1 ଶାଉଲ୍‍ ସ୍ତିଫାନ୍‍ତେ ଡଲାନାଦିଙ୍କ୍ ସମର୍ତନ୍ ମାଡ଼୍‍ତନ୍ ।

ଆଦ୍ ଦିନେକନ୍ସ୍ ଯିରୁଶାଲେମ୍‍ତେ ମଣ୍ଡଲି ସେଙ୍ଗେ ତାଡ଼ନା ଆରାମ୍ ଆତ୍‍ତେ । ପ୍ରେରିତ ଶିଷ୍ୟଡ଼୍‍କ୍ ୱିଡ଼୍‍ସି ମେଣ୍ଡେ ସାରେତଡ଼୍ ବିଶ୍ୱାସୀଡ଼୍ ଯିହୁଦା ନୁ ଶମିରୋମ୍ ଦେଶ୍‍ତେ ପଡ଼ିୟେତାଗ୍ ୱେକ୍‍ୱେକ୍ ଆତ୍‍ତଡ଼୍ । 2 ବେସ୍‍କ୍‍ତୁଡ଼୍‍ ଇଶ୍ୱର୍‌ତେ ବକ୍ତନଡ଼୍‌ ଗାଟି ଲେଙ୍ଗ୍‍ଦେ କେୟିମିକା ସ୍ତିଫାନ୍‍ତେ ମଡ଼୍‍ତିଙ୍କ୍ ସମାଦି ହିତ୍‍ତଡ଼୍ ।

3 ✝ ୮:3 ପ୍ରେରିତ ୨୨:୪,୫; ୨୬:୯-୧୧. ବାତେଙ୍କ୍ ଇତ୍କେ ଶାଉଲ୍‍ ମଣ୍ଡଲିତିଙ୍କ୍ ଦଂସ ମାଡ଼ାନଙ୍କ୍ ଆଲ୍‍ସି ମାଡ଼୍‍ତଣ୍ଡ୍, ଲକ୍ ଲକ୍ ଆଞ୍ଜ୍ କ୍ରିଷ୍ଟ ବିଶ୍ୱାସୀ ମାନେୟ୍‍ ନାଟାଙ୍କ୍ ସାରେତଡ଼୍‌କିଂଙ୍କ୍ ଲାଗିତାସ୍ ଜଇଲ୍‍ତାଗ୍ ତୁର୍‍ତଡ଼୍ ।

4 ୱେକ୍ ୱେକ୍ ଆତ୍‍ତେ ବିଶ୍ୱାସିଡ଼୍ ସାରେଏକାମ୍ ଆଞ୍ଜ୍ ସୁସମାଚାର୍‍ ପ୍ରଚାର୍ ମାଡ଼୍‍ତଡ଼୍ । 5 ଶମିରୋମ୍ ମୁକ୍ୟ ନାର୍‍ତାଗ୍ ଆଞ୍ଜ୍ ଫିଲିପ୍‍ପ, ଆଗେତ୍ ନାରୁଡ଼୍‍କିଂଙ୍କ୍ ମସୀହାନାଦ୍ ସୁସମାଚାର୍ ପ୍ରଚାର୍ ମାଡ଼୍‍ତଣ୍ଡ୍ । 6 ଫିଲିପ୍‍ପନ୍‍ ଗଟି କେଞ୍ଜି ନୁ ଅନ୍‌‍ୱାଦ୍ ଆଶର୍ଯ୍ୟ ପାଡ଼୍‍ୟି ଉଡ଼ି ନାରୁଡ଼୍ ମେଣ୍ଡେ ଅଦିକ୍‌ ଗଟି କେଞ୍ଜାଙ୍କ୍ ଇଚ୍ଛା ମାଡ଼୍‍ତଡ଼୍ । 7 ନାର୍‍ଗେ ନାରୁଡ଼ାଗାଙ୍କ୍ ବୁତ୍‌କ୍ କିଡ଼୍‍କି କିଡ଼୍‍କି ପେଇସ୍ ଆତ୍‍ତା, ନାର୍‍ଗେ ପକ୍ୟାଗାତ୍ ରଗି ନୁ କୁଟାଲଡ଼୍ ସୁସ୍ଥ ଆତ୍‍ତଡ଼୍ । 8 ଇଦିନ୍ ସେଙ୍ଗେ ଆଦ୍ ନଗର୍‍ତେ ନାରୁଡ଼୍ ଗାଟି ୱେଡ଼୍‍କ୍‍ତଡ଼୍ ।

9 ଶିମୋନ୍ ପେଦେର୍‍ତଣ୍ଡ୍ ୱେରଣ୍ଡ୍ ନାରୁଡ଼୍ ଅନ୍‌‍ୱାଦ୍ ମନ୍ତ୍ର ବିଦ୍ୟାତଡ଼୍ ଆଦ୍ ଦେଶ୍‍ତେ ନାରୁଡ଼୍‍କିଂଙ୍କ୍ ଆଶର୍ଯ୍ୟ ମାଡ଼ି ନେହେସ୍ ମାତ୍‍ତଣ୍ଡ୍ । ଅଣ୍ଡ୍‌ ନିଜେତିଙ୍କ୍ ୱେରଣ୍ଡ୍ ବେଡ଼୍‍ୟେ ନାରୁଡ଼୍ ଇଞ୍ଜ କେସ୍ ସମରୀୟାତେ ସାରେ ନାରୁଡ଼୍‍କିନ୍ ଲୋପେଙ୍କ୍ ବାଡ଼୍‍ୟଣ୍ଡ୍ ଆସ୍ ମାତ୍‍ତଣ୍ଡ୍ । 10 ଅଣ୍ଡ୍‌‍ ନିଜ୍‍ତିଙ୍କ୍‍ ଅର୍‍ତୁଣ୍ଡ୍‍ ବାଡ଼୍‍ୟଣ୍ଡ୍ ଇଞ୍ଜ୍‍ କେସ୍‍ ସମାଜ୍‍ତେ ସାରେ ନାରୁଡ଼୍‍ ଲୋପେଙ୍କ୍‍ ବାଡ଼୍‍ୟଣ୍ଡ୍‍ ଆସ୍‍ମାତ୍‍ତଣ୍ଡ୍‍ । ଅଡ଼୍‌ କେସ୍‍ମାତ୍‍ତଡ଼୍, "ଅଣ୍ଡ୍‌ ‘ମହାଶକ୍ତି’ ପେଦେର୍‍ତଣ୍ଡ୍ ଇଶ୍ୱର୍‌ତେ ଅଣ୍ଡୟ୍‌ ଶକ୍ତି ।" 11 ଆଦ୍ ମନ୍ତ୍ର ବିଦ୍ୟାତଡ଼୍ ନାର୍‍ଗେ ଦିନ୍ ଯାକ ଶମିରୋଣ ନାରୁଡ଼୍‍କିଂଙ୍କ୍ ତାନ୍ ଶିଷ୍ୟ ମାଡ଼ି ନେହେସ୍ ମାତ୍‍ତଣ୍ଡ୍ । 12 ବାତେଙ୍କ୍ ଇତ୍‍କେ ଫିଲିପ୍‍ପ ପେଦେର୍‍ ଇଶ୍ୱର୍‌ତେ ରାଜ୍ୟ ନୁ ଜିସୁ କ୍ରିଷ୍ଟନ୍ ବିଷୟ୍‍ତେ ସୁସମାଚାର୍‍ କେଞ୍ଜି, ଅନ୍‌ ସେଙ୍ଗେ ନାରୁଡ଼ାଦ୍ ବିଶ୍ୱାସ୍ ଜନମ୍ ଆତ୍‍ତେ ନୁ ଆଦ୍ ଜାଗେତ୍‍ ସାରେ ନାଟା ନୁ ମାନେୟ୍‍ ଏର୍‍ଦିକ୍ୟା ଗ୍ରହନ୍ ମାଡ଼୍‍ତଡ଼୍ । 13 ଶିମୋନ୍ ନିଜେ ଆଦ୍ ଗଟ୍‍ତିଙ୍କ୍ ବିଶ୍ୱାସ୍ ମାଡ଼୍‍ତଣ୍ଡ୍ । ଫିଲିପ୍‍ପ ତଡ଼୍ ମାଡ଼ିମାନ୍ଦାନ୍ ଆଦ୍‍ବୁତ୍‌ ନୁ ଆଶର୍ଯ୍ୟ ପାଡ଼୍‍ୟି ଉଡ଼ି ଅଣ୍ଡ୍‌ ଏର୍‍ଦିକ୍ଷା ଗ୍ରହନ୍‍ ମାଡ଼ି ଫିଲିପ୍‍ପ ତଡ଼୍ ମାତ୍‍ତଣ୍ଡ୍ ।

14 ସମରୀୟାତେ ନାରୁଡ଼୍ ଇଶ୍ୱର୍‌ତେ ଗଟ୍ ଗ୍ରହନ୍ ମାଡ଼୍‍ତଡ଼୍ ଇଞ୍ଜ ଯିରୁଶାଲେମ୍‍ତାଗ୍ ମାନ୍ଦାନ୍ ପ୍ରେରିତ ଶିଷ୍ୟଡ଼୍ କେଞ୍ଜି, ପିତର୍ ନୁ ଯୋହନ୍‌ତିଙ୍କ୍ ଅଡ଼୍‌ ଗାର୍‍ରେ ରହତଡ଼୍ । 15 ଅଡ଼୍‌ ଆଗେ ଏୱୁତ୍‍ତେ ପେର୍‍କେ ଶମିରୋନୀୟ ବିଶ୍ୱାସୀଡ଼୍ ବେଲା ପବିତ୍ର ଆତ୍ମା ଦର୍‍କିତ୍, ଆଦିନ୍ ସେଙ୍ଗେ ପ୍ରାର୍ତନା ମାଡ଼୍‍ତଡ଼୍ । 16 ବାତେଙ୍କ୍ ଇତ୍‍କେ ଆସୁଟ୍‍ ଯାକ ଅଡ଼୍‌ ଲୋପେଙ୍କ୍ ବେନ ପର୍‍ର ପବିତ୍ର ଆତ୍ମା ଡିଗ୍‍ୱେ ମାତ୍‍ତେ । ଅଡ଼୍‌ ମାତର୍ ଜିସୁ ପ୍ରବୁନ୍‌ ପେଦେର୍‍ତେ ଏର୍‍ଦିକ୍ଷା ଗ୍ରହନ୍ ମାଡ଼ି ମାତ୍‍ତଡ଼୍ । 17 ପିତର୍ ନୁ ଯୋହନ୍‌ ଅଡ଼୍‌ ପର୍‍ର କାୟି ୱାଟ୍‍ତେ ସାଙ୍ଗେ ସାଙ୍ଗେ ଅଡ଼୍‌ ପବିତ୍ର ଆତ୍ମା ପାଏମ୍‍ଆତ୍‍ତଡ଼୍ ।

18 ଶିମୋନ୍ ଉଡ଼୍‍ତଣ୍ଡ୍ ଯେ, ପ୍ରେରିତ ଶିଷ୍ୟଡ଼୍ ବିଶ୍ୱାସୀଡ଼୍ ପର୍‍ର କାୟ୍‍ ୱାଟ୍‍ତାଙ୍କ୍ ଅଡ଼୍‌ ପବିତ୍ର ଆତ୍ମା ପାଏମ୍‍ଆତ୍‍ତଡ଼୍ । ଆଦିଙ୍କ୍ ଅଣ୍ଡ୍‌ ପିତର୍ ନୁ ଯୋହନ୍‌ତିଙ୍କ୍ ଡାବ୍‍କ୍ ଇସ୍‌ କେତ୍‍ତଣ୍ଡ୍, 19 "ନାନ୍ ବାଗାତ୍ ନାରୁଡ଼୍ ପର୍‍ର କାୟ୍‍ ୱାଟ୍‍କେ, ଅଡ଼୍‌ ବେଲାକି ପବିତ୍ର ଆତ୍ମା ଦର୍‍କିତ୍, ଆଦିଙ୍କ୍ ନାକିଂଙ୍କ୍ ଇଦ୍ ଅଦିକାର୍‌‍ ହିମ୍ ।"

20 ବାତେଙ୍କ୍ ଇତ୍‍କେ ପିତର୍ ଅଂକିଙ୍କ୍‌ କେତ୍‍ତଣ୍ଡ୍, "ନି ତଡ଼୍ ନିୟାୱୁ ଡାବ୍‍କ୍ ଗାଲା ଦସଂ ହାୟି, ବାତେଙ୍କ୍ ଇତ୍‍କେ ଡାବ୍‍କ୍ ତଡ଼୍ ନିମ୍‍ ଇଶ୍ୱର୍‌ତେ ଦାନ ହାସାନଙ୍କ୍ ହାଲ୍‍ସୁତି ! 21 ମାୱାଦ୍ ପଡ଼୍‍ୟେତାଗ୍ ନିୱାଦ୍ ବାତ୍‍ମିକା ବାଗ୍‍ ଇଲ୍‍ଲେ । ବାତେଙ୍କ୍ ଇତ୍‍କେ ଇଶ୍ୱର୍‌ତେ କଣ୍ଡେତେ ନିୱାଦ୍ ହୃଦୟ୍ ସାୟେ ଆୟ୍‍ୟ । 22 ଆଦିଙ୍କ୍ ନିୱାଦ୍ ହୃଦୟ୍ ତାଦ୍‍ ଇଦ୍ କାରାପ୍ ଚିନ୍ତେ ସେଙ୍ଗେ ହେର୍କେ ମାଡ଼ାଟ୍‍, ଇଦ୍ ରକମ୍ ଚିନ୍ତେ ମାଡ଼ିମାନ୍ଦାନଙ୍କ୍ ପ୍ରବୁ ବେଲା କ୍ଷମା ମାଡ଼ିତନ୍, ଆଦିନ୍ ମାଇଦିଙ୍କ୍ ପ୍ରବୁଙ୍କ୍ ପ୍ରାର୍ତନା ମାଡ଼େ । 23 ବାତେଙ୍କ୍ ଇତ୍‍କେ ଉଡ଼ୁତାନ୍ ଯେ ନିୱାଦ୍ ହୃଦୟ୍ ଇର୍ଷାତଡ଼୍ ବର୍ତ୍ତି ଆତ୍‍ତେ, ନିମ୍‍ କାରାପ୍ ପାଡ଼୍‍ୟି ତଡ଼୍‍ ବନ୍ଦନ୍‍ତାଗ୍ ବନ୍ଦି ହାସ୍‍ମିନ୍ଦେନି ।"

24 ଶିମୋନ୍ ଅଡ଼୍‌‍କିଂଙ୍କ୍ କେତ୍‍ତଣ୍ଡ୍, "ମିଡ଼୍ ବାତ୍ କେତୁତିଡ଼୍, ଆଦ୍ ବେଲାକି ନା ପର୍‍ର ୱାଡ଼୍‍ମାକି, ଇଦିନ୍ ସେଙ୍ଗେ ଦୟାମାଡ଼ି ପ୍ରବୁଙ୍କ୍ ପ୍ରାର୍ତନା ମାଡ଼ାଟ୍ ।"

25 ସାକ୍ଷ୍ୟ ଇସ୍‌ ନୁ ପ୍ରବୁନ୍ ସୁସମାଚାର୍‍ କେତ୍‍ତାନ୍ ପିତର୍ ନୁ ଯୋହନ୍‌ ଯିରୁଶାଲେମ୍‍ତାକ୍ ମାଲ୍‍ସ୍ ଆଦ୍‍ତଡ଼୍ । ମାଲ୍‍ସ୍ ୱାଦାନ୍ ୱେଲେ ହାର୍‍ଦାଗ୍ ଅଡ଼୍‌ ଶମିରୋଣ ଦେଶ୍‍ତେ ନାର୍‍ଗେ ନାଆକି ନାଗ୍‍ ସୁସମାଚାର୍ କେତ୍‍ତନ୍ ।

26 ପ୍ରବୁନ୍‍ ୱେରଣ୍ଡ୍ ଦୂତ୍ ଫିଲିପ୍‍ପତିଙ୍କ୍ କେତ୍‍ତଣ୍ଡ୍, "ତିଆର୍ ଆସ୍ ମାନୁଟ୍, ତିନ୍ଦେପାକ୍ ଯିରୁଶାଲେମ୍‍ କନ୍‍ସ୍ ଗାଜାତାକ୍ ଆତ୍‍ତେ ଆଦ୍‍ ହାର୍‍ ଆନୁଟ୍ ।" ଇଞ୍ଜେ ଆଦ୍ ହାର୍‍ଦାଗ୍ ବେନଗାଲା ଆଦ୍‍ଦା ୱାଦା ମାଡ଼ଣ୍ଡ୍ । ଆଦ୍‍ ପଡ଼୍‍ୟେତାଗ୍‍ ବେନ ଇଲ୍‍ୱେମାତ୍‍ତଣ୍ଡ୍‍ । ଇଞ୍ଜେ ଆ ଆର୍‍ ବେନ ଅନ୍‌‍ନଡ଼୍ ବା ବ୍ୟବହାର୍‍ ମାଡ଼ଡ଼୍‍ । 27 ଫିଲିପ୍‍ପ ତିଆର୍ ଆତ୍‍ତଣ୍ଡ୍ । ଆସୁଟେ ଇଥିଓପିଆତ୍ ରାଜ୍ୟତେ କାଣ୍ଡକି ରାଣୀନ୍ ରାଜତିଙ୍କ୍ ଶାସନ୍‍ ମାଡ଼ନଣ୍ଡ୍ ମାନ୍ଦାନ୍ ଇଥିଓପିଆତେ ୱେରଣ୍ଡ୍ ୱାଞ୍ଜାଲ୍ କର୍ମଚାରୀ ତାନ୍ ଲୋନ୍‌ ମାଲ୍‍ସ ମାତ୍‍ତଣ୍ଡ୍ । ଅଣ୍ଡ୍‌ ଇଶ୍ୱର୍‌ତିଙ୍କ୍ ପୁଜା ମାଡ଼ାନ୍ ସେଙ୍ଗେ ଯିରୁଶାଲେମ୍‍ ଆଞ୍ଜ୍‍ ମାତ୍‍ତଣ୍ଡ୍ । 28 ଅଣ୍ଡ୍‌‍ ଆଦ୍ ରତ୍‌ତାଗ୍ କୁଦି ଲୋନ୍‌ ମାଲ୍‍ସ ମାତ୍‍ତଣ୍ଡ୍ । ଆଦ୍ ରତ୍‌ତାଗ୍ ମାଲ୍‍ଦାନ୍ ୱେଲେ ଯିଶାଇୟ ବାବବାଦୀ ବଇ ଗାଟି ଲେଙ୍ଗ୍‍ଦେ କାର୍‍ସ ମାତ୍‍ତଣ୍ଡ୍ । 29 ପବିତ୍ର ଆତ୍ମା ଫିଲିପ୍‍ପଙ୍କ କେତ୍‍ତେ, "ଆଦ୍ ରତ୍‍ତେ ବକେତ୍ ଅନ୍‌ ନୁ ଆଦିନ୍ ଗାର୍‍ରେ ମାନ୍‍ ।" 30 ଫିଲିପ୍‍ପ ମିରି ମିରି ଆତ୍‍ତଣ୍ଡ୍ ନୁ ଆ କର୍ମଚାରୀ ଯିଶାଇୟ ବାବବାଦୀନ୍ ବଇ ଗାଟି ଲେଙ୍ଗ୍‍ଦେ କାର୍‍ସ ମାନ୍ଦାନାଦ୍ କେଞ୍ଜ୍‍ତଣ୍ଡ୍ । ଅଣ୍ଡ୍‌ ଅଂକିଙ୍କ୍‌ ପାଚ୍ରାମାଡ଼୍‍ତଣ୍ଡ୍, "ନିମ୍‍ ବାତ୍ କାର୍‍ତୁତି, ଆଦ୍ ବୁଜେମ୍ ଆଦୁତି କି ?"

31 କର୍ମଚାରୀ ଉତ୍ତର୍ ହିତ୍‍ତଣ୍ଡ୍, "ବେନ ଅନୁରଦ୍‌‍ ମାଡ଼ାନାଦ୍‍ ୱେରଣ୍ଡ୍ ବୁଜାମାଡ଼ିୱ କଟ ମାତ୍କେ, ନାନ୍ ବେଲା ବୁଜେମ୍ ଆଦ୍‍ତାନ୍ ?" ତାନ୍‍ତଡ଼୍ ରତ୍‌ତାଗ୍ କୁଦାନ୍‍ ମାଇଦିଙ୍କ୍ ଅଣ୍ଡ୍‌ ଫିଲିପ୍‍ପତିଙ୍କ୍ କାର୍‍ଙ୍ଗ୍‍ତଣ୍ଡ୍ । 32 ଅଣ୍ଡ୍‌ ଦର୍ମଶାସ୍ତ୍ରତାଦ୍ ଇଦ୍ ବିଷୟ୍ କାର୍‍ସ୍ ମାତ୍‍ତଣ୍ଡ୍; "ହାୱ୍‍କାନ୍ ମାଇଦିଙ୍କ୍ ଆଦାନ୍ ମେଣ୍ଢା ଲେକାମ୍, କେଲ୍‍କ୍ କୟ୍‍ଦାନ୍‍ ୱେଲେ କଟମାନ୍ଦାନ୍ ମେଏଣ୍ଡେ ଲେକାମ୍, ଅଣ୍ଡ୍‌ ଅଣ୍ଡୟ୍‌ ପଦ୍‍ବା ଗଟ୍‍ ତିର୍‍ୟଣ୍ଡ୍ । 33 ଅଣ୍ଡ୍‌ ଅପମାନିତ ଆତ୍‍ତଣ୍ଡ୍ ନୁ ନ୍ୟାୟତାଗାଙ୍କ୍ ବଞ୍ଚେମ୍‍ ଆତ୍‍ତଣ୍ଡ୍ । ତାମ୍ ବଂଶତଡ଼୍‍ ବିଷୟ୍‍ତେ ବେନ ବାଆତେ କେତାଙ୍କ୍ ପାର୍‍ୱଡ଼୍, ବାତେଙ୍କ୍ ଇତ୍‍କେ ପୃତିବିତାଗ୍ ଅଡ଼ାଦ୍‌ ଜିୱୁଣ୍ଡ୍ ତେରି ଆତ୍‍ତେ ।"

34 ୱାଞ୍ଜାଲ୍‍ କର୍ମଚାରୀ ଫିଲିପ୍‍ପତିଙ୍କ୍ ପାଚ୍ରାମାଡ଼୍‍ତଣ୍ଡ୍, "ବାବବାଦୀ ବେନ ବିଷୟ୍‍ତେ ପ୍ରାର୍ତନା ମାଡ଼ୁତଣ୍ଡ୍, ନାକିଂଙ୍କ୍ କେଲାଟ୍ । ତାନ୍ ନିଜେତ୍ ବିଷୟ୍‍ତେ ନା ମେଣ୍ଡେ ୱେରଣ୍ଡ୍ ବିଷୟ୍‍ତେ ?" 35 ଫିଲିପ୍‍ପ ଦର୍ମଶାସ୍ତ୍ରତେ ଇଦ୍ ବାକ୍ୟତାଗାଙ୍କ୍ ଆରାମ୍ ମାଡ଼ି ଜିସୁନ୍ ବିଷୟ୍‍ତେ କେତ୍‍ତାଦ୍ ସାରେ ସୁସମାଚାର୍‍ ଅଂକିଙ୍କ୍‌ କେତ୍‍ତଣ୍ଡ୍ । 36 ଅଡ଼୍‌ ହାର୍‍ଦାଗ୍ ଆଦାନ୍ ୱେଲେ ଅଣ୍ଡୟ୍‌ ଏର୍‍ୱେତାଗ୍ ଏୱୁତ୍‍ତଡ଼୍ । ୱାଞ୍ଜାଲ୍‍ କର୍ମଚାରୀ କେତ୍‍ତଣ୍ଡ୍, 37 "ଇଗେ ଏର୍‍ ମିନ୍ଦା, ଇଞ୍ଜେ ନାକିଂଙ୍କ୍ ଏର୍‍ଦିକ୍ଷା ଆଦାନଙ୍କ୍ ବାତ୍ ଅସୁବିଦା ମିନ୍ଦ୍‍ କି ?"*୮:୩୭ ଫିଲିପ୍‍ପ ଅଂକିଙ୍କ୍‌ କେତ୍‍ତଣ୍ଡ୍, ନିମେ ଅଂକିଙ୍କ୍‌ ବାତିସ୍ମ ଇମ୍ ଯଦି ନିମେ ଇୱୁସାରେ ବିଶ୍ୱାସ୍‍ ମାଡ଼ୁତିନ୍ ।

38 ୱାଞ୍ଜାଲ୍‍ କର୍ମଚାରୀ ରତ୍‌ତିଙ୍କ୍ ନିଲ୍‍ସ୍ପାନଙ୍କ୍ ଗଟ୍ ହିତ୍‍ତଣ୍ଡ୍ । ଫିଲିପ୍‍ପ ନୁ କର୍ମଚାରୀ ଏର୍‍ଦେ ଲୋପେ ଆତ୍‍ତଡ଼୍ ନୁ ଫିଲିପ୍‍ପ ଅଂକିଙ୍କ୍‌ ଏର୍‍ଦିକ୍ଷା ହିତ୍‍ତଣ୍ଡ୍ । 39 ଅଡ଼୍‌ ଏର୍‍ତାଗାଙ୍କ୍ ତେଦି ୱାତ୍‍ତେ ପେର୍‍କେ ପ୍ରବୁନ୍‍ ପବିତ୍ର ଆତ୍ମା ଫିଲିପ୍‍ପଙ୍କ୍ ମାପିତ୍‍ତେ । କର୍ମଚାରୀ ମେଣ୍ଡେ ଅଂକିଙ୍କ୍‌ ଉଡ଼ାଙ୍କ୍ ପାର୍‍ୱଣ୍ଡ୍, ବାତେଙ୍କ୍ ଇତ୍‍କେ କୁସି ଆସ୍ ତାନ୍ ହାର୍ ଆତ୍‍ତଣ୍ଡ୍ । 40 ବେସ୍‍କେ ଦିନାତ୍‍ ପେର୍‍କେ ଫିଲିପ୍‍ପ ଉଡ଼୍‍ତଣ୍ଡ୍ ଜେ ଅଣ୍ଡ୍‌ ଅସଦୋଦତାଗ୍ ଏୱୁତ୍‍ତଣ୍ଡ୍ । ଆଗାଙ୍କ୍ ଅଣ୍ଡ୍‌ କାଇସରିଆତାଗ୍ ଆତ୍‍ତଣ୍ଡ୍ ନୁ ହାର୍‍ଦାଗ୍ ମାନ୍ଦାନ୍ ଟାଉନ୍‍କିନାଗ୍ ସୁସମାଚାର୍‍ ପ୍ରଚାର୍ ମାଡ଼୍‍ତଣ୍ଡ୍ ।