1 max i yeθεedde essebθ, tesγe meryem θemejdeliyθ dmeryem yemmes nyeεquwb dsaluwme elffeHaθ bac e θenγelneθ f yesuwε. 2 g talji nwas iglewwel nelimeθ, max i θeqqeS tefuwθ, exDemneθ ywenil. 3 ukanneθ eqqarneθ ibeεDhum: «δ wiyn δexenygergeb tγaγet seg iymi nwenil?» 4 max i Tulneθ ufiyneθ tγaγet temgergeb, weθkan ettemeqqarθ egget. 5 eδefneθ enil, ezrneθ eεezri ygeεmez f elymiyn, felles edbac δimellalen, emmerεbneθ. 6 yennasneθ: «etemmerεebmec! xemmiyθi eddellebmeθ g yesuwε ennaSri emeSluwb. leHebbac dahen, yekker. weδwahen emxan elli HuTTent δiys. 7 berremeθ tenmeθ yetlemδas dbuTrus: rahu yesbqawem yeljliyl, udiyn δettezrem emmax i xenyenne.» 8 erwelneθ seg enil merεubaθ. wellenniyneθ yHette Hed εlexaTer kanneθ xeyfaθ.*

9 [max i yekker yesuwε g talji nwas iglewwel nelimeθ, g umezwar yeffeγ ymeryem θemejdeliyθ elli ysuwfeγ essis sebεe δecyaĎen. 10 texDem tennasen yetlemδas, ukanen etnewHen wetεeyĎen, 11 wetSedqenc max i sliyn elli nette yedder uθezri.

12 ubeεεeδ yeffeγ yesuwε g elheyyeθ xlaf ysen seg etlemδas unihnin uggebriδ yijiyman. 13 eδwlen ennen yiddiynni, yemenni enSedqenc.

14 g ellexxer yeffeγ yetlemδas leHdac, unihnin tetten, yeεrexθen felqelleθ nelimenensen etteqsuwHi nulewnensen, εlexaTer elSedqenc elli zrint beεεeδ iyekker. 15 yennasen: «berreθ yeddunyeθ elkul, tbecrem elbcareθ yleεbaδ elkul. 16 elli eyemmen yeθεemmeδ δeyemneε, yemenni elli elyettemmenc δeyehlex. 17 welli amnen, ellayeθe δeθeqqiym iyδsen diyme: δegelben ecyaĎen s ellesmiyw, uθlayen elleγwaθ ettejδiyt, 18 eTfen s ifesnensen tilefsiywin. umax eswen essem esenijerri Hette cey, umax eHuTTen ifesnensen f imuwDan enneSSebran.»

19 beεδ iyuθley erreb yesuwε yetlemδas, yemsuwli yesme ygeεmez f elymiyn nrebbi. 20 wetlamδe xDemen etbecren g kul blaSe, urebbi yetεawen δiysen uyetSeddeq g edwiynsen s ellayeθes elli etSarneθ.]