Ïïjjïn 26

Icaak ke Abimaliik

1 Aŋ käñ yaŋkalaŋ ŋuca äätin baan jï bata yaana näŋŋä ḍoŋe nïïnkä Abrayiim ti ina. Aŋ Icaak attä yätkä Abimaliik yen mä Palactïïn yaana cääy Jaraar ina ti. 2 Aŋ Pïṭo üükïn woo Icaak ti aŋ kiinne ogo, "Ŋana ïkï atä ïñï Macïr. Cääyä baan yaana bi kiinenii kä ogo cääyjey ko ye. 3 Cääyä baan yaanni ti agä boorgon, aŋ Ika bi ke ïkï aŋ ïkï bi ŋüülkeni. Aŋ bänkä yaakki bi iñenii kä muure ïkï ke kaaynä yüükü, aŋ Ika lïïttäŋŋi bi ḍaagä yaana lïïtkänä wääc Abrayiim ye. 4 Aŋ kaaynä yüükü bi naŋä ḍirä kä yaac bata kirkä yek polloŋ jïñe, aŋ bänkä yaakki muure bi iñä daa kä. Aŋ kä päy kaaynä yüükü ṭoŋ muure bi a ŋüülkïnï ŋommañ wic. 5 Kä yaana Abrayiim tiiŋgana kä jiik yaaka ṭäkkä ike ti ye aŋ tïïcee kä iininni yeeki, ke nüüṇṇüni yeeki ye." 6 Aŋ Icaak cääjjin baan battä me ogo Jaraar.

7 Aŋ wääna taajene daa kä ook yek baan yaanja kä iiŋe ye, i ike jaajjin ogo, "A käwo." I booc kä jaajjin ogo, "A iiŋ yeeni." Ike ḍüücï ogo ike bi nägjï ḍok mä baan yaanja ogo iiŋe Rïpga, kä yaana ŋeree kä ŋer kä yaac ye. 8 Aŋ wääna Icaak cääynee kä wïca nïïnkä kä ḍiräk ye, Abimaliik yätkä yen mä Palactïïn däämjin ïñï kä käälle yen än gunne aŋ Icaak yooṭṭe iiŋe Rïpga ñääjgede.

9 Aŋ Abimaliik Icaak bärkene aŋ kiinne ogo, "Ay, Rïpga ina a ïïŋü yaanna! Ïkï jaayä ogo käwic ina?"

Aŋ luugi Icaak ogo, "Ika booju, ika ḍuucu ogo mäŋkalaŋ ika bi nägjada ḍok aŋ koowje."

10 Aŋ Abimaliik jaajjin ogo, "A ŋaaka ina näŋgonoon kä aŋan yaanna? Aŋ naana yoku por mäŋkalaŋ ïïŋü nïïnne ye, ikoon yoku ickonoon ḍuuggin nääŋkä yaackä."

11 Aŋ Abimaliik me muure kolle ogo, "M’ana bi täpï yok men yaanni ke iiŋe ye tüwnü bi yoore ti."

12 Aŋ baan yaanja ti Icaak pïïttä käwkä, aŋ yun yaanna ti ike iṭṭä cuukulli päk 100 ḍiräk kä käwkä yaaka pïïṇṇe ye, nääŋka ike ŋüülkene daa kä Pïṭo ye. 13 Aŋ ike wäättä aŋŋa ceeggon mooye kä yaac, aŋ waak yeeke üüttïn kä ḍiirin. 14 Aŋ ike cääygene ḍiik ke däk ke kiinkä kä ḍiräk aŋ mämgi jï mä Palactïïn. 15 Aŋ jïïdgä piik muure yaaka küüñï kiinkä wäyen nïïnkä yek wäyen Abrayiim ti ye, cïkï mä Palactïïn kä ŋomgu.

16 Aŋ Icaak kiini Abimaliik ogo, "Aŋgä yorü ikoon ti. Ikoon borroon kä teynä."

17 Aŋ Icaak aŋgin yore wïca, aŋ attä keeññi yeeke ṭeljene ïñï Ḍääñgon mä Jaraar jï, aŋ cääjjin ïñï wïca. 18 Aŋ Icaak jïïdgä ḍuukke gomme yaaka küüñï me nïïnkä yek wäyen Abrayiim ti ye. Kä yaana cïkene daa mä Palactïïn wääna wäyen tüwnee kä ye. Aŋ äkkene kä yäṇtäŋgenen yaaka äkkene daa kä wäyen ñomuk ye.

19 Aŋ kiinkä Icaak küññü jïïn Ḍääñgon mä Jaraar jï, aŋ jïïn waŋe yaana yiiŋä kä piik ŋerkä ye kañi wïca. 20 Aŋ kaaydoni yek mä Jaraar äätin aŋ büültïn ke kaaydoni yek Icaak, aŋ jayok ogo, "Piik a yooko!" Aŋ Icaak jïïn äkkene ogo Icik nääŋka iken büültene kä ye. 21 Aŋ kaaydoni Icaak ŋuccin küññü jïïn yaŋkalaŋ, aŋ iken ŋuccin büültïn wïca jïïn yaanja ti. Aŋ äkki Icaak ogo Cittina nüütï ogo ätkïtïn. 22 Ike nänṭä yaanja bäkkene wic aŋ ŋuccin küññü jïïn yaŋkalaŋ wïca, aŋ baati m’ana ŋuca agene kä büültïnï kä ye. Aŋ äkki Icaak ogo Rabuut, aŋ jaajjin ogo, "Pïṭo ikoon iññon nänṭä, aŋ ikoon bi ḍiiron ŋommañ wic."

23 Aŋ Icaak wina daljene ïñï aŋ baŋŋä Bïïrcïba. 24 Aŋ wïïrïn jïñe yaanja ti Pïṭo üükïn woo ike ti, aŋ ike kiini ogo, "Ika agä Jooŋ yen wääc Abrayiim. Ŋana ïkï booju, Ika ke ïkï, ïkï bi ŋüülkeni aŋ kaaynä yüükü bi naŋä ḍirä kä waan yen kiingon yeeni Abrayiim." 25 Aŋ Icaak bättä tambal wïca, aŋ Pïṭo maaŋŋe. Aŋ keeñ yeene ṭeljene ïñï wïca, aŋ kiinkä yeeke küñjïn ïñï jïïn wïca.

Jiik Ḍoocin yek Icaak ke Abimaliik

26 Aŋ ääŋkalaŋ ti wina yätkä Abimaliik äätin ike ti ke Ahüjaat yaana ike nüütü kä nääŋkä yaaka bilti ye, ke Paykool ḍuuŋgon kääygä yeene ätä Jaraar. 27 Aŋ tääckiti Icaak ogo, "Ikee äätede ika ti ina? I ina ika putka jï, aŋ ika ñooṭṭa woo yaanna."

28 Aŋ iken luukcin ogo, "Yoorron kä ŋer Pïṭo ke ïkï. Aŋ ikoon jaajjonon ogo yoku lïïttäŋ bilto ti waadgo ti, ke ïkï. Ïkïïn ḍüccïn jiik ḍoocin. 29 Lïïtä ogo ikoon batta bi näŋgonda nääŋkä yaackä, bata yaana batta agini kä näŋgïnï kä nääŋkä yaackä ina, a nääŋkä ŋerkä ken näŋkiti kä kamat. Aŋ ïkï tucini woo kä ŋïïbbïn. Aŋ yooru yaana ŋüülkïnï kä Pïṭo ye."

30 Aŋ iken tutki Icaak ammani jon ñamme, aŋ ämmä aŋ mättä. 31 Aŋ kä tïṇṇäŋänä iken murjin ïñï mäŋkalaŋ daa menen lïïtkede, aŋ iici Icaak aŋ iken attä kä ŋïïbbïn.

32 Aŋ äŋ jïñe yaanja ti kiinkä yek Icaak äätin ike nüütkï kä jïïn yaana küüñï a kïcconḍe ye, aŋ kiini ogo, "Ikoon käññon piik!" 33 Aŋ Icaak jïïn äkkene ogo Cïba. Aŋ ke tiññaŋ baan yaanja wäättana battä me ogo Bïïrcïba, aŋ aŋan ogo, "Jïïn Lïïttäŋ."

34 Aŋ Ïïcü wääna yuunge aŋŋene caykä kä ŋan ye, ḍiññä määngä kä yew tïïrïn mä Haat ti, määnge a Yahudïït ṭul Beerï, aŋ Bacamaat ṭul Eylüün. 35 Aŋ a iken ken ääcin jon yiñe Icaak ke Rïpga ti.