1 yebδe yHekkeyasen s lemθal yennasen: «yezzu eryaz elεneb, yessuwneD f elles essuwr, yeHfer δiys timeεSerθ yebne elburj, yuwci yixemmasen yexDem ytemuwreθ xlaf. 2 max i yedduwse elweqθ nwekkas nelεneb, yeznasen exeddam bac e syeddeγ elbeyes nelεneb. 3 eTfen ewθent rejεent wifesnes δelfurraγ. 4 yazen exeddam xlaf, ewθent f ixfes izment, εezrent usiyn rejεent. 5 yazen iyjen xlaf, uwahen enγint. yazen egget xlaf, ewθen elli ewweθen essisen, wenγiyn elli enγiyn. 6 wesyeqqiym kan δmemmis elli yexsi egget, g ellexxer yeznesent yen, <δeqedderen memmi.> 7 yaxi ennen ixemmasendiyn y beεDhum, <tay elli δeyuwreθ elqeεεeθe, heyyeθ, edj eθnenγ, usinc enawi nečin elwerθes.> 8 eTfen enγent lewHent elberre nelqeεεeθ nelεneb. 9 δmette δeyeg iθbab nelεneb? eyeddes yenγ ixemmasen yuwc elεneb yelγirensen.* 10 elteqriymc ellayeθe: elkurδ elli lewHent ibennayen nette biyδe yeδwel δelkurδ nessas? 11 rebbi yege wahen, unette δeεjiyb g tiTTewinenne!»

12 Hewlen elquyyaδ niyehuwdiyyen δeθeTfen, εlexaTer uwxezen elli yenne elmθele fellasen. yemenni ukkeδen seg leεbaδ. edjent exDmen.

13 ezennes eljmaεeθ seg ifarisiyyen delHezb nhiyruwdus bac e θeTfen s θuθleyθ, 14 eseδnes ennanes: «ey imuεellem, nessen elli cex eltesxerxusec, wettekkaδeδ s Hette Hed, εlexaTer eltlehhiyc s elmneSbensen, uselHeq tesseqriyδ edwi nrebbi. mat iθenne ecceriyεeθ? eδfaε neljezyeθ yelqeySer ziyγ la? yelzem etneδfeε ziyγ la?» 15 ifaq yesuwε s elHiyltensen, yennasen: «imette iθexsem eyeθHeSlem? ezleθ eddiynar bac e θezre.» 16 ezzelnes eddiynar, yennasen: «etteSwiyreθe nwiyn wellesme nwiyn?» ennen: «nelqeySer!» 17 yennasen: «uwceθ egli nqeySer yqeySer, wegli nrebbi yrebbi.» esθeγerben.

18 eseδnes iSedduwqiyyen, elli etSedqenc s elqyameθ, encδent: 19 «eyimuεellem, yuryane muwse: max eyjaf enjes nweryaz yedj liweces welyedduγiyc idrari, yelzem eryaze etyaγ yaγeδ idrari yenjes. 20 ukanen ellan sebεe δemmaθen: yenjef emezwar, yjaf welyedjiyc idrari. 21 yaγiθ eθθani, yjaf welyedjiyc idrari usiyn eθθaleθ d iddiynni elkul, 22 welyedji Hette iyjen essisen idrari. usiyn eθjaf Hette temeTTuwtdiyn beεδensen. 23 δliwec nwiyn essisen δeθeδwel as nelqyameθ? εlexaTer eθkan δliwecensen elkul.»

24 yer fellasen yesuwε: «mebεeδkum f elHqiyqeθ! eltessinem la δelxθabeθ imqedsen la δelquδreθ nrebbi. 25 εlexaTer as nelqyameθ leHebbac e γe, δeδuwlen emelmleyxaθ g esmawaθ. 26 ufekker nilemmitte, elteqriymc g elxθab nmuwse g ellayeθ nteεulliygθ, max i syuθley rebbi yennes: neč δrebbis nibrahiym disHaq dyeεquwb? 27 mehuwwac δerreb nilemmitte, emme δerreb nihelli edderen. teγleĎem egget!»

28 w ykan iyjen seg imuεelmen necceriyεeθ diyn. yesliyn ettemεenaδen. yezer elli yesuwε yerre belgde f iSedduqiyyiyn, yeqreb yetweliys yenceδt: «δ menten temezwarθ g elwSaye elkul?» 29 yer felles yesuwε: «elwSayeθ temezwarθ: israYiyl esseγδ, rebbinne iyjen weHδes. 30 exs rebbi elli yexleqex s ulex elkul derruHex elkul delεeqlex elkul, uselli eθgeddeδ elkul. 31 utahen elwSayeθ teθθaniθ: exs eljiyrenex emmax i θexseδ imenex. leHebbac e lwSaye xiyr nsentaye.» 32 yennes imuεellem necceriyεeθ: «SeHHiyt, teSδeqeδ max i θenniyδ elli rebbi iyjen weHδes, 33 uyelzem eθyexs elεebδ s ules elkul delεeqles elkul delquδreθes elkul, uyexs eljeres emmax i yexs imenes, xiyr neDHaye elkul.» 34 yezer yesuwε elli eryazdiyn yerre belgde, yennes: «eltebεiδc f elmemlxeθ nrebbi.» seg elweqθes weliged Hette iyjen essisen eθyenceδ.

35 umax i ykan yesuwε yetseqre g elheykel, yenne: «max ennen imuεelmen necceriyεeθ elli elmesiyH δmemmis ndawud? 36 udawud biyδe yenne s elweHy seg erruwH nelqudus, <yenne rebbi yrebbi, geεmez f elyminiyw, elδeHuTTe elεδu egliyx seddu ikreεnex.> 37 udawud biyδe yetnabe gelmesiyH rebbi, emmale max δeykuwn elmesiyH δmemmis?» ukanen leεbaδ egget esseγδan g yesuwε unihnin ferHeniyn.

38 yennasen g useqriys: «erreθ elbelennum seg imuεelmen necceriyεeθ, exsen ebanen s edbac δiTwiylen duHeyyi g elbeĎHaθ. 39 wexsen zade elkrasi imezwure g eljwameε delεerDaθ. 40 yemenni etγaren f leHwac ntidjalin, wessexnan elli etĎewlen g eθzelliθensen. δeyeggez fellasen elεqab δemeqqar.»

41 yeqqiym yesuwε g elheykel, δimqabel eSSenduwq nuSeddeq, ireqqeb g leεbaδ etHuTTen g lefluws δiys. HuTTen imuγniyyen egget lefluws egget. 42 teseδ tedjalt ettefqiyreθ, eθHuT diyn sen δelfrenkaθ. 43 inabe etlemδas yennasen: «δexennenne elHeq, tedjalte tefqiyrθ tHuT g eSSenduwq exθer nelli HuTTenti leεbaδ elkul. 44 εlexaTer nihnin HuTTen ezzayeδ f elHajθensen, emme netteθ tHuT elli γer-s elkul reγmelli netteθ etteqelliylt.»