʉ wɨhi nʉʉkʉgema kikʉɨɨlya, nʉnene ga kʉgema kikʉlya, ingɨ kʉtambʉla anga mʉntʉ nʉmʉpʉngʉ. 22 Itɨɨ, nɨanso Aebulania ne? Nʉnene ga nɨ Mʉebulania. Itɨɨ, nɨanso Aisilaeli ne? Nʉnene ga nɨ Mʉisilaeli. Nɨanso a wileli wang’wa Ibulahimʉ ne? Nʉnene ga nɨ wileli wang’wa Ibulahimʉ. 23 Nɨanso anyamʉlɨmo ang’wa Kilisito ne? Nʉnene ga nɨ mitʉmi ang’wa Kilisito. itungo ɨlɨ ntambʉle anga kɨmonyele, ʉnene nɨ mitʉmi wang’wa Kilisito kʉkɨla nɨanso. Ʉnene nitʉmile mʉlɨmo ʉkaku nangalu, nikae migeleza nkʉa yɨdʉ tai, nkʉilwe nkʉa yidʉ tai hangɨ nkʉa yidʉ nahimile ʉlʉngʉ kʉkɨla nɨanso. 24 Nkʉa itaano nkʉilwe nkotya makʉmi ataatʉ na kenda nɨ Ayahudi. 25 Aɨnkʉilwe mɨlanga kataatʉ nɨ Alumi, aɨnkʉilwe magwe kang’wɨ, aɨmbunɨkɨwe nɨmeli kataatʉ mʉlʉzɨ, mʉng’wanso mʉlʉzɨ nɨkelya ʉtikʉ nʉ ngʉng’wɨ. 26 Mʉmɨhɨnzo ane nkʉa yidʉ mponee ʉneneaʉ kʉtalwa nɨ mazɨ, mponee ʉneneaʉ kʉbʉlagwa nɨa abʉlagani, nagigwe nɨ Ayahudi ɨane, nagigwe nɨ antʉ nɨshanga Ayahudi, nagigwe mʉwɨɨ nʉ mʉkɨsalɨ, lwago nʉla mʉlʉzɨ nʉlʉkʉlʉ, nagigwe nɨantʉ nɨakitendisa kɨna amʉhʉɨɨe ʉ Kilisito. 27 Nitʉmile mɨlɨmo nʉkaga, nkʉa yɨdʉ shanga nkɨɨwe ʉtʉlo, nahumilwe ɨnzala nɨ nyota, nkʉa yɨdʉ aɨmbʉiye indya nʉkishiɨ mʉmpepo ɨze nɨmʉgila myenda akikɨngɨsɨɨlya nɨ mpepo. 28 Hangɨ, kʉleka makani maʉya nɨdʉ, mahikʉ ɨhi aɨnɨkendaasɨga milʉndo nʉwa antʉ ɨhi nɨamʉhʉɨɨe ʉ Kilisito. 29 Anga ɨze mʉntʉ wɨhi mʉgila anga ngulu, nʉnene ga kiona nɨmʉgila anga ngulu, anga mʉntʉ wɨhi wasakigwe kitʉma mʉlandʉ, ʉnene nɨbɨpɨlwa nangalu.

30 Anga insinje kikʉlya, itɨgwa, kikʉlya naʉʉgila ngulu wane. 31 Itunda hangɨ Tata wang’wi Isekʉlʉ witʉ Yesʉ, nʉtakɨwe kʉkʉligwa ɨkalɨ na kalɨ, ng’wenso ʉlɨngile kɨna shanga kʉtambʉla ʉteele. 32 Naɨnkolɨ kʉ Damesiki, mʉkʉlʉ nʉwa kɨsalɨ, naɨmʉhemba wamʉtemi Aleta, aɨwɨlindɨɨla mʉmpita nʉwa kɨsalɨ ingɨ ahume kʉmamba. 33 Ingɨ, nɨkasɨmɨɨligwa mʉ kɨsela kɨkʉlʉ kʉkɨɨla lyoma naɨlɨkolɨ mikiligo, kʉlʉlo nɨkamʉtigana.