1 w ture enuθlay f elmwaheb n erruwH εlexaTer elγisexc eθkuwnem δ ejjuhhal. 2 tessenem elli max i θkanem tεebδem g leSnam, tkanem ettemgewweδem s leSnam elli eldukkanec. 3 emmale exse exenfehme elli yδukke s erruwH n erreb nette liδukkiyc s eccer f yesuwε, w elyetged Hed e yecheδ elli yesuwε δ seyyedne kan s erruwH n elqudus. 4 ellaneθ egget δ elmwaheb, emme erruwH elli ettučiyneθ netteθ biyδhe. 5 elxeδmeθ δ lenwaε, emme seyyedne iyjen. 6 w elεmayel δ lenwaε, emme erreb elli yθeg kul ciy g elkul nette iyjen. 7 g kul iyjen erruwH eθbeyyen δiys y elxiyr n elkul. 8 iyjen yθawi seg erruwH edwi n elHikmeθ, w wissen yθawi seg erruwH biδhe edwi n elmeεrfeθ, 9 w erruwH icθ aθuc eliman y iyjen w elmuhbeθ n eδawi y wissen, 10 w wissen e syuc elquwweθ y age n elmuεjzaθ, w wissen ennubuwweθ, w wissen emiyyez jar lerwaH. w wissen esyuc elquδreθ f edwi s elluγaθ ettimeθnewεin, w wissen eterjem n edwiye. 11 wah elkul etteg δiys erruwH icθ biyδhe, w ettuč elmwaheb emmax i θexs y kul iyjen.

12 emmax elbδen iyjen w γers egget δ leĎraf, siyn elmesiyH zade, reγm elli γers leĎraf egget emme nette iyjen. 13 w nečin elkul uδayen ziyγ elli muc δ uδayen, d ixδiymen ziyγ δ iHurriyyen, nemγeTTes s erruwH iyjen bac e neδwel elbδen iyjen, w nerwe seg erruwH iyjen. 14 elbδen muc eTTerf iyjen emme leĎraf egget. 15 w lukan ayen ekraε: "neč muc δ afus, emmale neč muc seg elbδen." endre e yeδwel b elHeq muc seg elbδen? 16 w max aθen temedjiyθ: "neč muc δ TiT, neč muc seg elbδen", endre e yeδwel b elHeq muc seg elbδen? 17 w lukan elbδen elkulle δ TiT, max δ nsel? w lukan elkulle δ temedjiyθ, max δ ncum? 18 emme erreb yneĎĎem g elbδen kul eTTerf emmax i yexs. 19 w lukan elkulle δ eTTerf iyjen, max δ eykuwn? 20 yemenni leĎraf egget emme elbδen iyjen. 21 emmale etgedc TiT aθen y ifessen "meHejtiyc essiywem", w yetgedc iyxef aθen y ikreεεen "meHejtiyc essiywem". 22 w belεeks elli eθnetteεlak eDεef Haje g elbδen, nette ehem Haje. 23 w elli netteεlaki muc muhem, nettelhe essis belgde, w elli netteθHeccam essis, nettelhe essis exθer. 24 emme elli netteθHeccimc essis, ettesθHeqc ellehweθe elkul. emme erreb yexleq elbδen yuc elqiymeθ y eTTerf elli elqiymeθes eqel, 25 bac e lyetSarc g elbδen ezuwni, emme bac e ttelHan leĎraf s beεDhum. 26 w max e yesθajeε eTTerf, e sθejεen iyδes leĎraf iddiyn, w max e yemkerrem eTTerf e sefrHen leĎraf iddiyn.

27 xenyum elbδen n elmesiyH, w kul iyjen essiywem δ eTTerf δiys. 28 w kul iyjen yHuTTi erreb g elblesθes g elkeniyseθ: imersal iglewlen, w lenbye eθθanyen, imuεelmen eθθelθen. w beεδensen elli θegen elmuεjzaθ, w beεεeδ elli γersen elmwaheb n ecfe, d ettelhe s iddiyn, ziyγ δ eδebber ziyγ d edwi s elluγaθ ettimeθnewεin. 29 endre elkul δ imersal? elkul δ lenbye? elkul δ imuεelmen? elkul tegen elmuεjzaθ? 30 w elkul γersen elmwaheb n ecfe? endre elkul dukken s elluγaθ ettimeθnewεin? endre elkul etterjmen? 31 yemenni Hewmeθ bac eθewyem elmwaheb θibehhayin, w neč exensexne ebriδ ebehhay.