1 max i resmen egget δleεbaδ θaryen g elHkayeθ elli ySar γenne welli neslit seg leεbaδ imezwaren 2 welli kanen taryen δiys wesseqran δiys yelγirensen. 3 elweqθes enwiyγ δexetterye ha siydiy θawfiylus, s elli tersem elmi tuqe 4 bac e θesneδ elHkayeθ tuSHiyHθ seg telγaleT.

5 ykan yelle g elweqθ nhiyruwdus eSSulTan nyehuwdiyye elkahen esmiθes zekeriyya. nette ykan s elεerc nlenbye uliweces tkan s ezzerriyεeθ nharuwn, wesmiθes iliyzabat. 6 kanen lessenniyn essenen rebbi uθebεen g tufleyθes wegguwren kan s edwiys. 7 yemenni kanen elγersenc idrari lexaTer iliyzabat eθkan δtelεagerθ ulessenniyn kanen δimeqqaren g elεmer.

8 max i dyuwse edduwr nzekeriyya δeyexδem δelkahen ezzaθ nrebbi, 9 tekker felles elqurεeθ elli eginteθ elkuhhan bac e yaδef yelHuwc nelqudus usinc eyceεεel elbxuwr. 10 elweqθ nuceεεel nelbxuwr kanen leεbaδ elkul etzellen elberre. 11 elweqθes yeffeγes iyjen s elmleyxaθ nrebbi ibed f elymiyn nelxanuwn emeqqar meni itHuTTen g elbxuwr. 12 max i θyezre zekeriyya yukkeδ yeδwel elyessiync δmat δayeg. 13 yemenni elmlaxdiyn yennayes: «eθukδc ha zekeriyya, rahu rebbi yesle edεax uliwecex iliyzabat δexθaru engluws δetsemmiyδ yuwHenna.

14 uδeθefrHeδ essis egget cex dleεbaδ iddiyn seg esserwes. 15 uδeyekber g TiTTawin nrebbi uleεemre δeysu ecrab, uselli g teδisθ nyemmes δesyuc rebbi seg erruHes. 16 uδayer egget δebni israYiyl ywebriδ nrebbi. 17 usinc edyes qebl memmis nrebbi, unette g erruHes delqewθes emenbi iliyya bac leεbaδ exsen idreriynsen usinc edren iyδsen δimeθfahmen usinc ayer elfussaδ y webriδ uSHiyH, usinc eyenzeγ leεbaδ y edwi n rebbi.»

18 yenceδ zekeriyya elmlax yennayes: «max δeyeδwel wahen belHeq uneč δeryaz δemeqqar uliweciyw δtewessarθ.» 19 yerrayes elmlax yenne: «neč δjebriyl etbedde ezzaθ nrebbi. nette yuzeniyδ bac e xuflaye usinc exsefrHe.» 20 utaye δeθeδewleδ δebekkuwc wetgeddec eθufleyeδ elmeyeδwel wahen elkul belHeq lexaTer cexdiyn eltSedqec edwiyw uwahen elkul δeySar g elweqθes. 21 elweqtdiyn wediyn kanen leεbaδ etrajen g zekeriyya unihnin mesθeγrbiyn lexaTer nette iεeTTel g elHuwc nelqudus. 22 yemenni max i yeffeγ ligeddec esenyufley, elweqθes efhemen elli nette enzi δmat iyezre g wemmes nelHuwc nelqudus yersem ywemmeyasen s ifesnes, yeqqiym siyn δebekkuwc. 23 max i yεedde eddures nelxeδmeθ g elHuwc nelqudus yeδwel yelHuces yrewweH.

24 beεδ liyyameθ tiwi iliyzabat liweces are yemenni eltenni yHette Hed felles xemse chuwr. eθkan teqqar: 25 «rahu rebbi iqami ixfiyw ezzaθ nleεbaδ max i yesfekker.»

26 g weyyures essades yuzen rebbi elmlax jibraYiyl ytemuwreθ g eljliyl esmiθes ennaSreh, 27 yicθ esmiθes meryem, eltuwc δteqeyyerθ yemenni temmexĎeb yweryaz esmiθes yuwsef s ezzerriyεeθ ndawud. 28 yuwδef felles elmlax yennes: «eslam fellem, efreH rebbi yexθarem cem, rebbi ibarxem cem unette rahu iyδem.» 29 tekkuδ s edwi nelmlax tufley g ules: «δmat edwiye wahen!» 30 yennayes elmlax: «eθukδc ha meryem, rahu rebbi yexsem egget. 31 utaye δeθeδewleδ δtemeεδurθ usinc eθarweδ engluws etsemmiyδ yesuwε. 32 uδayef elqδer δemeqqar g eddunyeθe uδeθsemman δmemmis nelεali uδesyuwc rebbi elmemlxeθ ndawud, babes emezwar. 33 weHebbac δ wiyn δeyeδwel δelmlek f elHuwc nyeεquwb usinc δeyHuT kul cey seddu efuses yellexxer neddunyeθ m nette.» 34 tenne meryem yelmlaxdiyn: «max δeySar wahen? uneč welxalde Hette eryaz.» 35 yerrayes elmlax yennes: «erruwH elqudus δeyemmazen δiym urebbi δemyuc elquwweθ. wengluwse eTTaher elli δetterweδ δeyemsemme memmis n rebbi. 36 utaye teqribθem iliyzabat δeθawi are usinc δeθaru engluws unetteθ δtewessarθ. utediyn elli semmanteθ leεbaδ δtelεagerθ taye teδwel g weyyures essades. 37 rahu weHebbe Hette cey yuεer f rebbi.» 38 tenne meryem: «neč δtexeddamt nrebbi umeδebiyye edwiyx eyeδwel belHeq.» elweqθes yedjiyt elmlaxdiyn yemreq f imenes.

39 g liyyametdiyn tekker meryem temreq fiyseε fiyseε yecciyreθ nedhari g webriδes ytemuwreθ nyehuwδa. 40 tuδef yelHuwc nzekeriyya welbeεδ essellem f iliyzabat. 41 max i θesle iliyzabat eslam nmeryem yeθHerrex memmis eSbiyH g wemmes nteδisθes. yerni yucayes rebbi s erruHes bac e θged eθufley. 42 welbeεδ tenne s eSSuwθ yeεle: «ettimbarexθ cem g timeTTuwθin elkul, uδimbarex memmiym unette elyuwc g teδisθem. 43 δ wiyn neč bac e yettes meryem yemmes nmemmis nrebbi! 44 rahu eddebelli sliyγ eslemem, yeθHerrex memmi g teδisθiyw s elferHeθ. 45 SeHHe liyk, lexaTer cem temmeneδ belHeq s edwi nrebbi uselmexθubem.»

46 tenne meryem: «uliyw yetsebbeH yrebbi. 47 werruHiyw tefreH seg rebbi elli imenεi seg jhennem. 48 lexaTer nette yexθari, neč δtexeddemt nrebbi uyelliys ntemuwreθ. seg wasse yellexxer neddunyeθ δennen leεbaδ elkul elli rebbi ibarxi seg wemmes nelwacun elkul. 49 ulexaTer rebbi yege iyδi elli weθyegi Hette iyjen. nette δelεaliy. 50 werreHmtes diyme f leεbaδ elli tekkaδen essis. 51 γers elquwweθ δtemeqqarθ, yeγleb essis imeθkebren. 52 isuggez elHukkam imeθkebren elweddey wisuwli imeθwaDεen lennej. 53 s elxires icecbeε leεbeδes uselqewθes yedje imurkentiyyen δiεeryanen. 54 yεawen ezzerriyεeθ nyeεquwb bac e nesfekker erreHmtes, (yeεquwb eqqarnes zade israYiyl wellesme wahen yuceyasti rebbi.) 55 max i yege yen ibrahiym dezzerriεθes yellexxer neddunyeθ.» 56 teqqiym meryem γer iliyzabat eyeg siyn tlaθe chuwr welbeεδ trewweH yelHuces.

57 max i yiweD elweqθ netserwas, tirew taγeδ engluws. 58 elweqθelli sliyn eljirenes delleqerbes elli rebbi isuggez felles erreHmtes, efreHen iyδes. 59 g was eθθamen usiynd δeDehren englusdiyn wetεilaken δeθsemmen zekeriyya f ellesm ndaddes. 60 yemenni yemmes tenneyasen: «ehhe! δeθensemme yuwHenna.» 61 ennanes: «yemenni elγerwemc δ wiyn yemsemme g elHucewwem s ellesme wahen.» 62 welbeεδ uman ydaddes encδenti δmat iyexs eθisemme. 63 esθeγerben leεbaδdiyn lexaTer yuri f elluwHeθ elli yeĎlebt <semmamti yuwHenna.> 64 g elweqθes yeθHerrex ilses yeδwel iδukke yebδe yetsebbeH yrebbi. 65 max i sliyn leεbaδ s edwiye ukδen essis teδwel elHkayeθe f imawwen nleεbaδ elkul g edhari ntemuwreθ nyehuwδa. 66 welli etyesl, ettiHuT g ules usinc eyen: «yendre δmat δeyeδwel engluwse?» lexaTer uwxezen elli rebbi iyδes.

67 isuggez rebbi erruwH elqudus f zekeriyya daddes nyuwHenna bac e yufley usinc eyen δmat δeySar elbeεδ. 68 «δimbarex rebbi, rebbi nyeεquwb lexaTer yesfekker leεbeδes yeγδasen δ wiyn δeyqam fellasen eδnubensen. 69 yuznane eryaz weHebbac m nette s elHuwc nuxeddemes dawud, eryaz δexenymenneε s elεafyeθ. 70 max i yenne f iymi nlenbye elli yuzenten s elli yexleq eddunyeθ. 71 yufley f iyjen δexenymenneε s leεδanne usifassen nleεbaδdiyn elli exenγisenc. 72 bac e θeggez erreHmeθ f midnenne usinc eyesfekker rebbi elεehδes eTTaher. 73 max i yεaheδ seyyedne ibrahiym. 74 nette δexenymenneε s leεδanne bac e θneεbeδ wentekkiyδc s leεbaδ iddiyn. 75 yemenni enukkeδ essis nette usinc aneg δmat eyeĎleb essiyne elmenemmuwθ. 76 ucex, ha engluws, taye δeθeδewleδ enbi nelεali lexaTrek δeθmiyreδ ebriδ δexenysiweD etwali rebbi, ebriδ yeshel welδiys la δulkurδ ula δeccuwk. 77 usinc esnen leεbaδ elli wetgedden emenεen s elεafyeθ kan elqulli entisameH rebbi, 78 uwah elkul lexaTer rebbi ysexxef f leεbaδ wentiθettuwc emtefuwθe elqulli eθeqqeS fellane, 79 bac e DDewwe eddunyeθ f elli eqqiymen g essellesθ useddu eTTel ntemettent, usinc exentsexn ebriδ welδiys la δesubbi ula δelεrex.» 80 ykan englusdiyn yettekber werruHes etteθqewwe seg rebbi, yeqqiym yeεmer g essewweθ elmi idyuwse as yeffeγ δiys yuδayen.