1 yeHkeyasen elmθel f eθzalliθ diyme menγiyr eqlaq, 2 yen: «ykan g icθ seg timuwre elqaDi elyettekkiyδc s rebbi welyetqedderc leεbaδ. 3 weθkan telle g temuwretdiyn tedjalt diyme txeDmes teqqares, <ewyiyδ elHeqqiyw seg eγrimiyw.> 4 w ykan elisellec edwiys, yemenni beεεeδ liyyam yen g imenes, <reγmelli ettekkiδc seg rebbi wetqedrec leεbaδ, 5 δesewye elHeqqes ytedjalte εlexaTer etqelleq δiyye, bac meεεač eyθeddes eθqelqiyδ.>» 6 yen seyyedne yesuwε: «esleθ elli yenni elqaDiye eDDalem, 7 endre rebbi esenyθewiyc elHeqqensen elli exθarent welli etεeyyeĎnes δeggiyδ ddugges? wendre δeywexxer g werre fellasen? 8 exennenne: δesenyawi elHeqqensen liyhliyh, emme as elli eyeddes bnaδem zeεme δeyaf eliman g elqeεεeθ?»

9 yen elmθele yleεbaδ kanen γersen eθθiyqeθ g imenensen elli nihnin δeSSuwlleH uHeqren g iddiynni: 10 «sen δiryazen uliyen δezzallen g elHuwc nelqudus, iyjen δefariysi w wissen seg ihelli etleyamen g lefluws. 11 ibed efariysi yezzal weHδes yen, <SeHHiyt ya rebbi! εlexaTer meniyc emleεbaδ iddiynni, iĎemmaεen, eDDullam ezzanyen, ziyγ meniyc emwah elli yetlayem g lefluws. 12 neč etzuwme g elimeθ merθiyn, wessufaγe g elεcer nelli essuδafe δiys elkul.> 13 emme wehelli yetlayem g lefluws ibed yebεeδ weligeddec eyqam tiTTewines lennej, emme ykan yetteddi f iδmernes uyeqqar, <ya rebbi, ereHmiyδ neč δelγaleĎ.> 14 exennenne: wahen elli yetlayem g lefluws, muc efariysiydiyn, yeggez yelHuces yemmeqbel δeSSaleH γer rebbi. εlexaTer elli eyεelle imenes eyeggez, welli eyessuggez imenes eyali.»

15 eγeδnes leεbaδ idrari Hette δimezyanen bac e yHuT fellasen ifesnes. max i nnezriyn etlamδe enzeren fellasen. 16 yaxi inebaθen yesuwε yennasen: «edjeθ idrari eyyeddasen wenterremc, εlexaTer elmemlxeθ nrebbi yelli emnihnin. 17 exennenne elHeq: elli liqebbelc elmemlxeθ nrebbi emmufruwx eθyetteδefc.»

18 yenceδt iyjen seg imeqqaren nuδayen erruwyyes: «eyimuεellem eSSaleH δmette δege bac e θurθe edder diyme?» 19 yer felles yesuwε: «imette etnabiyδ δiyye eyeSSaleH? eSSaleH kan δrebbi weHδes. 20 cex tesseneδ elwSaye, <eθezniyc, eθenγec, eθexrec, eθecehδc s ezzuwr, kerrem daddex dyemmex.>» 21 yen eryazdiyn: «seg max δemezyen uneč xeδme essisneθ.» 22 max i yesle yesuwε edwiye wahen, yennes: «eltuciyex elHajeθ icθ, ezzenz elli γerx elkul tferqeδ elHeqqes f iqelliylen, usahen eyeδwel γerx elkenz g esmawaθ, tesδeδ eθbεiyδ.» 23 yemenni max i yesle eryazdiyn edwiye yeHzen εlexaTer ykan δemuγni egget. 24 yezri yesuwε yeHzen yen: «menyeθ yuεer aδef nimuγniyyen g elmelx nrebbi! 25 aδef nwelγem g teHneyθ ntissiyniθ eshel nwaδef numuγni g elmelx nrebbi.» 26 ennen yihelli sellen: «δ wiyn δeyemneε ziyγ?» 27 yer yesuwε: «elli musteHiyl g leεbaδ yeshel γer rebbi.» 28 yennes buTrus: «tay nečin nedje elli γenne neθbεax.» 29 yer yesuwε: «exennenne elHeq: leHebbe Hette iyjen yedje elHuwc ziyγ ettemeTTuwθ ziyγ δemmaθen ziyγ δmidden ziyγ δidrari f elxaĎer nelmelx nrebbi, 30 eyawi g eddunyeθe leDεaf nelli yedje, ugeddunyeθ elli δettes g ellexxer yedder diyme.»

31 yawi etlamδe leθnac weHδasen yennasen: «tay nečin δenali yuwrceliym, welli uryent elkul lenbye f ebnaδem δeySar, 32 εlexaTer δeyemmuwc ytimuwre tiberreniyyin, eSSen felles ecemten δiys eskufsen felles, 33 usiyn δeθewθen s eSSuwT eθenγen, was eθθaleθ eyekker.» 34 yemenni ellefhimenc etlamδe Hette cey, edwiye ykan yemmeHrez fellasen weθefhimenc.

35 umax i yeqreb yesuwε seg eriyHa, w ykan yelle eryaz δileεmi ygeεmez f eccafeθ nwebriδ iĎelleb. 36 max i yHus s uθεeddi nleεbaδ yenceδ: «δmette wahen?» 37 ennanes: «yesuwε ennaSri δeyeθεedde esyah.» 38 izeεweg ileεmi: «yesuwε, eyemmiys ndawud elmlek, ereHmiyδ!» 39 enzren felles elli s ezzaθ bac e yesger, yaxi yeqqiym yetzeεweg exθer: «eyemmiys ndawud, ereHmiyδ!» 40 ibed yesuwε yennasen eθseqerben etweliys. max i yeqreb yenceδt: 41 «δmette iθexseδ exege?» yennes: «exse ezre, ya siydiy!» 42 yennes yesuwε: «erqeb, elimenex ymenεex.» 43 yeδwel izer g elweqθes yeθbeε yesuwε unette iHemmeδ g rebbi. max i zriyn leεbaδdiyn elli ySar mejδen rebbi elkulhum.