1 flexemlaymen f elles ifarisiyyen dlebHaD nimuεelmen necceriyεeθ elli useδen seg uwrceliym. 2 ezren eljmaεeθ seg etlemδas tetten s ifassen δimenjas, ellemmessirδenc. 3 εlexaTer ifarisiyyen delbeqiyyeθ uδayen elkul θebεen elεaδeθ n lejdad, eltettenc kan max esiyrδen ifesnensen belgde. 4 umax erewHen seg essuwq eltetten Hette cey kan eθessiyrδen. wellaneθ elHajaθ egget xlaf θebεen δiysneθ, emussiyreδ nelkiysan diberraδen delmaεuwn nenHas desriyraθ.* 5 encδent ifarisiyyen dimuεelmen necceriyεeθ: «imette etlemδax esseHfiĎenc f elεaδeθ nlejdad, yemenni tetten s ifassen δimwesxen ellemmessirδenc?» 6 yer fellasen: «eyelli tesxerxuwsem! yeSδeq icεiyya g ennubuwθes fellawem, emmax i yemmari, <ecceεbe yetbejjel deyye s imiys, emme ules yebεeδ egget felle. 7 uεebδen δiyye s tixerxas, esseqren g edwi nleεbaδ.> 8 tseybem elwSaye nrebbi tetfem elεaδeθ nleεbaδ.»

9 yennasen: «xenyum tlewHem ecceriyεeθ nrebbi bac e θesθeHfĎem f elεeδeθennum! 10 muwse yenne, <elhe s daddex dyemmex, welli eysubb daddes ziyγ δyemmes yelzem eyjaf.> 11 emme xenyum teqqarem, <iδekan iyjen γer-s mat eyεawen essis daddes dyemmes, yemenni esenyen wah δelqurban (meεnahe yrebbi)> 12 yemεafe seg eεawen ndaddes dyemmes, 13 usahen eθkesrem edwi nrebbi s elεaδeθ elli twerθem δiysneθ, wellaneθ elHajeθ egget xlaf emtah ettegem δiysneθ.»

14 inabe etweliys leεbaδ elmerreθ xlaf yennasen: «eslmiyδ elkul tefhemmiyδ: 15 leHebbe Hette cey eyaδef g elεebδ s berre usiyn eθyenjes. emme elli eyeffeγ seg elεebδ ennette elli δeθyenjes. 16 welli γer-s timedjiyn ywesle edj eyesl.» 17 max i yedje leεbaδ yeδwel yelHuwc encδent etlemδas f elmθel elli yenni. 18 yennasen: «Hette δxenyum zade eltefhiymemc? eltessinemc elli eyaδef g elεebδ s berre elyetgedc eθyenjes, 19 εlexaTer yettaδef yteδisθes, muc yules, usiyn eyeffeγ?» usahen yedje yesuwε eče elkul δ eTTaher. 20 yennasen: «elli yetteffeγ seg elεebδ ennette elli δeθyenjes, 21 εlexaTer s ejjaj, seg ulawen n leεbaδ, yetteffeγ exemmem elfaseδ: elfesq d exar d enγe 22 dezne deTmeε delxubθ duγucci decciyxeθ dweHsaδ denmiymeθ duθkebber d ejjehl. 23 elfsaδe elkul yetteffeγ seg wemmes nelεebδ usiyn eθyenjes.»

24 yexDem esyiyn yetwali ecciyreθ nSuwr. yaδef elHuwc, w ykan eliγic eyesl essis Hette Hed, yaxi eligeddec eyeHrez imenes. 25 eθkan telle temeTTuwθ γer-s yelliys δiys erruwH ettemenzuwsθ. max i θesle essis texDmes ettezzel tneggez f ikreεn-es, 26 tennes eyessuwfeγ ecciyĎan seg yelliys. weθkan temeTTuwθe muc ettuδayθ, ettesuwriθ ettefiniyqiθ. 27 yer felles yesuwε: «edj idrari ecebεen qebl, mayjiyc eθekseδ eγrum yidrari tuwcet yeyDan.» 28 ter felles: «SHiyH ya, siydiy, Hette δeyDan tetten seg elεqab nidrari seddu eTTawleθ!» 29 yennes: «berre, f elxaĎer nedwiym wahen yeffeγ ecciyĎan seg yelliym.» 30 teδwel temeTTuwtdiyn yelHuces, taf yelliys f esriyr wecciyĎan yeffeγ essis.

31 yeffeγ yesuwε seg Suwr, yeθεedde f Seyda g webriδes yiylel neljliyl, s etwali elqeεεeθ ntimuwre elεecre. 32 eγeδnes iyjen δileĎrec wilses yemmeqqen, mellegnes bac e yHuT efuses f elles. 33 yebεeδ essis yesuwε f leεbaδ, iHuT iDuDenes g timedjiyn nweryaz yeskuwfes ilemses ilses. 34 yqam tiTTewines lennej yeθnehheδ yennes yweryaz: «iffaθa!» (meεnahe miyr) 35 g elweqtdiyn emmiyrneθ timedjiyn nweryaz yemseyyeb ilses, yuθley δimserreH. 36 iweSSaθen yesuwε bac e lleqqaren yHette Hed. yemenni ykan kul max enniweSSe ernin eseHke. 37 ukanen eqqaren unihnin δimeθεejben: «mesmeH elεmayel elkul elli yθeg δiysneθ! yerre ileĎrec isel webekkuwc iδukke.» *iyehuwdiyyen etxememen elli nihnin xiyr nleεbaδ iddiyn. ettesemman imenensen idrari uleεbaδ iddiyn eyDan. uyesuwε yennayes siyn bac e ttijerreb muc bac e ttisub.