1 max i θuwli talji eθcawren imeqqaren nelkuhhan diwessaren dimuεelmen necceriyεeθ delquyyaδ nelmejles elkul, usiyn eqqenen yesuwε ewyent uwcent ibiylaTus*. 2 yenceδt biylaTus: «endre δcex elmlek n uδayen?» yer felles: «δcex tenniyδ.» 3 etehment imeqqaren nelkuhhan ettehmaθ egget. 4 yenceδt biylaTus tikkelt xlaf: «elγrexc s mette δeθerreδ? esl menyeθ δettehmaθ!» 5 yemenni yesuwε elyerriyc, heδake εlac yesθeγreb biylaTus.

6 w ykan biylaTus g kul elεiyδ eyseyyeb iyjen seg imeHbas eθexθaren leεbaδ. 7 w ykan eryaz ellesmes barabas yemmeqqen nette deljmaεeθ δimeθmerδen, enγiyn leεbaδ g elweqθ nelfetneθ. 8 mlaymen leεbaδ ebδen Ďelben seg biylaTus elli mesθensiyn ettawyen δiys, 9 yennasen: «texsem exenseybe elmlek nuδayen?» 10 εlexaTer yessen elli imeqqaren nelkuhhan selmen yesuwε elli nγaren essis. 11 heyjen imeqqaren nelkuhhan leεbaδ bac e xθaren barabas. 12 yennasen biylaTus tikkelt xlaf: «δmette δege ziyγ s elli etsemmem δiys elmlek nuδayen?» 13 zeεwgen xlaf: «eSlebθ!» 14 yennasen: «δmette eccer elli yegi?» yemenni ernin zeεwgen eSbiyH: «eSlebθ!» 15 biylaTus ykan yexs eyreDDe leεbaδ elkul, iseyyeb barabas. yuwc yesuwε bac e θeSlben beεεeδ eθewθen.

16 ewyent iεeskriyyen eljaj nelHuwc elli δelqSer nelHakem laymen elεesker elkul. 17 ireDnes ejjebbeθ ettezukkaγθ emelmlek, egnes ettaj s eccuwk HuTTent f ixfes, 18 ebδen etHeyyen δiys: «esselam εliyk, elmlek nuδayen!» 19 wettewθen δiys s teγriθ f ixfes weskufasen felles, usejjeδnes. 20 ubeεεeδ iθfisxen felles, ekkesnes ejjebbeθ tezukkaγθ ireDnes edbeces efγen essis bac e θeSlben.

21 ykan yelle eryaz jay seg ejimiys, ellesmes semεan eqerwiy, daddes niskender druwfus, ennanes bac e yqam eSliyb bessiyf. 22 eγδen yesuwε ywemxan ellesmes juljuθθe, meεnahe emxan neljumjmeθ, 23 ucnes ecrab yemsesr s laδen yaxi elyeqqiylc eθyesw. 24 usiyn mesmernas ifesnes dikreεn-es f eSliyb, zuwnen edbeces mabinathum s uqerreε. 25 max i θeSelben eθkan δettesεe ntalji. 26 eryen f elluwHeθ nelHukmes: «elmlek nuδayen.» 27 eSlben iyδes sen δixennaben, iyjen f elymines wiyjen f eliseres. 28 [usah yekmel edwi nelxθab: «eHsbent seg imujrmen.»]* 29 ukanen elli etteθεeddan esyiyn etδewHen ixfewnensen subbent ennen: «yelli δeθessendreδ elheykel uδettebniyδ g etlaθe eyyam, 30 fuk imenex tegzeδ seg eSliyb!» 31 Hette δimeqqaren nelkuhhan dimuεelmen necceriyεeθ kanen etteθfisaxen felles, weqqaren ibeεDhum: «ifuk elγires yemenni eligeddec eyfuk imenes! 32 edj eyeggez ture elmesiyH elmlek nisraYiyl seg eSliyb, bac e nzer nemmen!» ukanen ixennaben elli emmeSlben iyδes etεezren δiys Hette ennihnin.

33 seg wezyen nwas, tessulles eddunyeθ elkulhe elmaDi tlaθe. 34 egmaDi tlaθe izeεweg yesuwε: «ilwiy, ilwiy, lema cebeqteniy?» meεnahe: «ya rebbi, ya rebbi, imette iyθedjiδ?» 35 ennen lebHaD nelli kanen bedden diyn, max i sliyn wediyn: «tayeθ yetnabe g iliyya!» 36 yezzel iyjen essisen yeTTef θeneccafθ yneffext g elxel yegiθ g teγriyθ yezlest bac balek eyeqqel eysu unette yeqqar: «rajeθ bac e nerqeb δeyeddes iliyya bac e θyessuggez ziyγ la.» 37 izeεweg yesuwε etzeεwiygeθ siyn teqwe yjaf. 38 yemcuq ecεer nelheykel* f sen, s lennej yelweddey. 39 w ykan elqayeδ nelHers ibed δimqabel eSliyb, max i yezre max i yjaf yesuwε, yenne: «mbelHeq, eryaze ykan δmemmis nrebbi.»

40 ukanneθ ellaneθ elwacun etteθferrajneθ seg lebεiyδ, essisneθ meryem θemejdeliyθ dmeryem yemmes nyeεquwb emezyen dyuwsi dsaluwme, 41 wennihenti elli eθbeεneθ yesuwε wexδemnet max i ykan g eljliyl, wegget elwacun xlaf uliyneθ iyδes yuwrceliym.

42 max i yeqreb δeggiyδ, umax i ykan δas nuHeDDer, as elli qebl nessebθ. 43 yuseδ yuwsef elli seg ramiy, w ykan δimqedder g elmejles, useg elli etrajen g elmemlxeθ nrebbi, yeθcejjeε yaδef f biylaTus yeĎleb ejjeθθeθ nyesuwε. 44 yesθeγreb biylaTus seg ejefis fiyseε. inabe elqayeδ nelHers yenceδt: «endre yjaf seg bekri?» 45 max i yesle elxber seg elqayeδ nelHers, yedje yuwsef eyawi ejjeθθeθ nyesuwε. 46 yeseγ elkfen, usiyn yessuggez ejjeθθeθ f eSSliyb ikeffent iHuTTi uggunil elli yemmeHfer g elHegfeθ, igergeb tγaγet f iymi nwenil. 47 ezerneθ meryem θemejdeliyθ dmeryem yemmes nyuwsi meni iθiyHuT.