1 yeffeγ esyiyn yeseδ ytemurθes eθbεent etlemδas. 2 as nessebθ yebδe yetseqre g elmejmeε. esθeγerben leεbaδ max i θesliyn ennen: «s meniys iyedduwγe wahen? δmette elHekmeθe isθemmuwce? uδmat elmuεjzaθe elli yθeg δiysneθ elkul? 3 muc δwahen enejjar emmiys nmeryem, enjes nyeεquwb dyuwsi dyehuwδa dsemεan? δwahen elli temmeθines γenne dah?» welleqqilenc eθeqblen. 4 yennasen yesuwε: «eHebbec Hette enbi γer-s elqiymeθ g temurθes uggemmes niεcirnes dmidnes.» 5 weliged eyeg Hette elmuεjzeθ diyn, kan qiqqi nleεbaδ δimuwDan iHuT fellasen efuses ebran. 6 w ykan yetteθεejjeb seg elqelleθ nelimenensen. yexDem ytimuwre tiddiynni yetseqre.

7 inabe etlamδe leθnac yebδe yettazen δiysen zwaz bac e becren, yucasen elquδreθ f lerwaH timenzas. 8 iweSSaθen yennasen: «eθewyem Hette cey ywebriδennum kan etteγriyθ: la δeγrum, la ettecxarθ, ula δlefluws g lejyebennum, 9 emme irδeθ eSSebbaĎ, weθewyemc sent δelksawi.» 10 yennasen: «meni eθeδfem elHuwc, eqqiymeθ diyn elδeθerHlem essin. 11 umax eθexeDmem ywemxan wexenqeblenc δiys midnes welsellenc edwinnum, erHleθ esyiyn teferDem tγuwbret seg eSbabĎennum emunebbeh fellasen!» 12 efγen etnaben leεbaδ yettuwbeθ, 13 g elben ecyaĎen egget, eδehnen s uwδi egget leεbaδ δimuwDan ebran.

14 yesl elmlek hiyruwdus* s yesuwε, εlexaTer yeδwel yemmessen egget. ukanen ellan leεbaδ eqqaren: «yuwHenna elmeεmdan yekker seg ilemmitte, uwahen imette elmuεjzaθ ekkerneθ f ifesnes.» 15 emme ennen xlaf: «δiliyya», uleεbaδ xlaf ennen: «δenbi seg lenbye iqδiymen.» 16 max i yesle hiyruwdus yen: «wahen δyuwHenna elli qusγes neč ixfes, yekker seg ilemmitte!» 17 w ykan hiyruwdus yeTTef yuwHenna yeqqent g elHebs f elxaĎer nhiyruwdiyya elli yuγit unetteθ δliwec nenjes f iylibbus. 18 w ykan yuwHenna yeqqeres: «exyetHiylec eθewyeδ liwec nenjex.» 19 weθkan hiyruwdiyya tenqem f yuwHenna uθexs ettenγ yemenni eltgeddec, 20 εlexaTer hiyruwdus ykan yettekkaδ essis w yetεus felles εlexaTer yessent δeryaz δ eSSaleH w δ eqeddiys. w ykan yexs egget esyesseγδ, reγmelli iHeyyerθ egget. 21 twete tikkelt yhiyruwdiyya max i yege hiyruwdus g εiyd miylade emensi yelquyyaδ neljiyc dimeqqaren neljliyl. 22 taδef yelliys nhiyruwdiyya terqeS, teεjeb hiyruwdus delli diyn elkul. yennes elmlek: «eĎleb elli texseδ emettuwce.» 23 yeθjulles yen: «emuwce elli eθeDelbeδ, Hette δezyen nelmemlexθiyw!» 24 teffeγ tenceδ yemmes: «δmette δeDelbe?» ter felles: «iyxef nyuwHenna elmeεmdan!» 25 tezzel fiyseε yelmlek tennes: «exse eyθuwceδ ture iyxef nyuwHenna elmeεmdan f eTbeq!» 26 yeHzen elmlek egget, yemenni elyeqqiylc etyer f elxaĎer nelimiyn elli yeθjulli ezzaθ nleεbaδ. 27 yezen g elweqθes eεeskri yennes esyeddeγ iyxef nyuwHenna. yexDem iquSSes ixfes g elHebs, 28 yeγet f eTbeq yuwci ytefruwxθ tewiyθ yyemmes. 29 eslen etlamδe nyuwHenna, esδen ewyen ejjeθeθes erδmenteθ.

30 beεδ erejεen imersal emlaymen γer yesuwε, eHkanes f elli egint delli esseqrant elkul. 31 yennasen: «esδeθ xenyum weHδawem ywemxan δelxali terθaHem lewse.» εlexaTer egget leεbaδ kanen xeTmen ettesδen, wesennedjiync elweqθ Hette yweče. 32 exeDmen weHδasen g elfluwkeθ ywemxan δelxali. 33 ezrenten leεbaδ, esnen elmani δexeDmen, efγen seg timuwre elkul f ikreεnensen esebqenten eldiyn. 34 max i yeggez yesuwε seg elfluwkeθ, yezre leεbaδ egget, yesxef f ellasen, εlexaTer kanen emesεi blac eniylti, yesseqraθen elHajaθ egget. 35 max i yeδwel meεεač bekri, useδnes etlemδas ennanes: «wahen δemxan δelxali, w elweqθ meεεač bekri. 36 ezenten erewHen yeswani ettimuwre bac e sγen δme δečen.» 37 yer fellasen yesuwε: «ucmasen δxenyum δme δečen.» ennanes: «s meniys? yelzemne tmaliθ* bac e nged essenneγ mat δečen?» 38 yennasen yesuwε: «menyeθ iγerwem ettineεne? berreθ erqbeθ.» max i reqben elli γer-sen, ennanes: «xemse ettineεne dsent ettiHwiyθin.» 39 yennasen esgeεmzen leεbaδ δeljmaεeθ δeljmaεeθ f elHec eziyzew. 40 eqqiymen δleSfuwf δleSfuwf, δiysen egli nmiyye uδiysen egli exxemsiyn. 41 ubeεδ yawi yesuwε xemsediyn ettineεne dsentediyn ntiHwiyθin yqam tiTTewines yesme, ybarex, ykesser tineεne yezlasen yetlemδas bac e ferqen f leεbaδ, yzuwn sentadiyn ntiHwiyθin fellasen elkul. 42 ečen elkulhum elδecebεen. 43 usiyn qamen eθnac ettisiyfes εebbaneθ δeleεqab nweγrum etteHwiyθin. 44 ukanen elli ečiyn seg tineεne εuddi xemse laf rajel.

45 elweqθes yen yesuwε yetlemδas eθinen g elfluwkeθ esbqent ibiytSeyda, f ecceT elli iqabel, elδeygelleb leεbaδ. 46 max i xeDmen yuwli yeddehreθ bac e yezzal. 47 g tisemsiyn elfluwkeθ tkan uggemmes niylel uyesuwε weHδes f elber. 48 yezer yesuwε elli etlemδas etεanen g ujeddef εlexaTer aDu ykan yεerreD δiysen. yesδasen qebl elfjer yegguwr f iylel, ykan εuddi δenyesbeq. 49 max i θezriyn yegguwr f iylel etteεlakent δelxyal zeεwgen, 50 εlexaTer zrint elkul emmerεben. yemenni elweqθes yuθleyasen yennasen: «etemmerεbemc, eθhenneθ enneč!» 51 yelyasen g elfluwkeθ, yehδe aDu. eqqiymen Heyriyn egget, 52 εlexaTer elmuεjzeθ nweγrum ettefhimenc, ukanen ulewnensen eqseHen.

53 θεedden yecciyreθ njenniysaret eqnen elfluwkeθensen diyn. 54 elluciyn max i gzen uwxezen leεbaδ yesuwε. 55 enden elberdiyn elkul ebδen etqamen g imuwDan f essewensen ikul blaSe eslen essis diyn. 56 ukanen meni eyaδef, ylemden, ytimuwre ziyγ yeswani, eHuTTen imuwDan g elbeĎHaθ ennanes eylemmes Hette δeTTeref nedbeces. w ykan elli eθilemmes elkul eyebre.