1 g elweqtdiyn wediyn, inabe elqeySer uγusTus yixeddamen nelqeSres welbeεδ yenneyasen: «eHsbeθ leεbaδ elkul g temurθiyw temeqqarθ.» 2 θahen tikkelt tigmezwerθ eySar δiys eHsab nleεbaδ elweqθelli ykan kiyriynyuws δelHakem f suwriyye. 3 elweqθes yrewweH kul iyjen ytemurθes meni emmarwen midnes bac e yqeyyeδ imenes. 4 yuwli yuwsef seg θemuwreθ ennaSreh g eljliyl yemreq ibiytleHm θemuwreθ ndawud g yehuwδa, 5 bac e yqeyyeδ imenes nette dmeryem texĎibθes elli tkan ettemeεδurθ. 6 unihnin g biytleHm, eθHus s esserwe tuseδes, taru 7 taγeδ memmis emenzu, teg sah eθqemmeti welbeεδ essenεesθi g elgurmeθ εlexaTer ellufinc meni eneεsen.

8 ykan g ecciyretdiyn iniylten nessen g elεre enni edhari. kanen etεussen f esεiynsen. 9 g δeggiyδ yefγasen elmlax, teg sah θeDDewwe eddunyeθ fellasen seg rebbi elmi twerεben iniyltendiyn. 10 yemenni elmlaxdiyn yenneyasen: «eθukδemc, rahu usiyγd δexennenne edwi δexenysefreH usinc eysefreH leεbaδ neddunyeθ elkul. 11 g temuwreθ ndawud yemmerwawem asse engluws δexenymenneε s ejhennem unette δelmesiyH memmis nrebbi. 12 θahen δellemareθ yxenyum, berreθ emerqeθ ibiytleHm uture eθafem engluws δimqemmeδ uyenεes g elgurmeθ.» 13 unihnin siyn yeffeγ δeffer elmlaxdiyn eljiyc δemeqqar s elmleyxaθ unihnin etsebHen yrebbi eqqaren: 14 «rebbi diyme δelεaliy, rahu eHebbec elεerx g elqeεεeθ elli ibarext rebbi.»

15 max i δuwlen elmleyxaθ yujenne, ennan essurreHdiyn jerasen: «eyye enemreq ibeytleHm usinc enenzi δmat elHkayeθ elli yenneyane felles rebbi.» 16 emerqen tezlen, afen meryem dyuwsef dwengluwsdiyn yenεes g elgurmeθ. 17 max i θezriyn, ennen essurraHdiyn ymeryem dyuwsef delli HDeren diyn δmat isliyn f wengluwsdiyn. 18 elweqθes esθeγerben leεbaδ elkul s edwiye. 19 yemenni meryem tHuTTi g ules teqqiym etxemmem δiys. 20 welbeεδ eδwlen essurraHdiyn f imenensen unihnin etsebHen yrebbi f elli zriyn eslen lexaTer kul cey ySar max i yenne elmlax.

21 max i yiweD elεemres θmenye eyyam δehrentiy, usemmanti yesuwε max i θisemme elmlax qebl nelli eθeδwel yemmes ettemeεδurθ essis. 22 beεδ yθekker meryem, iwyenti etwali elquds, θemuwreθ nrebbi, bac e yemĎehher diyn max i dyuwse g elxθab nmuwse. 23 max i yemmari g elxθab nrebbi: «engluws emezwar δeTTaher uδeyali δeSSaleH γer rebbi.» 24 usinc eγersen yrebbi sen δiδbiyren δimeqqaren uneγ sen δlefruwx δimezyanen max i yweSSe g elxθebes. 25 ykan g temuwreθ nelquds eryaz δeSSaleH uyessen rebbi wesmiθes semεan ykan yetraje g wiyn δeymenneε bni israYiyl, w ykan erruwH nrebbi iyδes. 26 as iyjen yuHayes erruwH nrebbi elli nette litmettiyc kan max eyzer elmesiyH. 27 yaδef yelHuwc nelqudus beεδ iθyuwzen erruwH nrebbi, elweqθes zade yuwδef yuwsef dmeryem seg memmiynsen bac e δuwcen felles δmat eyeĎleb elqanuwn nrebbi. 28 yeg sah yqami g weγiles welbeεδ ysebbeH yrebbi yen, 29 «ture, ha rebbi, δeyθedjeδ emmuwθe uneč δ imeθhenni max i θenniyδ. 30 lexeTerni ezriyγ δ wiyn δexenymenneε. 31 wediyn elli tuznetti yleεbaδ elkul. 32 bac e ysexn elHqiyqeθ elεebδ elkul usinc eyεelle uδayen. 33 esθeγerben midnes sedwiye elli slinti felles.» 34 ibarexθen semεan, yen yyemmes meryem, «wahen yemmazen bac e ysender egget usinc eyεelle egget δleεbaδ s uδayen elmeHaren δiys leεbaδ egget. 35 bac e θben elHqiqθensen ezzaθ nrebbi yemenni cem rahu δeθkezmeδ elmeyemmiyzem ulem.» 36 eθkan telle temeTTuwθ tessen rebbi egget, eθkan ettemeqqarθ g elεmer wesmiθes Henneh yelliys nfenuwiyl seg sebT eciyr, θedder dweryazes sebεe sniyn. 37 welbeεδ teδwel ettedjalt teqqiym siyn elmi tiweD erbεe uθmenyiyn εam. eθkan diyme etqiyme g elHuwc nelqudus tεebbeδ g rebbi g δeggiyδ ddugges s uzuwmi dusebbeH. 38 tikkelt temqabel Henneh dyuwsef dmeryem wiyδsen yesuwε g elheykel. elweqθes tebδe etsebbeH eddukke f elmesiyH yuδayen elli etrajen g iyjen eyged entimenneε. 39 beεδ ikemlen kul cey max i yenne rebbi g elxθebes, δwelen ytemuwreθ ennaSreh g eljliyl. 40 ykan englusdiyn yettekber s lewse s lewse uyetteθqewwe s erruwH nrebbi wules yetεebbe g elHekmeθ. yerni rebbi ykan iyδes.

41 kanen midnes merqen diyme yelquds g elfeSH, elmuwsem nuδayen elli yettesfekkerθen g was elli γleben imiSriyyen seg seddu ifesnensen. 42 max i yiweD elεemres eθnac, uliyen g elmuwsem yelquds emelεaδeθ. 43 umax i δuqaneθ liyyameθ nelmuwsem, eδwlen δerewHen yemenni yesuwε iγefelten yeqqiym g elquds δefrensen unihnin ellessinenc, etεilekenti yegguwr g wemmes nleεbaδ. 44 beεδ as kamel etteyuwriθ efeqδenti ebδen etHewmen felles jar leqerbensen diSHibnensen. 45 elweqθelli eθufiync, eδwlen yelquds etHewmen felles. 46 beεδ tlaθe eyyam ufinti g elHuwc nelqudus yeqqiym dimuεelmen isel g mat eqqaren winecceδ δiysen 47 esθeγerben leεbaδdiyn elkul s edwiys ulexaTer ifehhem egget. 48 elqulli zrinti midnes esθeγerben egget, tennes yemmes: «ha engluws, imat θegiyδ δiyne sah? imat eθεeddebδane tedjδane netHewwem fellex?» 49 yenneyasen: «imat itHewmem felle? yendre eltessinemc elli neč welmerqe kan yelHuwc ndadde?» 50 yemenni nihnin ellefhimenc edwi elli yenneyesenti. 51 welbeεδ yeggez etwali ennaSreh yrewweH iyδsen, useg wesses entiqelleqc siyn lexaTer nette isel g edwiynsen diyme yemenni yemmes eltettuwc edwiys xlaS. 52 yesuwε ykan yettekber kul yuwm, yeδwel zade yessen wifehhem egget yerni yucayes rebbi s enneεmθes yaf elqδer δemeqqar γer leεbaδ.