1 w neč, max i ddusiyγ, ey ewmaθen bac e xenbecre elγayeθ yeHrezθ w yuceyenexθi, ellesθeεmlexc edwi n enneHw ziyγ elHekmeθ. 2 yemenni qerrere δ etwe kul ciy w neč jerawem, kan δ yesuwε elmesiyH d temettentes f eSSeliyb. 3 w max i ddusiγ tweliwwem kane Dεiyf w xayef w δ emerεuwb egget. 4 w max i kane δukkiγawem w etbecre δiywem, ellesθeεmlexc elHekmeθ d eqnaε, emme erruwH n erreb tessexen imenes s elqewθes. 5 w weδiyn bac e ybed elimenewwem f elquwweθ n erreb, muc f elHekmeθ n elbecer.

6 w reγm wah elkul, ndukke s elHekmeθ δ elbullaγ. emme elHekmeθe muc seg eddunyeθe, w la seg elquyyeδes elli fanyiyn. 7 emme elHekmeθ n erreb elli θkan temmeHrez f leεbaδ, w yHeDDert erreb seg qebl n elbdu n eddunyeθ y elmejδenne. 8 w etyessin Hed seg elquyyaδ n eddunyeθe, εlexaTer lukan esnenteθ elkenenc Sleben erreb n elmejδ. 9 nečin nHekke f elHekmeθ yeqqar felles elxθab: "elHajaθ entezriyc TiT, w entesliyc θemedjiyθ, w etteseδc f elbal n elεebδ, w yHeDDert erreb y elli exsenti". 10 emme yekcfenext y nečin s erruHes. εlexaTer erruwH n rebbi tessen kul ciy Hette δ elleγ n kul ciy n rebbi. 11 δ wiyn isnen elli g erruwH n elεebδ kan δ elεebδ biyδe. w zade erruwH n erreb netteθ elli θessen efekker n erreb. 12 w nečin enniwic erruwH n elεalem, emme erruwH elli seg erreb, bac e nessen elHajaθ elli yuceyenext rebbi blac. 13 usinc enuθlay s edwi eθneqre seg erruwH elqudus, w muc seg elHekmeθ n leεbaδ. usinc enfesser elHajaθ n erruwH s edwi tesseqraθi erruwH. 14 emme emmis n eddunyeθ, liqebbelc elHajaθ elli seg erruwH n erreb, εlexaTer yHesseb δiys δ elγbaweθ, w nette elyetgedc etyefhem, εlexaTer yelzem eykuwn δiys erruwH n erreb bac e tyefhem. 15 emme elli δiys erruwH n erreb eyged eyeHkem g kul ciy, w eliHekkem δiys Hette Hed. 16 (w elxθab yeqqar:) "εlexaTer elli yessen efekker n erreb edj e θyefhem." emme nečin γenne efekker n elmesiyH.