1 Ʉnyenye ingɨ mɨana akwe nʉmuloilwe, kʉlʉlo kagupi kishiɨ anga ng’wenso. 2 Milowe anga ʉ Kilisito naɨʉkʉloilwe ʉsese, wɨkipumya kʉnsoko itʉ watule isongelyo nipolyo nɨlɨkete ʉnyunkɨɨlyo ʉza nʉʉmʉloeeye Itunda.

3 Ʉnyenye mɨantʉ ang’wi Itunda, kʉlʉlo makani a ʉsambo nʉ ʉdosi nɨ nsʉla aʉgoolyi shanga atakɨwe kʉlapwa mʉng’wanyu. 4 Hangɨ nkani nɨya mɨnyala nɨ nikani niya ʉpʉngʉ ang’wɨ nkani niya nsasɨla, nkani nianso shanga yinonee mʉng’wanyu. Ingɨ nkani niya kʉmʉlʉmba Itunda zizo yinonee mʉng’wanyu. 5 Manyi lʉkʉlʉ kɨna mʉsambo wɨhi ang’wɨ mʉgoolyi wɨhi ang’wɨ mʉdosi wɨhi, mʉntʉ nʉwitʉma makani nanso shanga ʉkʉlija kɨntʉ kɨhi mʉ ʉtemi wang’wa Kilisito ni Itunda. Mʉntʉ nʉwanso ingɨ mʉkʉlya adʉdʉ.

6 Leki kʉmʉgombyi mʉntʉ wɨhi wamʉkonge kʉ nkani niya kɨpʉngʉ, kʉnsoko makani anga nanso Itunda wɨatakɨɨla antʉ nɨagila lwijo. 7 Kʉlʉlo temanʉki nɨ antʉ nɨanso. 8 Pakalɨ ʉnyenye aɨmʉkolɨ mʉkiti shanga aɨmʉmʉmanyile Itunda nʉwa tai, kʉʉkamɨnkani ni Isekʉlʉ maile mɨana akwe mʉkolɨ mʉ nzelya. Kʉlʉlo mishiɨ mʉnzelya anga mʉloewe Itunda. 9 Kʉlʉlo nzelya ɨleta ʉkende nʉ kishiɨ likalo nʉlʉgombekile kʉng’wi Itunda nɨ tai. 10 Mʉgeme kʉduma makani namʉloeelya Isekʉlʉ. 11 Temanʉki nɨ makani nɨshanga anonee nitʉng’wa nɨantʉ nɨakolɨ mʉkiti, ingɨ atambʉɨli antʉ kɨna makani nanso shanga maza. 12 Makani niitʉng’wa kʉ ʉnkunku ingɨ mɨnyala kʉmatambʉla. 13 Ingɨ ɨkumʉka anga apihʉʉwe nɨnzelya. 14 Kʉnsoko maintʉ ɨhi nakumʉʉwe ɨkaɨlwa nʉkʉtula nzelya. Kʉnsoko yitambʉlwa,

"Pɨtya, ʉewe nʉlae,

wiʉke kʉashi,

Kilisito nʉng’wenso ʉkʉalɨkɨla."

15 Itɨ gwa ikendegeeli mʉlikalo lanyu nɨmishiɨ. Ishii anga antʉ nɨakete mahala, shanga anga antʉ nɨapʉngʉ. 16 Kʉlʉnga kɨna tʉmɨli kɨsa lyoma nɨmʉkete, kʉnsoko matungo aya ingɨ aʉbɨ. 17 Kʉlʉlo mʉlikalo lanyu mʉleke kʉtula mɨapʉngʉ, Mʉgeme kʉduma makani nɨmʉloeelya Isekʉlʉ.

18 Mʉleke kʉgala ntʉlɨ, nɨkʉlimɨlya likalo lanyu, ingɨ mʉteg’we nʉ Ng’wahʉ Ng’welʉ. 19 Mitambʉlye ʉnyenye kʉ mɨmbo a Zabuli nɨ mɨmbo akʉkʉlya nɨ mɨmbo maʉya natongilwe nʉ Ng’wahʉ Ng’welʉ, mɨmbɨli nʉ kʉmʉkʉlya Isekʉlʉ kʉ nkolo yanyu. 20 Mʉlʉmbi Itunda Tata mʉnkani yɨhi kʉkɨɨla lina lang’wi Isekʉlʉ witʉ Yesʉ Kilisito.

21 Mʉntʉ wɨhi wamʉkʉlye mʉya kʉnsoko a ikʉlyo nɨmʉkete kʉng’wa Kilisito.

22 Mʉkɨma nʉwatule nʉ lwijo kʉ mʉgohakwe anga kʉtʉla nʉ ʉlwijo kʉng’wi Isekʉlʉ. 23 Kʉnsoko ʉmʉgoha ʉkete ʉhumi kʉ mʉkɨmakwe, anga ʉ Kilisito nɨɨza ʉkete ʉhumi kʉ antʉ nɨamʉhʉɨɨe, hangɨ ʉ Kilisito ng’wenso ʉakomoe antʉ nɨamʉhʉɨɨe, nɨɨza mʉɨlɨ wakwe. 24 Anga antʉ nɨamʉhʉɨɨe ʉ Kilisito nɨakete ʉlwijo kʉng’wa Kilisito, ʉʉgwa nɨakɨma atakɨwe atule lwijo kʉ agohaao mʉ makani ɨhi.

25 Ʉnyenye agoha, alowi akɨma anyu, anga ʉ Kilisito nɨɨza ʉaloilwe antʉ nɨamʉhʉɨɨe ʉng’wenso wɨkipumya washe kʉnsokoao. 26 Aɨʉkule wahume kʉatenda agombeke kʉng’wi Itunda kʉ lʉkani lakwe, naɨwakondya kʉelisa kʉoja na mazɨ akʉbadisilya, 27 wahume kʉlija antʉ nɨamʉhʉɨɨe ʉ Kilisito nɨakomilwe kʉnsoko ang’wi Itunda hangɨ nɨagila igazo lɨhi ang’wɨ kɨntʉ kɨhi nɨkɨbɨ mʉng’wakwe. 28 Itɨ gwa agoha atakɨwe alowe akɨmaao anga mɨɨlɨao. Mʉgoha wɨhi nʉmʉloilwe mʉkɨma wakwe wilolwa ʉng’wenso. 29 Kʉtilɨ mʉntʉ wɨhi nʉʉbɨpɨwe ʉmʉɨlɨ nʉwakwe ng’wenso, ingɨ wɨʉlɨsa nʉkʉʉsʉnja, anga ʉ Kilisito wɨalɨsa nʉkʉasʉnja kʉ antʉ nɨamʉhʉɨɨe ʉng’wenso. 30 Kʉnsoko ʉsese kɨmapiliga mʉmʉɨlɨ wakwe. 31 Wandɨkwa wang’wi Itunda wandɨkile kɨna, "Mʉgoha ʉkʉmʉleka ihe nʉ nyinya, nʉyo ʉkʉkʉɨla nʉ mʉkɨmakwe antʉ awa nɨabɨɨlɨ akʉtula mʉɨlɨ ʉng’wɨ." 32 Ʉnkunku ʉwʉ ingɨ ʉkʉlʉ, ingɨ ʉnene kʉtambʉla mpola yang’wa Kilisito nɨ antʉ nɨamʉhʉɨɨe ʉng’wenso. 33 Nɨitɨ ga, mʉgoha wɨhi mʉng’wanyu ʉtakɨwe wamʉlowe mʉkɨma wakwe anga nʉwiloilwe, mʉkɨma nʉyo watule nʉ lwijo kʉ mʉgoha wakwe.