1 Icaak daandin aŋ waŋge bunnu batta ŋuca yüṭï, aŋ minneni yeene mooye Ïïcü bärkene ti, aŋ kiinne ogo, "Minneni yeeni!"

Aŋ ike luugi ogo, "Ika inni."

2 Aŋ Icaak jaajjin ogo, "Ika ḍuuŋdunu, aŋ nïïnnä yeeni yen tüwnü kuju. 3 Kaay yüünü koowu ke cäwgälen, aŋ atä woo kiñuk aŋ näkkaa gin luum jïñe. 4 Aŋ tutkaa ginäämkä yaana ñabaŋ bilgä ye, aŋ ickaa kä dalä amä nuŋko ŋüülkenii i batta mor ika tüwü."

5 Aŋ wääna Icaak jaaynee ke minneni yeene Ïïcü ye, i tiŋtä Rïpga. Aŋ wääna Ïïcü attee kä woo luummuk kiñee kä waak luum jïñe aŋ äbedeeda ti ye, 6 i Rïpga minneni yeene Yaagüüp kiinne ogo, "Wääc tiiŋŋä määdic Ïïcü kiiṇde ogo, 7 ‘Ickaa gin luum jïñe, aŋ näŋgaa ginäämkä yaana ñabaŋ ye amä nuŋko ŋüülkenii Pïṭo ñome ti, i ika batta mor tüwü.’ 8 Minneni yeeni, jiik yeeki tiiŋä bata yaana kiindenii kä ye. 9 Atä kaacci ḍiik gïtï aŋ ickaa woo jüülonilen kä yew yaaka a caagin ye, dalä näŋgä wääc, a ginäämkä yaana ñabaŋ bilge ye. 10 Aŋ ickä wääc dalä ame nuŋko bi ŋüülkey kä, i ike batta mor tüw."

11 Aŋ Yaagüüp meen luuŋŋe ogo, "Määdo Ïïcü yore jüülaŋ, aŋ ika yori yïlaŋ. 12 Aŋ naana por ika tapa yok wäyo ye? Ika bi yoora ogo ike maldoo ŋïngïn. Aŋ ika batta bi ŋüülka, bi ṭääkcï ika tuuma."

13 Aŋ kiini meen ogo, "Dalä tuummu ḍïmjï ika ti, minneni yeeni! Näŋjä bata yaana kiinnenii kä ye. Atä aŋ jüülonilen ickaa kä."

14 Aŋ ike attä aŋ jüülonilen koowne aŋ ickene meen. Aŋ meen tuttu ginäämkä yaana ñabaŋ ye, bata yaana bilgänä wäyen ye. 15 Aŋ Rïpga kuññu buruŋgu ŋerkä yek minneni yeene mooye Ïïcü, yaaka äräk baanne ye, aŋ iiŋkene minneni yeene ḍeerconḍe Yaagüüp. 16 Aŋ kümme ïnke ti ke bugge ti, ke nänṭä ḍoŋe yaana yïdälaŋ ye kä gäykä jüülonilen. 17 Aŋ ike ginäämkä yaana ñabaŋ ke bïggï yaaka tooṇṇe ye iññe Yaagüüp ïṇte ti.

18 Aŋ Yaagüüp attä äräk wäyen ti, aŋ jaajjin ogo, "Wäyo."

Aŋ wäyen luukcin ogo, "Haa, minneni yeeni. Ïkï agä Ïïcü halla ïkï agä Yaagüüp?"

19 Aŋ Yaagüüp luukcin wäyen ti ogo, "Ika agä Ïïcü kaygon yüünü. Ika näŋŋä bata yaana kiinnaa kä ye. Juwu ñaalok aŋ yäŋŋä gin luum jïñe yeeni amä, nuŋko ŋüülkaa kä ye."

20 Aŋ taaji Icaak ogo, "Kaññi ogoo kä bïraŋ aŋŋi minneni yeeni?"

Aŋ luuŋŋe ogo, "Pïṭo yüünü Jooŋ ika yüükkana ti."

21 Aŋ Icaak Yaagüüp kiinne ogo, "Wüükü ti kä cokal dalä ïkï tabeni yok, aŋ ooku gïtï naana a ïkï Ïïcü minneni yeeni ye."

22 Aŋ Yaagüüp wükcïn ti wäyen ti, aŋ tabi yok Icaak. Aŋ ike jaajjin ogo, "Poŋ a poŋ Yaagüüp, aŋ ïnkä ke buggu a yek Ïïcü." 23 Aŋ batta agee kä ookon gïtï nääŋka ïnke ke bugge jüüle kä jüül bata määden Ïïcü ye. Aŋ Icaak yore tootte ṭäkï Yaagüüp ŋüülkede.

24 Aŋ taaññe ogo, "A gïtken ïkï agä minneni yeeni Ïïcü?" Aŋ luuŋŋe ogo, "Ee a ika."

25 Aŋ Icaak jaajjin ogo, "Yäŋŋä gin luum jïñe yüünü äckaa kä dalä amä, minneni yeeni. Nuŋko bi iñenii kä ŋüülkïn yeeni ye." Aŋ äckene daa Yaagüüp aŋ amme. Aŋ äckene määk aŋ maaṇṇe. 26 Aŋ kiini wäyen Icaak ogo, "Äätä ti kä cokal minneni yeeni, aŋ muckaa gimgin."

27 Aŋ ike wüükïn ti kä cokal aŋ muckene gimgin. Aŋ Icaak ŋääccä pin burŋu yeene, aŋ ike ŋüülkï, aŋ jaajjin ogo,

"Pin minneni yeeni beel bata pin yiil

yaana a ŋüülkïnï kä Pïṭo ye.

28 Dalä Jooŋ ïkï iñey tuñ yen polloŋ

ke cekkïtïn ŋommañ wiñe

ke päk ḍiirken

ke määk ḍiirken.

29 Dalä ṭoŋ ïkï ñuugilini,

aŋ ïkï ḍüŋkïtï ïñï,

aŋ wäätci agä mügdo yen mädgic

aŋ kaaynä miic dalä cäänna ïkï ḍüŋkïtï ïñï.

Aŋ tuummu wäätï m’aka ïkï tuumgi ye ti,

aŋ ŋüülkïn wäätï m’aka ïkï ŋüülkïtï ye ti."

30 Aŋ kä ḍeeraŋ aŋŋi wääna Icaak ḍaŋŋee kä ŋüülkïn Yaagüüp, aŋ Yaagüüp kaaccee kä woo wäyen ti ye, i määden Ïïcü kääjin äräk ätä kiñuk. 31 Aŋ ike cäänna näŋŋä ginäämkä yaana ñabaŋ ye, aŋ äckene wäyen, aŋ jaajjin ogo, "Juwu ñaalok wäyo ämä yäŋŋä gin luum jïñe yeeni, nuŋko iñja kä ŋüülkïn yüünü."

32 Aŋ taaji wäyen Icaak ogo, "Ïkï agä ŋaani?"

Aŋ luuŋŋe ogo, "Ika agä minneni yüünü Ïïcü kaygon yüünü."

33 Aŋ Icaak yore tïïcïn kä yaac, aŋ jaajjin ogo, "A ŋaani ken ina attä kiññä waak luum jïñe, aŋ ickana kä ammä muure i batta mor ïkï ḍäägä aŋ ŋüülkünü yaanna! Ee, aŋ ike bi a ŋüülkïnï a gïtken."

34 Aŋ wääna Ïïcü tiiŋŋee kä jiik yaakka wäyen ti ye, i ike weekcin kä yaac kä jon pille, aŋ wäyen kiinne ogo, "Ŋüülkaa cäänna ay wäyo!"

35 Aŋ kiini Icaak ogo, "Määdic äätin, aŋ ika malla ŋïngïn, aŋ ŋüülkïn yüünü koowne."

36 Aŋ Ïïcü jaajjin ogo, "Ike battä me ogo Yaagüüp*27.36 Yaagüüp ogo maldoŋïngïn kä lemmä mä Iburu. a gïtken. Ike aŋŋi ika malla ŋïngïn ääŋke kä yew, kaykïtïn yeeni koowne, aŋ tiññaŋ ŋüülkïn yeeni koowe cäänna." Aŋ taaññe ogo, "Ïkï batta agä büüccïnï ŋüülkïn yaana a yeeni ye?"

37 Aŋ Icaak Ïïcü luuŋŋe ogo, "Ike ḍaŋŋa naŋŋä a mügdo yüünü, aŋ mädgen muure naŋŋä a kiinkä yeeke, aŋ iññä päk ke määk. Aŋ ïkï bi naŋeni ogoo tiññani minneni yeeni?"

38 Aŋ Ïïcü wäyen taaññe ogo, "Wäyo, ïkï cääygi ŋüülkïn a keelok? Wäyo ŋüülkaa cäänna!" Aŋ Ïïcü weekcin kä yaac.

39 Aŋ wäyen Icaak ike luugi ogo,

"Ïkï bi cääyä woo kaakic cekkïtïn yen ŋommañ wiñe ti,

aŋ woo kaakic tuñ yen polloŋ jï ti.

40 Aŋ ïkï bi cääyä kä gaaḍal yüünü,

aŋ ïkï bi ñuugulu määdic ti,

aŋ naana ïkï ṭäkä ḍüŋü teetcädä woo ye,

i wiṇṇan yeene bi erci woo ḍoŋü ti."

41 Aŋ waan yaanja ti, Ïïcü Yaagüüp putkene jï kä yaana wäyen Yaagüüp iññeeda kä ŋüülkïn ye. Aŋ Ïïcü jaay joni ti ogo, "Waan nüüjdüŋ tüwnü wäyo cokilin, aŋ wäättan määdo Yaagüüp bi nägä ḍok."

42 Aŋ wääna Rïpga nüütkene daa me kä jiik minneni yeene mooye Ïïcü ye, i ike tuccin Yaagüüp ti, aŋ kiinne ogo, "Määdic Ïïcü ḍiigä jiik ogo, ïkï nägjïda ḍok. 43 Jiik yeeki tiiŋä ṭeṭaŋ minneni yeeni. Juwu aŋ lüüdü määdo Laabaan ti Araan. 44 Aŋ cääye ke ike kä ḍeeraŋ ke määdic jone lüye. 45 Aŋ naana ike jone lüynü, aŋ gin’a näŋgeneeda kä ye wiiṭṭe woo ye, i ïkï bi tuckeni ïkï ḍuuku. Ina kura ikee yääye muuric kä nïïnnä keellä?"

46 Aŋ Rïpga jaajjin Icaak ti ogo, "Üṇṇü yeeni putku jï kä määngä mä Haat. Naana Yaagüüp küjï iiŋ ṭulgu yek baan yaanni ti määngä mä Haat ti, bata määngä yek Ïïcü ye, päjjïdï iiñca yoku ika tüwü."