1 yelzem exenneHsben leεbaδ δ ixeddamen n elmesiyH w δ iwxiylen f lesrar n erreb. 2 w elli eyemmeĎleb seg iwxiylen, yelzem emmefen δ eθθiyqeθ εerfinsen. 3 emme neč, eyyethemc eyeθHesbem xenyum ziyγ δ timeHkemt n leεbaδ. neč zade etHesibexc imeniyw. 4 ennefsiyw eyyetlumc f Hette ciy, wah muc meεnahe elli neč bhiyγ, emme erreb nette elli eyHaseb. 5 emmale eθeHkmemc qebl as n eleHsab, qebl n elli edyes elmesiyH. nette δ ybiyyen elli yemmeHrez g eθsellesθ, usinc e ybiyyen elli g ulawen. elweqθes eyawi kul iyjen elli yelzem eyemmemdeH essis seg erreb.

6 w neč ey ewmaθen, djiyγ imeniyw d ebulluws δ elmθel n elHeqe eθeθεelmem s γenne, usinc eθeθεelmem belgde w ettefγemc f elli yemmeri, w kul iyjen elyetteθfuxerc w elyetteθHezzebc g eDDed n elbaqi. 7 δ wiyn i ximeyyez f elγirex? elli γerx elkul yuceyexθi erreb. w max i ttiwyeδ, ymat etteθfuxareδ emmax ettiwiyyec?

8 etteθfuxarem elli xenyum tecbeεem tesθeγnam teδwlem δ lemluwk blac nečin! w yelitkum θkanem δ lemluwk b elHeq, w iδekan xenyum eθeδlem b elHeq δ lemluwk, e nemcarex jmiyε g elmelx! 9 yeδhurli elli erreb yedjeyane nečin imersal g ellexxer m elli yemmeHkem fellasen s enγe, εlexaTer neδwel δ elmenDer y leεbaδ elkul g elεalem d elmlayxe. 10 nečin δ imSetken f elxaĎer n elmesiyH, emme xenyum δ elεuqal g elmesiyH. nečin δ iDεiyfen, emme xenyum teqwam. xenyum temkermem, w nečin nemmeHqer. zeεme belHeq! 11 el ture, nečin netεane elaz d efaδ d elεre d eDDerb d elhemleθ. 12 nteεεeb w nxeddem s ifesnenne bac e nawi ečenne. enemsub usinc e nbarex. enemmeDlem usinc e neθHemmel 13 enemsub usinc e nuθlay s esyaseθ. el asse, nečin m elfeDleθ n leεbaδ, w m elwsex n eddunyeθ.

14 neč δukkiyγ sah muc bac e xenHecme emme bac e exennenSHe, xenyum m idreriyw elli exsexθen. 15 yumken γerwem εecre elaf murced g ebriδ n elmesiyH, emme elγerwemc egget elweldiyn! εlexaTer δ neč elli iruγawem g eliman s elmesiyH yesuwε w δ neč beccerγawem s elbcareθ. 16 heδakeεlac exenmelge e yθeθbεem. 17 w wah eyendeγ esbeb elli yedjayi exennezne memmi eθθiyqeθ elli exsexθi tiymuwθawus. w nette exenifekker s essirθiyw g elmesiyH emmax i sseqriyγ δiys g elknayes elkul w g kul blase. 18 ellan elli etεilekni ettesδexc heδakeεlac εebban s ennefxeθ. 19 emme b qudret rebbi δ eddese tweliwwem qriyb, usinc enziyγ iyh elli γersen ennefxeθ, γersen elquwweθ ziyγ kan δ edwi. 20 εlexaTer elmemlxeθ n erreb muc δ edwi emme δ elquwweθ. 21 met i θexsem, exenddase s θeγriyθ ziyγ s exse d erruwH n elHnan?