Ïïjjïn 29

Yaagüüp Ḍakkä ti Laabaan ti

1 Aŋ Yaagüüp ceeñjin kä wään yeene ke ḍake ti ŋommañ mä ñommuŋŋu ti. 2 Aŋ ike yurcin jïïn kä utar ke kurku kä ḍäk yek ḍiik nïnok ïñï jïïn taaŋŋe ti kïïjï puukkin piik. Aŋ jïïn tüke a üüljïnï kä pääm mooye peŋŋä. 3 Aŋ naana kurku ḍiik yoken ḍüülünü ti muure ye, i kaaydoni pääm ḍüljünü woo jïïn tük, aŋ ḍiik puukkunu piik, aŋ wäättan pääm ḍuukunu üüljünü jïïn tük.

4 Aŋ kaaydoni taaji Yaagüüp ogo, "Ikee age mä wa mädgo?"

Aŋ iken luukcin ogo, "Ikoon agon mä Araan."

5 Aŋ iken taaññe ogo, "Laabaan yaana daan wäyen a Nahüür ina ŋäjje?"

Aŋ iken luukcin ogo, "Ee, ŋäjjon."

6 Aŋ iken taaji Yaagüüp ogo, "Ike yore ŋeraŋ?"

Aŋ iken luukcin ogo, "Ee, ike yore ŋeraŋ. Daamjä a ṭuulle yeene Rahiil ina äätä kïdït kun ḍiik yaanja."

7 Aŋ ike luukcin ogo, "Wuuŋ mor a äŋ gïtï, batta mor a wuuŋ yen ḍüülïn ti kurku ḍiik nänṭä keellä. Ḍiik puukke piik, aŋ ḍuuke äämdük."

8 Aŋ iken luukcin ogo, "Ikoon batta lïïṭon, ke kurku ḍiik muure ḍäägene ti, aŋ wäättan pääm ḍüljon woo jïïn tük, aŋ ḍiik puukkon piik."

9 Aŋ Yaagüüp por daa ïïñjïdï jayok ke iken ke Rahiil ḍääge ti i kïdït kun ḍiik yek wäyen aŋ ike ken a kaaydo. 10 Aŋ wääna Yaagüüp Rahiil yoorreeda kä ke kun ḍiik yek nääyen Laabaan ye, ike attä jïïn ti aŋ pääm ḍüljene woo, aŋ ḍiik nääyen puukkene piik. 11 Aŋ wäättan Yaagüüp Rahiil muckene gimgin, aŋ weekcin kä yaac. 12 Aŋ Yaagüüp Rahiil nüütkene ogo ike agje ŋiiḍḍen ko wäyen ti, minneni yen woowen Rïpga. Aŋ Rahiil buurcin woo kä bïraŋ attä wäyen Laabaan nüütkene.

13 Aŋ kä bïraŋ aŋŋi wääna Laabaan tiiŋŋee kä ogo ñaakonḍe Yaagüüp ḍäägono ye, ike lüüṇṇü pärcete kä, aŋ kääŋŋe yok aŋ muckene gimgin, aŋ äbene ti paa. Aŋ Laabaan nüütkï Yaagüüp waak’a näŋŋä ḍuuggen muure ye. 14 Aŋ Laabaan jaajjin ogo, "Ïkï agä gaani ke yïmgä yeeki a gïtken." Aŋ Yaagüüp cääynä wïca ke näŋe paan.

Yaagüüp Ḍïjï Leya ke Rahiil

15 Aŋ Laabaan Yaagüüp kiinne ogo, "Ïkï batta ñuugulu ika ti käpet ogo ïkï cokuleey ti cokal ika ti. Aŋ nüütkaa iñdin yüünü bi a ŋïṭṭä?"

16 Aŋ Laabaan cääygene ṭulge kä yewwe. Mooye battä me ogo Leya aŋ ḍeerconḍe battä me ogo Rahiil. 17 Aŋ Leya waŋge a bunin, aŋ Rahiil ŋeraŋ biilke ti ke üükïnene woo ti. 18 Aŋ Yaagüüp Rahiil bilgene aŋ nääyen kiinne ogo, "Ïkï bi ñuugeleni yuungu kä ŋaṭükel naana ika iñdaa ṭüülü ḍeerconḍe Rahiil, wäätï a iiŋ yeeni ye."

19 Aŋ Laabaan jaajjin ogo, "Iiñca ŋeraŋ iñenii kä ïkï, kä yaana iñä daa kä oon yaŋkalaŋ yaana a pare ye. Cääyä ke ika winni." 20 Aŋ Yaagüüp ñuugilin yuungu kä ŋaṭükel ogo Rahiil, aŋ yuungu yaakka yoorre belok bata nïïnkä ḍeewken kä yaana billee kä Rahiil ye.

21 Aŋ wäättan Yaagüüp Laabaan kiinne ogo, "Iiŋ yeeni iñjakä dalä koowu nïïnon kä. Nïïnkä yeeki yek ñuugula yeeni ḍaaŋŋä."

22 Aŋ Laabaan näŋŋä ñäänkä, aŋ mäbaan barre muure ammani jonñamme ti. 23 Aŋ wääna nänṭä cücülenee kä ye, i ike ṭuulṭule yeene Leya ken koowne aŋ ickene Yaagüüp, aŋ nïngïn ke Yaagüüp. 24 Aŋ Laabaan kiingon yeene iiŋe Jïlpa iññe Leya ogo wääto ogo kiingon yeene.

25 Aŋ wääna Yaagüüp cuuyenee kä tïṇṇäk aŋŋi ye, i kaññe a Leya! Aŋ Yaagüüp Laabaan taaññe ogo, "A ŋaaka inni näŋganaa kä yaanni? Ïkï ñuugeleneni ogo Rahiil! Aŋ ika maldaa ŋïngïn ina?"

26 Aŋ luugi Laabaan ogo, "Koowdin ṭuul ḍeerconḍe mooye ñome ti batta a näŋon ḍoŋe poñku bänkä yooko ti. 27 Nïïnkä ŋaṭükel yek yaanni por ḍaagä, aŋ ikoon menen bi ŋuckini kä cäänna naana ïkï ḍukcini ika ñuugalanaa yuungu kä ŋaṭükel ŋuca ye."

28 Aŋ Yaagüüp näŋjin aŋan. Aŋ nïïnkä ŋaṭükel yaakka ḍaagi Yaagüüp Leya ti, aŋ wäättan Laabaan ṭuule Rahiil iññe Yaagüüp ogo wääto ogo iiŋe. 29 Aŋ Laabaan kiingon yeene iiŋe Bila iññe ṭuulle Rahiil ogo wääto ogo kiingon yeene. 30 Aŋ Yaagüüp nïngïn ke Rahiil cäänna, aŋ ike Rahiil bilge kä yaac kä Leya. Aŋ nääyen ñuugelene yuungu kä ŋaṭükel ŋuca.

Merkälen yek Yaagüüp

31 Aŋ wääna Pïṭo yuṭṭee Leya batta bilgene daa kä oore ye, naŋŋe giit aŋ Rahiil ken a burŋu. 32 Aŋ Leya laaccä aŋ giiṇṇä minneni a oon aŋ äkkene yäṇtäŋ ogo Robïïn,*29.32 Robïïn ogo yoorru, minneni kä lemmä mä Iburu. a yaana jaajjenee kä ogo, "Pïṭo yuṭṭu pillä yeeni, aŋ wäättan tiññaŋ ika bi bilgana oon yeeni."

33 Aŋ ike ŋuccin laaccä ŋuca, aŋ giiṇṇä minneni a oon. Aŋ jaajjin ogo, "Kä yaana Pïṭo tiiŋŋee kä ogo ika batta bilgada oori ye, ken inni iña kä minneni ŋuca yaanni." Aŋ äkkene yäṇtäŋ ogo Camoon.*29.33 Camoon ogo, m’ana tiŋit ye kä lemmä mä Iburu.

34 Aŋ ike ŋuccin laaccä ŋuca, aŋ giiṇṇä minneni a oon. Aŋ jaajjin ogo, "Tiññaŋ waan yaanni ti oon yeeni bi yore määre ti ika ti, kä yaana gitkänä daa merkälen oogen kä ḍäk ye." Aŋ ina ken äkkeeda kä yäṇtäŋ ogo Laawï*29.34 Laawï ogo, marcin ti yor kä lemmä mä Iburu. yaanna.

35 Aŋ ike laaccä ŋuca, aŋ giiṇṇä minneni a oon. Aŋ jaajjin ogo, "Waan yaanni ti, ika bi mäŋä Pïṭo." Aŋ ina ken äkkeeda kä yäṇtäŋ ogo Yahüüja*29.35 Yahüüja ogo, maaŋŋä kä lemmä mä Iburu. yaanna. Aŋ wäättan ike yuuttu ïñï kä giidä.