1 beεεeδ liyyam yeδwel yesuwε ykefernaHuwm, eslen leεbaδ elli nette g elHuwc. 2 emlaymen leεbaδ egget εebben emxan eliymi nelHuwc, yesseqraθen s edwi nrebbi. 3 eseδnes erbεe δiryazen qamen iyjen δelεayeb. 4 max elgeddenc eθewDen essis εlexaTer leεbaδ egget, snuqben esqef elli δenni yesuwε essugzen esyiyn elεayebdiyn g eθjerreyθes. 5 max i yezre yesuwε elimenensen yennayes yelεayebdiyn: «emmi, leδnubex elkul emmeγferneθ!» 6 uggemmes nleεbaδdiyn kanen ellan imuεelmen necceriyεeθ, ennen g ulewnensen: 7 «ecbiyh eryaze iδukke sahen? wahen δelkeffer! δ wiyn iged eyeγfer leδnuwb bexlaf rebbi weHδes?» 8 elweqθes yexez yesuwε g ules elli etxememen δiys, yennasen: «ecbiykum etxememem f elHajaθe g ulewnennum? 9 esyemmen yelεayebe <leδnubex emmeγferneθ.> eshel nelli esyemmen <ekker qam tejerreyθex tuyuwreδ.>. 10 tay δexennessexne elli neč bnaδem* γeri elquδreθ bac e γefre leδnuwb g elqeεεeθ.» yennes yelεayeb: 11 «enniyγex ekker tqameδ tejerreyθex trewHeδ yelHucex!» 12 yekker yqam tejerreyθes liyhliyh yeffeγ ezzaθ nleεbaδ elkul. esθeγerben usiyn mejδen rebbi ennen: «elεemrenne wennezri elHajeθ emtah!»

13 yeδwel yesuwε elmerreθ xlaf yecceT niylel neljliyl. eseδnes leεbaδ egget yebδe yetseqre δiysen.

14 unette meθεeddi yezre lawi memmis nHelfe ygeεmez g elbiyt neljbayeθ. yennes yesuwε: «eθbεiyδ!» yekker yeθbeεθ. 15 elweqθelli ykan yesuwε iθet g elHuwc nlawiy, eqqiymen egget seg eljmaεeθ neljbayeθ dihelli muc SaleH iyδes nette detlemδas, εlexaTer egget essisen kanen diyn exelden f elles. 16 max i θezriyn imuεelmen necceriyεeθ seg ifarisiyyen* iθet deljmaεeθ neljbayeθ dihelli muc SaleH, ennen yetlemδas: «ecbiyh iθet wises deljmaεeθ neljbayeθ delli muc SaleH?» 17 yesliyn yesuwε, yennasen: «ihelli δuSHiHen ettesθHeqqiync eĎbiyb, emme imuwDan ettesθHeqqen. useδe bac e nabiyγ elli γleĎen muc eSSuwlleH.»

18 ukanen etlamδe nyuwHenna elmeεmdan difarisiyyen zuwmen, esδen leεbaδ yyesuwε ennanes: «ecbiyhum etlamδe nyuwHenna elmeεmdan difarisiyyen etzuwmen yemenni etlemδax etzuwmenc?» 19 yennasen: «egedden iθbab nislan ezuwmen maδame elεriys uggemmesensen? maδame elεriys uggemmesensen elgeddenc ezuwmen. 20 emme δeyeddes as eyemqam elεriys seg wemmesensen elweqθes ezuwmen. 21 midden etreqεenc edbac δiqδiymen stekettent ettejδiyt bac e ltxemmecec tekkes qiqqi s eg weqδiym twesseε ecerrex. 22 wenneqlenc ecrab δejδiyδ g elmezweδ δeqδiym bac e θyečerrexc. yexDem ecrab delmezweδ zade. emme ecrab ejδiyδ yelzme elmezweδ δejδiyδ!»

23 yeθεedde as nessebθ uggemmes nimendi, ebδen etlemδas etteksen g tisbal unihnin egguwren. 24 ennanes ifarisiyyen: «erqeb, ecbiyhum etlemδax ettegen elHajaθ etHelnec as nessebθ?» 25 yennasen: «endre elteqriymc δmette iyege dawud max i yelluwz nette diryeznes? 26 max i yuwδef yelHuwc nrebbi, max i ykan ebyatar δemeqqar nelkuhhan, yeč eγrum nelqurban yuwc essis yiryeznes, welyetHellec ečen essis kan δelkuhhan.» 27 yen yesuwε: «rebbi yege essebθ yleεbaδ, muc leεbaδ yessebθ. 28 bnaδem δsiydiys nessebθ zade.»