1 ubeεεeδ yenneD yesuwε g lemden ettimuwre yetseqre uyetbeccer s elmemlxeθ nrebbi. ukanen etlamδe leθnac θebεen δiys. 2 delwacun zade elli yeSSebraθent seg lerwaH dweTTaneθ, essisneθ meryem, elli temmessen s temejdeliyθ, welli ysuwfeγ essis sebεe δecyaĎen, 3 dyuwwenne liwec nxuwzi ewkiyl nhiyruwdus dsuwsenne delγirensneθ egget elli kanneθ etεawenneθ δiysen s elli γersneθ.

4 eseδnes leεbaδ seg timuwre elkul max i mlaymen essisen egget, yeHkeyasen elmθel, yen: 5 «yeffeγ ezerraε bac e yezreε. unette izerreε uDaneθ timzin f eccafeθ nwebriδ eεfsentent ikraεεen ečentent izenniywen nesme. 6 uDaneθ timzin xlaf f elHegfeθ, max i nebbeθneθ yeqquwr imendi εlexaTer leHebbac e tre. 7 uDaneθ elkeεbaθ xlaf f eccuwk, yemmexneq imendi s eccuwk. 8 uδiysneθ zade elli uDaneθ g elqeεεeθ tebhe, nebbeθneθ eγeδneθ emnihenti myat merre.» max i yenne yesuwε wahen izeεweg: «elli γers timedjiyn ywesle edj eyesl.»

9 encδent etlemδas f elmeεne nelmθele, 10 yer fellasen: «xenyum yemmucawem essan nelHajeθ elli leεbaδ entessinenc elmemlxeθ nrebbi. emme elγirennum enHekkeyasen s lemθal: ereqben welzerrenc, eslen welfehmenc.

11 uwahen elmeεne nelmθel: <ezzerriyεeθ netteθ δedwi nrebbi. 12 elli weTTaneθ f eccafeθ nwebriδ nihnin delli sellen edwi nrebbi usiyn eyeddes ibliys yekkes edwidiyn seg ulewnensen bac e ttemnenc emenεen. 13 welli weTTaneθ f leHgef nihnin delli sellen edwi nrebbi eqeblent unihnin ferHeniyn, emme elγersenc leεruwq, amnen qiqqi umax emjerben eθuĎan. 14 welli weTTaneθ f eccuwk nihnin delli sellen edwi nrebbi emme θecγelten eddunyeθ s lehmumes dwelhas delεezzes usahen elγeltensen etĎabec. 15 emme elli weTTaneθ g elqeεεeθ tebhe nihnin delli sellen g edwi nrebbi eHrzent g ulewnensen ibehhayen, egen elγelleθ eseθbaθensen.>

16 leHebbe Hette Hed eyceεεel elgaz yireDt s elmaεuwn ziyγ eθyeg seddu esriyr, emme eθiHuT g wemxan yeεle bac e θezren elli ettaδfen. 17 εlexaTer elli yemmeHrez δeyemmezr welli yemmejHeδ δeθesnen leεbaδ. 18 erreθ elbelennum max eθeslem edwi nrebbi, εlexaTer elli γers Haje δesyemmerni, welli γers Hette cey δesyemmekkes, Hette δelli yetteεlaki δegliys.»

19 teseδ yemmes nyesuwε demmeθnes, welgeddenc esawDen εlexaTer leεbaδ egget. 20 yennes iyjen essisen: «yemmex demmeθnex bedden elberre exsen exezren.» 21 yer fellasen: «yemme demmeθniyw nihnin delli sellen g edwi nrebbi exeδmen essis.»

22 yelle as yini yesuwε g elfluwkeθ wiyδes etlemδas, yennasen: «heyyeθ, eneqDeε yeccafeθ tisent.» ebδen δeqeĎεen. 23 yenεes yesuwε uθuyuwr essisen tefluwkθ. yenfex aDu yeqwe yebδe amen εuddi δeεebben elfluwkeθ, eδwlen g elxTer. 24 eqerben etlamδe yyesuwε sikrent ennanes: «eyimuεellem! eyimuεellem! εuddi δenjaf!» yekker yenzer f waDu dlemwaj esegren teδwel eddunyeθ siyn tesger. 25 yennasen yesuwε: «mani emmanenum?» ukδen esθeγrben, ennen ibeεDhum: «δ wiyn wahen? yetweSSe Hette g waDu delmuwj usellen g edwiys.»

26 ewDen yetwali ecciyreθ nijerrasiyyen, δimqabel ecceT neljliyl. 27 max i yeggez yesuwε yelqeεεeθ yeεreDti eryaz seg θemuwreθ δiys ecyaĎen w ykan elyiriyDc edbac seg bekri, weliεemmerc g elHuwc, emme mabiyn iniylen. 28 max i yezre yesuwε, izeεweg yemmeHδef f ikreεnes yen s elquwweθ neSSuθes: «ac ihemmek δiyye eyesuwε emmiys nrebbi eεellay! exmelge eyeθεeδbec.» 29 yenne wahen εlexaTer yesuwε yennayes yerruwH temenzuwsθ eθeffeγ seg eryaz. w ykan diyme etteθmellaxi erruwH temenzuwsθ usiyn ebδen leεbaδ δeθeTfen bac e θeqnen s eslasel dimne, emme ykan diyme inekkeD g imne usiyn eθisuq ecciyĎan yelxle. 30 yenceδt yesuwε: «max ellesmex?» yer felles: «eljiyc.» εlexaTer uδefen δiys ecyaĎen egget. 31 mellegnes yyesuwε bac e nyetgellebc yiddar. 32 elweqθes kanen ellan eccebεeθ δiHellef retεen g eddehreθ, cawrent bac e θeδfen δiysen, yedjiyn. 33 efγen ecyaĎen seg eryaz eδfen g iHellaf, erwlen iHellaf ettezlen seg iddar yelγδiyr eγerqen diyn. 34 max i zriyn iniylten elli ySar, erwelen encren elxber g lemden ettimuwre. 35 efγen leεbaδ bac e reqben δmette iySar. esδen yyesuwε, efen eryaz elli effeγen essis ecyaĎen ygeεmez yetwali ikraεεen nyesuwε, yireD, δelεaqel, ukδen. 36 eHkenasen leεbaδ elli kanen diyn max i θysebre yesuwε, 37 ennanes midden ijerrasiyyen elkulhum yebεeδ fellasen εlexaTer ukkeδen egget. yini g elfluwkeθ yeδwel esyiyn. 38 emme eryaz elli effeγen essis ecyaĎen imelges yyesuwε bac e θyawi iyδes. welyeqbiylec yesuwε, yennes: 39 «eδwel yelHucex teHkiδasen s elli yegeyaxθ rebbi.» yexDem eryazdiyn yHekke g temuwreθ elkul s elli yegeyasθ yesuwε.

40 max i yeδwel yesuwε eεerDent leεbaδ elkul εlexaTer kanen etrajen δiys. 41 nette siyn yesδes eryaz ellesmes yayrus, emeqqar nelmejmeε, yemmeHδef f ikraεen nyesuwε imelges bac e yaδef elHuces, 42 εlexaTer γers tefruwxθ icθ elεemres eθnac nesne, εuddi eθjaf. unette maci γaSrent leεbaδ. 43 weθkan diyn temeTTuwθ γers enziyf seg eθnac nesne, teSref elli γers elkul f iĎbiyben weliged Hette iyjen etysebre, 44 teqreb yyesuwε s δeffer tlemmes eTTerf nedbeces, bedden iδammen g elweqθes. 45 yen yesuwε: «δ wiyn eyyilemmes?» enkren elkul, yen buTrus: «eyimuεellem, leεbaδ elkul etγeSaren δiyx uθeqqareδ δ wiyn eyyilemmes?» 46 yen yesuwε: «elziwiyn eyyilemmes εlexaTer Husse s elquwweθ teffeγ essi.» 47 max i θezre temeTTuwtdiyn elli yesuwε ifaq essis, tuseδes treggel temmeHδef f ikreεnes tennes ezzaθ nleεbaδ elkul imat itlemmes umax i θebre g elweqθes. 48 yennes: «eyelli, elimenem ymenεam, berre g eslam.» 49 unette iδukke, yuseδ emersal seg emeqqar nelmejmeε yen: «yelliyx eθjaf muc lazem eθqelqeδ imuεellem.» 50 yesl yesuwε, yennes yyayrus: «eθukδec! emmen berk uture eθemneε yelliyx.» 51 max i yiweD yelHuwc, elyedjiyc leεbaδ eθeδfen, kan δbuTrus dyuwHenna dyeεquwb ddaddes ntefruwxθ dyemmes. 52 leεbaδ elkul kanen tεeyĎen unedben f tefruwxθ. yennasen: «eθεeyĎemc, tefruwxθ eltjafc, emme tenεes.» 53 eSSen f elles, εlexaTer kanen essenen elli netteθ eθjaf. 54 yeTTef tefruwxtdiyn seg wefuses izeεweg felles: «ekker eθefruwxθ!» 55 teδwles erruHes tekker g elweqθes, yennasen ettessečen. 56 esθeγerben midnes, iweSSaθen bac e lHekken yHette Hed elli ySar.