1 max i yqam yesuwε ixfes yerqeb yezre imuγniyyen etHuTTen g lefluws g eSSenduwq elli g elHuwc nelqudus. 2 yezer tedjalt etteqelliylt eθHuT sen δelfrenkaθ. 3 yen: «exennenne elHeq, tedjalte teqelliylt eθHuT exθer niddiynni. 4 εlexaTer nihnin HuTTen ezzayeδ f elHajθensen, yemenni netteθ tHuT elli eyezze ywedderes.»

5 max i bδen leεbaδ Hekken f elheykel max δimzeyyen s elkurδ yebhe delli Sedqent leεbaδ, yen yesuwε: 6 «wahen elli tzerrem δiys, δesyeddes as etqimiync δiys sent ettiγuwγe δenni beεDhum.» 7 encδent: «lemmi δeySar wahen eyimuεellem? uδmette nihenti elεlameθes?» 8 yennasen: «erreθ elbelennum bac e tmexδiεemc! εlexaTer δeddasen egget s ellesmiyw ennen, <enneč nette>, <elweqθ yeqreb>, enteθbεemc. 9 umax eθeslem s leHruwb duxaDi, etemmerεbemc, εlexaTer wahen yelzem eySar qebl, emme ellaxreθ etteseδc beεδensen gedged.» 10 usiyn yenneyasen: «timuwre δelmemlxaθ δekkerneθ f beεDhum, 11 δeddasen ezlazel δimeqqaren delmjaεaθ delwbayaθ, effeγneθ elεlamaθ essekkaδneθ dellayeθ ettimeqqarin seg esme. 12 emme qebl wahen elkul, leεbaδ δezlen fellawem ifesnensen εeδδebnawem, ucnawem yelmjameε dleHbuws, suqnawem bac e θbeddem ezzaθ nlemluwk delHukkam, uwahen elkul f elxeĎriyw enneč. 13 emme wediyn δexenyuc elweqθ bac e θecehδem. 14 emmale HuTTeθ g ulewnennum eθHeDremc edwinnum εle bekri. 15 εlexaTer δexennuwce edwi delHekmeθ eliged Hette Hed ayer fellasen welle entyeεkes. 16 Hette δmidnennum δexenselmen demmeθnennum delli qrebnawem dimeddukelennum, uyelle essiywem δ wiyn δeyemmenγ. 17 leεbaδ elkul δexennexrhen f elxaĎer nellesmiyw. 18 emme Hette ecceεreθ seg ixfewnennum wetmekkes. 19 s weTTefennum eSHiyH δeθerbHem imenennum.

20 umax eθezrem uwrceliym enneDen felles elεsaker, rahu elweqθ nwexlas yeqreb. 21 elweqθes elli g yehuwdiyye eruwlen yedhari, welli g elmdiyneθ ereHlen weθedjemc elli g ijiyman eserjεen. 22 εlexaTer liyyamdiyn δliyyam nunteqmi δeySar δiysneθ elli yemmari g elxθab. 23 emme yeHliylhum elli δeθeruwneθ delli essesfaneθ g liyyamdiyn, εlexaTer elqeεεeθ δeθeδyaq egget welγuc egget δeyeggez f leεbaδe, 24 δeθuDan s essiyf emsuqqen δimerbaT ytimuwre elkul, teqqiym uwrceliym εefsen δiys timuwre tiberreniyyin eleyekmel elweqθ ntimuwre tiberreniyyin. 25 uδeffeγneθ elεlamaθ g tefuwθ etteziyri diθran, teDyaq elqeεεeθ f leεbaδ elli Heyriyn εlexaTer iylel δeyhaj welmuwj δeyeεle. 26 leεbaδ δeδaxen seg elxuwf duraji nelli δeyeddes f elqeεεeθ, εlexaTer elqewwaθ nesme δeδeδefneθ beεDhum. 27 elweqθes ezren bnaδem yuseδ g esHab s elquwweθ delmejδ δemeqqar. 28 umax eyebδe wahen yetSar, ekreθ tqamem ixfewnennum εlexaTer elfδennum yeqreb.»

29 yennasen elmθel: «erqbeθ ytemečiyθ deccejreθ tiddiynni, 30 max eθeg tifray eθesnem elli enebδu yeqreb. 31 sahen xenyum zade, max eθezrem elHajaθe, esneθ elli elmemlxeθ nrebbi teqreb. 32 exennenne elHeq: lixeTTemc eljiyle kanc eySar wahen elkul. 33 esme delqeεεeθ δexDemneθ, emme edwiyw δeyeqqiym diyme.

34 emme erreθ elbelennum bac e tteδqelenc ulewnennum s ecciyxeθ dwesxar dlehmuwm neddunyeθ, yesδawem asdiyn menγiyr eθfaqem essis, 35 rahu emelmendaf δeysekker f elli εemren g elqeεεeθ elkul. 36 emmale esehreθ tezzallem diyme, bac e θemnεem s elli δeySar elkul, ubac e θbeddem ezzaθ nebnaδem.» 37 g dugges ykan yetseqre g elHuwc nelqudus wegδeggiyδ ykan yetteffeγ elberre yetqiyme g eddehreθ elli temsemme eddehreθ nuzemmuwr. 38 wegtalji bekri etteseδnes leεbaδ yelHuwc nelqudus bac e θesseγδen.