1 yaδef as nessebθ elHuwc niyjen seg imeqqaren nifarisiyyen bac e yeč, ukanen etreqaben δiys. 2 yaf ezzeθes eryaz δmaDun s usθesqi, ikreεnes entefxen. 3 yenceδ yesuwε imuεelmen necceriyεeθ delHezb nifarisiyyen: «γenne elHeq ensebre g essebθ ziyγ la?» 4 esegren, yeTTef yesuwε eryazdiyn seg efuses yeSSebraθ yezent yrewweH. 5 usiyn yenneyasen: «δ wiyn essiywem esyuDe memmis ziyγ δefuneses g esuγ as nessebθ weθinedzeγc?» 6 yaxi elgeddenc erren felles.

7 yezer elli eljmaεeθ seg ihelli mnaben ettexθaren g elblayeS tuggezzaθin, yen elmθele: 8 «max eθemnabiδ yumensi g islan, eθeqqimec g elkursi emezwar. balek yelle δ wiyn xirex g elli mnaben, 9 usiyn eyeddes elli ynebeyawem yennex, <uwces emxenex.>, elweqθes eθeθHecmeδ tekreδ ywemxan eldeffer. 10 emme max eθemnabiδ, eqqiym g wemxan eldeffer, umax eyeddes iθbab nislan yennex, <ekker lennej eyemeddukliyw>, elweqθes eθkebreδ g TiTTawin nihelli mnaben. 11 εlexaTer elli eyεelle imenes eyeggez elweddey, welli eyessuggez imenes eyali lennej.» 12 usiyn yenne yesuwε yelli inebaθ: «max eθegeδ elfĎuwr ziyγ δemensi, eθnebiyc imeddukelex ziyγ δemmeθnex ziyγ δiqribnex ziyγ δeljiyranex imuγniyyen, bac e xetnebiync Hette ennihnin, usahen eθewyeδ elHeq nunebiyx. 13 emme max eθegeδ emensi, nabe iqelliylen dimuεaqen delεuyyab dileεmyen. 14 uSeHHe liyk iδekan θegiyδ siyn εlexaTer elgeddenc exuwcen elHeqqes, δeθewyeδ elHeqqex as nelqiyameθ, as nwekkar niHeqqiyyen.»

15 max i yesle iyjen essisen edwiye yenne yyesuwε: «SeHHe liyh elli eygeεmez yelmiyδeθ g elmelx nrebbi!» 16 yer felles: «yege eryaz tikkelt emensi δemeqqar, inabe leεbaδ egget. 17 usiyn yuzen exeddemes g elweqθ nweče yeqqar yelli mnaben, <heyyeθ, kul cey yeHDer!> 18 yemenni ebδen elkulhum nedzγen g imenensen. yennes emezwar, <esγiyγ ejiymi uyelzmiyδ exeDme eθerqbe, samHiyδ.> 19 yen iyjen xlaf, <esγiyγ xemse zwaz nifunasen, uδexeDme enjerbe, samHiyδ.> 20 yen iyjen xlaf, <uγiyγ temeTTuwθ welgeddac eddase.> 21 yeδwel exeddamdiyn ysiydiys yennes elli ySar, yeθγeccec iθbab nelHuwc yen yuxeddemes, <effeγ ettezleδ yikeyyasen ntemuwreθ dlezneqes tessuwδfeδ iqelliylen dimuεaqen delεuyyab dileεmyen eldahen.> 22 ubeεδ yen exeddam, <egiyγ elli tenniyδ ya siydiy, weqqiymneθ elblayeS ettelfurraγ.> 23 yer felles siydiys, <effeγ yikeyyasen delmεaber, tessuwδfeδ leεbaδ embessiyf elδeyεebbe elHuciyw. 24 exennenne: elimeddi Hette iyjen seg ihelli nebiyγθen emensiyw!>»

25 kanen leεbaδ egget θebεen g yesuwε, yebren yennasen: 26 «lukan elli eyeddes unette welygeddec eybeHHel f daddes dyemmes, liweces didreriys, emmeθnes ettemmeθines, iyh Hette δimenes, eligeddec eyeδwel δiyjen seg etlemδaw. 27 elli elyetqamc eSlibes yeθbεiyδ eligeddec eyeδwel δiyjen seg etlemδaw. 28 lukan iyjen essiywem yexs eyebne elburj, elyetgeεmezc qebl yeHseb menyeθ δeyeθkellef bac e yzer iged eθikemmel ziyγ la? 29 iδekan yeHfer essas welyetgeddec eθikemmel, eSSen f elles leεbaδ elkul. 30 ennen, <eryaze yebδe ibenne weligeddec eykemmel.> 31 weδmenten elmlek elli eyeffeγ bac e yHareb elmlek xlaf, qebl eygeεmez icawer imenes eyged eyHareb sεecre laf elli yuseδes s εicriyn elf? 32 ziyγ esyazen emersal, maδame elyuwc yebεeδ felles, bac e mSalHen. 33 usahen eliged Hette iyjen essiywem weligeddec eyeδwel δettelmiδiyw, kan max eyedj elli γers elkul.

34 tisent tSelleH, yemenni max eθefseδ tisent δmette δettimelleH? 35 eltSelleH la yecal ula yuγebber, ettemlewwaH yebεeδ. elli γers timedjiyn selneθ edj eyesl.»