1 yen xlaf yetlemδas: «ykan yelle eryaz δemuγni γers ewkiyl, yeseδ δ wiyn esyenne elli ewkiles yetfesδes g elmelxes, 2 inebaθ yennes, <δmette wahen elli selle δiys fellex? uciyδ elHsab nelwkeltex, cex eltSelHec seg asse eθkuwneδ δewkiliyw.> 3 yen ewkiyl g imenes, <δmette δege? siydiy δeyyekkes seg elxeδemtiyw. elleqwixc bac e xeδme elflaHeθ, wetteθHeccame eDelbe. 4 essene δmette δege, Hette iδekan siydiy igelbiyδ seg elwkaleθ, imeddukeliyw δeferHen essi.> 5 elweqθes inabe elli fellasen ledyuwn ysiydiys, yen yumezwar, <menyeθ fellex ysiydiy?> 6 yer felles, <myat kiyle ettemeqqarθ δuwδi.> yennes ewkiyl, <ax elbunuwx teqqiymeδ liyhliyh teryeδ xemsiyn.> 7 ubeεεeδ yen yiyjen xlaf, <ucex menyeθ fellex.> yer felles, <myat kiyle δiyrδen.> yennes, <ax elbunuwx teryeδ θmenyiyn.> 8 yecxer eryazdiyn ewkiles elxayen f eδkewθes, εlexaTer leεbaδ neddunyeθe eδkawθensen exθer nidrari ntefuwθ g uθεemlensen jmiyε. 9 uneč exennenne: egeθ imeddukal slefluws n elbaTel, max eθuqan leflusennum etemmeqblem g leHwac ndiyme. 10 elli δeθθiyqeθ f eδruws δeθθiyqeθ f egget. welli yuwHec f eδruws yuwHec f egget. 11 wiδekan etterriymc elbal f lefluws n elbaTel, δ wiyn δexenyHuT f lefluws nelHeq? 12 wiδekan elterriymc elbal f wegli nelγiyr, δ wiyn δexenyuc elli δegliynnum? 13 Hette exeddam weliged eyexδem sen δleεbaδ, εlexaTer yaYimme eyexreH iyjen yexs wissen, ziyγ eyeθbeε iyjen yerwel f wissen. weltgeddemc eθexeδmem rebbi dlefluws jmiyε.»

14 elHezb nifarisiyyen, elli kanen exsen lefluws, kanen sellen g wahen elkul, ukanen δeSSen felles. 15 yennasen yesuwε: «etterrem g imenewwem δeSSuwlleH ezzaθ nleεbaδ, emme rebbi yessen elli g ulewnennum. elli zerren δiys leεbaδ yeεle, γer rebbi elyeεliyc. 16 ecceriyεeθ dlenbye eqqiymen yelweqθ nyuwHenna, useg elweqtdiyn tebδe elbcareθ selmemlxeθ nrebbi, ukul iyjen yθeg bessiyf elli iged bac e θyaδef. 17 emme axDem nesme delqeεεeθ eshel nwewDe netquTret icθ seg ecceriyεeθ. 18 elli eyellef yliweces yaγ icθ xlaf rahu yezne, welli ayeγ temeTTuwθ yellefes eryazes rahu yezne.»

19 yen yesuwε: «ykan yelle eryaz δemuγni iraδ g ellerjwan dedbac e γlan uyθeg g imensiywen kul as. 20 w ykan yelle eryaz δeqelliyl ellesmes liyεazer welbeδnes elkule δimqeyyeH, w ykan diyme yettekke f elεaθbeθ nelHuwc numuγnidiyn, 21 uyettecθhe eyecbeε seg elεqab nelmittes, Hette δeyDan kanen ettesδen leHsen g iyyezzimnes. 22 yjaf eqelliyldiyn qament elmleyxaθ yetwali ibrahiym. yjaf emuγni erδment. 23 yqam emuγniydiyn tiTTewines unette yetεane g elεafyeθ, yezer ibrahiym seg lebεiyδ weliyεazer g eljenbes. 24 inabe yen, <edda ibrahiym, ereHmiyδ tezendiyδ eliεazer bac e yeslexs eTTerf nweDeDes yessesqεiyδ ilsiyw, εlexaTer etεaniyγ g elεafyeθe.> 25 yemenni yennes ibrahiym, <esfekker emmi, cex tiwiyeδ elbeyex seg elxiyr g leHyeθex weliyεazer yiwi elbeyes seg elblaye. tayeθ ture yetteθneεεem dahen ucex etεaniδ diyn. 26 wexθer nwahen zade binatne tHuwfret teγreq eliged Hette Hed etyeθεedde esyahen yetwelinnum wesyiyn yetwelinne.> 27 yen emuγni, <exsγex edda ibrahiym ziyγ eθazneδ liyεazer yelHuwc ndadde, 28 bac e ynebbeh f emmeθniyw elxemse bac e lweTTiync Hette ennihnin g elεδabe wahen.> 29 yennes ibrahiym, <γersen muwse dlenbye, edj enneslen.> 30 yen emuγni, <la, edda ibrahiym, emme max esenyexDem iyjen seg inemmitte ture etaben.> 31 yennes ibrahiym, <iδekan ellesseγδenc ymuwse dlenbye, ettebenc Hette max esenyekker iyjen seg inemmitte.>»