Ïïjjïn 11

Än Bääynä yen Baabïl

1 Aŋ ñomuk ku on me muure ŋommañ wic lemmä yeenen a keelok, aŋ a jiik keelkä ken jaaygä. 2 Aŋ wääna baŋŋene kä ñomuk ye, käññä nänṭä ḍääñgon gääpconḍe baan yaana battä me ogo Cïnnaar ye jï, aŋ iken cääjjin ïñï wïca.

3 Aŋ iken luugjin pääken ogo, "Bätïn düüca aŋ peelïn tey." Aŋ pämkä dalibuwin aŋ wäättana a düüca peelgon ken ñuugulene kä. Aŋ ŋomgu tïtkä dalibuwin aŋ wäättana a ḍiiney üllü ken ñuugulene kä. 4 Aŋ iken jaajjin ogo, "Ääte ïkïïn näŋïn baan mooye, aŋ ïkïïn bätïn än mooye bääyconḍe yaana wiñe wätcïdï ti polloŋ jï ye. Aŋ ïkïïn näŋïn yäṇtäŋgono nuŋko ŋana pïïrtïtïn kä ŋommañ wic."

5 Aŋ Pïṭo kääjin ïñï ükcïdï baan mooye ke än bääyconḍe yaana batä mäbaan ye. 6 Aŋ Pïṭo jaajjin ogo, "Iken a mä keelkä aŋ lemmä yeenen a keelok! Aŋ iken ikki jujjin kä nääŋkä ginani yaanni, iken batta bi yocu naŋŋä gin’a ṭäkkänä naŋgä ye. 7 Aŋ kaacïn ïñï lemmä yeenen cüülkïn daa gïtï, nuŋko ŋana yaŋkalaŋ jiik menen ookcedeeda gïtï."

8 Aŋ piirji gïtï woo Pïṭo ŋommañ wic muure, aŋ yuuttu ïñï kä baṇṇä baan mooye. 9 Ina ken äkkene daa me ogo Baabïl yaanna nääŋka Pïṭo mäbaan lepen cüülleeda gïtï muure, aŋ mäŋkalaŋ daa jaayee kä lemmä yeene yaanna, aŋ iken piirji gïtï woo Pïṭo ŋommañ wiñe ti muure.

Kaaynä Caam ke Abram ti

10 A perrä yen kaaynä Caam ikki. Wääna Caam yuunge aŋŋene kä 100 ye, aŋ wääna tääl baawkenee kä yuungu kä yewwe ye, ike gittä Arpiceet. 11 Aŋ wääna Arpiceet giidene daa me ye, Caam cääynä yuungu kä 500, aŋ gittä merkä oogen ke tïïrïn yakkalaŋ.

12 Aŋ Arpiceet cääynä yuungu 35, aŋ gittä Caale. 13 Aŋ wääna Caale giidene daa me ye, Arpiceet cääynä yuungu kä 403, aŋ gittä merkä oogen ke tïïrïn yakkalaŋ.

14 Aŋ Caale cääynä yuungu 30, aŋ gittä Aabir. 15 Aŋ wääna Aabir giidene daa me ye, Caale cääynä yuungu 403, aŋ gittä merkä oogen ke tïïrïn yakkalaŋ.

16 Aŋ Aabir cääynä yuungu 34, aŋ gittä Paalic. 17 Aŋ wääna Paalic giidene daa me ye, Aabir cääynä yuungu kä 430, aŋ gittä merkä oogen ke tïïrïn yakkalaŋ.

18 Aŋ Paalic cääynä yuungu 30, aŋ gittä Raaw. 19 Aŋ wääna Raaw giidene daa me ye, Paalic cääynä yuungu 209, aŋ gittä merkä oogen ke tïïrïn yakkalaŋ.

20 Aŋ Raaw cääynä yuungu 32, aŋ gittä Cïrü. 21 Aŋ wääna Cïrü giidene daa me ye, Raaw cääynä yuungu 207, aŋ gittä merkä oogen ke tïïrïn yakkalaŋ.

22 Aŋ Cïrü cääynä yuungu 30, aŋ gittä Nahüür. 23 Aŋ wääna Nahüür giidene daa me ye, Cïrü cääynä yuungu 200, aŋ gittä merkä oogen ke tïïrïn yakkalaŋ.

24 Aŋ Nahüür cääynä yuungu 29, aŋ gittä Taare. 25 Aŋ wääna Taare giidene daa me ye, Nahüür cääynä yuungu kä 119, aŋ gittä merkä oogen ke tïïrïn yakkalaŋ.

26 Aŋ Taare cääynä yuungu 70, aŋ gittä Abram ke Nahüür ke Araan.

Kaaynä Taare

27 A perrä yen kaaynä Taare ikki. Taare gittä Abram ke Nahüür ke Araan. Aŋ Araan gittä Luut. 28 Aŋ Araan ïïjjïn wäyen Taare yütte wic kä tüwnü baan battä me ogo Üür a yen mä Kaldaan nänṭä yaana giidene daa me ye ti. 29 Aŋ Abram ke Nahüür ḍiññä muuṭuk. Aŋ iŋ Abram battä me ogo Caarraay, aŋ iŋ Nahüür battä me ogo Maalka. Aŋ Maalka iken ke Icka a tïïrïn Araan yaana a Nahüür määden ina. 30 Aŋ Caarraay a burŋu batta a giidon merkä.

31 Aŋ Taare minneni yeene Abram koowne ke Luut minneni minneni yeene Araan ke Caarraay iŋ minneni yeene Abram, aŋ kaaccene kä woo nänṭ’a battä me ogo Üür a yen mä Kaldaan ye ti, atï ŋommañ mä Kanaan ti. Aŋ wääna ḍäägene ti baan yaana battä me ogo Araan ye, i cääjjin ïñï wïca. 32 Aŋ Taare cääynä yuungu 205, aŋ tüwnü baan Araan jï.