1 g elweqtdiyn emlaymen laluf δleεbaδ elδeδuwlen εefsen g beεDhum, yen yesuwε yetlemδas qebl: «erreθ elbelennum seg elxmiyreθ nifarisiyyen elli nette ettixerxas. 2 εlexaTer elli yemmeHrez δeyemmezr, welli yemmejHeδ δeyemmessen. 3 welli δettennem g eθsellesθ δeθeslen leεbaδ g tefuwθ, welli δettennem s qiqqi g eθzeγwiyn δeberHen essis δenni lesquwf.

4 exennenne ha iSHibniyw: eθukδemc seg ihelli neqqen g elbδen usiyn elgedden egen Hette cey. 5 emme tay δexennenne s wiyn δeθukδem: ukδeθ seg wehelli iged beεεeδ enγe eylewweH g elεafyeθ. iyh, exennenne, wahen ukδeθ essis. 6 muc xemse δizanniwen etmanzen s zuwz suwrdi? leHebbe Hette iyjen essisen yetmettew γer rebbi. 7 Hette δezew nixfewnennum yemmeHseb elkul. eθukδemc, xenyum xiyr negget δizanniwen. 8 exennenne: elli eyesθeεref essi ezzaθ nleεbaδ, eyesθeεref essis bnaδem ezzaθ nelmlayxe nrebbi. 9 yemenni elli elyettesθeεriyfc essi ezzaθ nleεbaδ, elyettesθeεriyfc essis bnaδem ezzaθ nelmlayxe nrebbi. 10 welli eyen tuθleyθ f ebnaδem eyemsameH, emme elli δeyekfer f erruwH nelqudus elyettemsemiyHc. 11 umax eθemmawyem yelmjameε delHukkam delli γersen elHkum, eθeqelqemc max δeθerrem f imenennum ziyγ δmette δeθennem, 12 εlexaTer erruwH nelqudus δexenyen δmette δeθennem g elweqθes.»

13 yennes eryaz seg leεbaδdiyn: «eyimuεellem ennes yenje eyzuwn iyδi elwerθeθ.» 14 yennes: «eyeryaz, δ wiyn iyiHuT δelqaDi f ellawem ziyγ exenniyzun erziwwem?» 15 ubeεεeδ yen yleεbaδ: «erreθ elbelennum seg eTmeε, elHyaθ nelεebδ muc g elmelxes egget.» 16 yennasen elmθele: «ykan yelle eryaz δemuγni tirewes elqeεθes egget, 17 yen yimenes, <max δege, elγriyc meni δeHerze imendiyw?> 18 usiyn yenne, <δege sahen: essendre elmxezniyw ebniyγ g wemxenensen elmxazen ekber, usiyn eHuTTe δiysen ireδniyw delxireθiyw. 19 enne yimeniyw: γerm elxiyraθ egget emezzaneθ lesniyn xlaf, erθaH θečeδ tesweδ teθneεmeδ!> 20 yaxi yennes rebbi, <eyeδerwiyc, iδekan erruHex δetemmekkes essix. ywiyn wahen itHeDreδ elkul?> 21 usahen δeyejre yelli δeylayem yimenes umuc δemuγni γer rebbi.»

22 yen yetlemδas: «usahen exennenne: eθelhiymc yleHyeθennum δmette δeθečem, uyelbeδnennum δmette δeθirDem. 23 εlexaTer edder xiyr nweče, welbδen xiyr nwariD. 24 erqbeθ elgrebbe, eltzerreεc weltmedjerc, welγres la δelmxazen la δelgerajaθ, yemenni rebbi yettučasen uxenyum, elqimtewwem xiyr nizenniywen! 25 δ wiyn essiywem max eyelhe iged eyerni eγil iyjen yeTTules? 26 wiδekan elHajaθ timezyanin entgeddemc, imette iθlehhem s elbaqi? 27 erqbeθ eznabeq nijiyman max ekbarneθ: eltεekkiyc welteffalc. exennenne: Hette δesliyman g elεezzes elyiriyDc xiyr nicθ essisneθ. 28 wiδekan rebbi iraδ yelHec Haje emtah, elHec elli asse g ujiymi weječe g tunnurθ, menyeθ δexenyiyreD xenyum? yelli elimenewwem δuDεif! 29 weθeĎlbemc δmette δeθečem ziyγ δmette δeθeswem weθeqlqemc, 30 wahen Ďelben δiys midden neddunyeθ elkul, udaddeθwem elli lennej yessen elli ettesθHeqqent. 31 emme Hewmeθ elmemlxeθ nrebbi unette exenyerni wahen elkul. 32 eθukδc eyesεi emezyen! daddeθwem elli lennej δeyenεem f ellawem s elmelxes. 33 ezzenzeθ elli γerwem tSedqem elHeqqes f iqelliylen, tegem ticxar etherrinec δelkenz g esmawaθ liweqqiyc, meni leHebbe la δessareq yθaxer ula δessuws yetherre. 34 εlexaTer meni elkenzennum meni ulewnennum.

35 eθHezmeθ diyme čeεlem lebyelennum, 36 tebδam emiryazendiyn elli etrajen g siydiynsen seg islan, max eyeddes iδuq esmiyren liyhliyh. 37 SeHHe liyhum ixeddamen elli max eyrewweH siydiynsen enyaf elluciyn esheren. exennenne elHeq: δeycemmer f iγelnes yesgeεmezθen f eTTawleθ yexδemten. 38 SeHHe liyhum iδekan yuseδ uggezyen eθθani ziyγ eθθaleθ nδeggiyδ yafin HaDriyn. 39 emme esneθ wahen: lukan iθbab nelHuwc yessen lemmi δeyeddes exennab elyettedjiyc elHuces eyemmaxer. 40 HeDreθ imenennum diyme, εlexaTer bnaδem δeyeddes g elweqθ etrajiymc δiys.»

41 yennes buTrus: «ya siydiy, ennaHwe teqqareδ δiys ynečin ziyγ yleεbaδ elkul?» 42 yer felles seyyedne yesuwε: «δ wiyn nette ewkiyl eθθiyqeθ delεaqel elli iHuTTi siydiys bac e yuc yixeddemnes ečensen g elweqθ ellazem? 43 SeHHe liyh exeddamdiyn elli eθyaf siydiys max eyrewweH yxeddem g elxeδmtes. 44 exennenne elHeq: δeθiHuT elmelxes elkul. 45 emme iδekan exeddame yenne g imenes: <siydiy δeywexxer uggeδweles.>, yebδe yettewweθ g ixeddamen, erjal wense, wiθet wises wisexxer, 46 siydiys nuxeddamdiyn δeyeδwel uggas eθyetrejiyc δiys dessaεeθ etyessiync, δeθicerrex iHuTTi delxuyyan. 47 exeddam elli yessen δmette iyexs siydiys welyetHeDDerc imenes ziyγ elyθegc emmax i syeqqar, yelzem eyemmewweθ egget. 48 welli elyessiync δmette iyexs siydiys yeg Haje ettesθehal enγe, eyemmewweθ qiqqi berk. elli yemmuces egget eyemmeĎleb essis egget, welli eyemHuT egget eyemmeĎleb essis exθer.

49 useδe bac e lewHe elεafyeθ f elqeεεeθ, wencelleh eθkuwn tecεel! 50 uyelzmiyδ eqeble temeεmuwdiyyeθ nelwjayeε, umeDyeq uliyw elδeθekmel. 51 endre etteεlakmiyδ useδe bac e ge eslam f elqeεεeθ? exennenne: la, emme δezuwni, 52 seg asse δeyeδwel g elHuwc iyjen xemse, tlaθe δemεarxen dsen, usen dtlaθe. 53 eyemεarex eryaz dmemmis wefruwx ddaddes, temeTTuwθ dyelliys utefruwxθ dyemmes, temeTTuwθ ettesliθes utesliθ ettewesserθes.»

54 yen yleεbaδ xlaf: «max eθezrem esHabeθ tuwli seg eggaz ntefuwθ, enneθ elweqθes, <amzer δeyeggez>, uture eyeggez. 55 umax eyenfex jenuwbi enneθ, <δeyeδwel dechiyli>, uture eyeδwel siyn. 56 eyelli tesxerxuwsem! tessenem max i θeδwel elqeεεeθ desme, yemenni eltessinemc elεlamaθ nelweqθe?

57 wimette eltessinemc weHδawem δ menten elHeq? 58 max eθexDmeδ cex dweγrimex y elHakem, eg elli eθgeddeδ elkul bac e traDiyδ uggebriδ, bac e xyettewiyc y elHakem, yuwcex elHakem yelbuwlis, welbuwlis exylewweH g elHebs. 59 exenne: etteffγeδ esyiyn kan eθkemmleδ esuwrdi igluxxer.»