Gênesis 50

Jïŋŋä yen Yaagüüp

1 Aŋ Yuucip wäyen ḍimgene gïtï, aŋ weekcin aŋ kunne yok. 2 Aŋ Yuucip ñuuguloni yeeke iingene ogo wäyen tükkïï yokïn waak pïlkä ke ñownä nuŋko ŋana rotjeko, aŋ tükkï yokïn. 3 Aŋ ike nääkin nïïnkä caykä kä ŋan, i tükü yokïn kä waak pïlkä ke ñownä, aŋ a nïïnkä yaaka a ḍoocin tutene me m’ana a tüwon ye. Aŋ mä Macïr nüüññü nïïnkä caykä kä ŋaṭükel.

4 Aŋ wääna nïïnkä nüüjdüŋ baakkenee kä ye, i Yuucip ḍuuŋkulen yek Parahuun kiinne ogo, "Naana ika käñä ŋerrä ikee ti ye, i kura jiik yaakki icke Parahuun. 5 Wäyo ika daljana lïïttä, aŋ ika kiinna ogo, ‘Ika cokulunu tüwnü, aŋ jïgja ṭuum yaana tutkunu ḍoŋi ŋommañ mä Kanaan ye ti wïca.’ Aŋ aŋŋi dalä ika kura atä wäyo jïkä ïñï aŋ ika bi ḍuuku."

6 Aŋ Parahuun luukcin ogo, "Ee, atä wääc jïgä bata yaana daljeney kä lïïttïï kä ye." 7 Aŋ Yuucip attä wäyen jïge. Aŋ ḍuuŋkulen muure yek Parahuun attä iken ke me mäyken muure yek ŋommañ mä Macïr, 8 aŋ cäänna ke mä äntüke yen Yuucip muure ke mädgen ke mä äntüke yen wäyen. Büccïdï a merkälen ke ḍiik ke däk yeeken ken dalji ïñï pääken baan mä Jiicaan jï. 9 Aŋ attä kä teebälaŋŋi yek bägälgä kääygä ke m’aka taabit bägälgä ye, aŋ a ṭoŋ ḍiirken.

10 Aŋ wääna ḍäägene ti nänṭä keennä päk Adaat wii mä Üürdün taaŋŋañja kä ñomuk ye, iken nüüjjïn kä yaac kä nüüjdüŋ mooye, aŋ iken nüüññü nïïnkä kä ŋaṭükel kä wäyen. 11 Aŋ wääna mä Kanaan yuṭṭene nüüjdüŋ nänṭä keennä päk Adaat ye, iken jaajjin ogo, "A nüüjdüŋ mooye mä Macïr ti." Ina ken nänṭä yaana Üürdün taaŋŋañja kä ñomuk batte daa me ogo Abil Macïr yaanna.

12 Aŋ merkä Yaagüüp näŋjin bata yaana daa kiinneeda kä ye. 13 Aŋ gaane koowi aŋ iji ŋommañ mä Kanaan jï, aŋ jïgï ṭuum yaana yiil Makapeela jï ye, cokulaŋ ti Mamar, nänṭ’a kiyi Abrayiim Aproon yen mä Haat ti ye, ogo nänṭä jïïgïn. 14 Aŋ wääna Yuucip wäyen jïkkeeda ïñï ye, ike ḍukcin Macïr ke mädgen ke m’aka äätene jïŋŋä wäyen ti ye muure.

Yuucip Mädgen Lüüye Jugin

15 Aŋ wääna Yuucip mädgen wäyen yoorene daa kä tüwnee kä ye, iken jaajjin ogo, "Yuucip ïkïïn bi pütkïn gïtï kä yiñ yaana näŋkïnïn daa ina."

16 Aŋ iken tuccin jiik Yuucip ti ogo, "Wääc ikoon iingonon i batta mor tüw, 17 aŋ jaay ogo, ‘Kura mädgic kulku kä nääŋkä yaackä ke yiñ yeenen yaana näŋgini kä ye.’ Aŋ tiññaŋ kura kulkoon kä nääŋkä yaackä yooko, ikoon agon kiinkä Jooŋ yen wääc." Aŋ Yuucip weekcin wääna kiinene daa mädgen aŋan ye. 18 Aŋ mädgen muure äätin ti ike ti aŋ ḍiimdin ïñï ñome ti, aŋ jaajjin ogo, "Ikoon agon kiinkä yüükü."

19 Aŋ Yuucip jaajjin iken ti ogo, "Ŋana ikee booje kä ika. Halla ika cääyä nänṭä Jooŋ? 20 Ikee ika näŋgana yiñ, aŋ ṭaaki Jooŋ naŋŋe a ŋerrä, ogo tïïcco ko üṇṇü yen me ḍiirken yaaka a üdïn tiññaŋ yaakki. 21 Ŋana ikee booje, ikee bi tïïje ke merkä yeekic." Aŋ lüüyne juuggin kä jiik ŋerkä yaaka täpcin ti juuggen ti ye.

Tüwnü yen Yuucip

22 Aŋ Yuucip mor daa cääy Macïr ke mä äntüke yen wäyen. Aŋ yuunge aŋŋa 110. 23 Aŋ ike cääynä ke yuṭe merkä yek Ipiraayim ke merkä yeeken. Aŋ ike cääynä ke yuṭe merkä yek Makïïr minneni Manacca aŋ ken naŋŋe a yeeke.

24 Aŋ Yuucip mädgen kiinne ogo, "Ika cokulunu tüwnü, Jooŋ bi ätä ikee ooke a gïtken, aŋ ikee bi koowe baan yaanni ti, aŋ ikee bi ije baan yaana lïïtkenee Abrayiim ke Icaak ke Yaagüüp ye ti."

25 Aŋ Yuucip mä Icärayiil kiinne ogo ike lïïtkïï, aŋ kiinne ogo, "Jooŋ bi ätä ikee ooke a gïtken, aŋ äwgi koowe winni aŋ ije." 26 Aŋ Yuucip tüwnü i yuunge a 110. Aŋ gaane tükkï me yok waak pïlkä ke ñownä nuŋko ŋana rotdeeko, aŋ ḍooci me kuun jïŋŋä yeene jï Macïr.