1 ଆ ନେଲ୍‌ଞ୍ଜିନେ କୋଡ଼ିଏ ନାଲୁଦିନା ଇସ୍ରାଏଲତେ ମାର୍‌କିଡ଼୍‌ ଅଣ୍ଡୟତାଗ୍‌ ଆସ୍‌ ଉପବାସ ମାଡ଼ି, ବାସ୍ତା କେର୍ସ୍‌ ନୁ ନିଜର ନିଜର ତାଲେତ୍‌ ପର ଦୁମ୍‌ ଆସ୍‌ ଅଣ୍ଡୟତାଗ୍‌ ଇତ୍‌ତଡ଼୍‌। 2 ମେଣ୍ଡେ, ଇସ୍ରାଏଲତେ ପିଲୁଡ଼୍‌ ବିଦେଶିୟ ସାରେତଡ଼୍‌କନ୍‌ ମିକିଙ୍କ୍‌ ୱେର୍‌ ମାଡ଼ି, ମେଣ୍ଡେ ନିସ୍‌ ନିଜର ନିଜର ପାପ୍‌ ନୁ ନିଜର ନିଜର ଆନିଦାଦିଡ଼୍‌ ପାପ୍‌ ମାନେମ୍‌ ଆତ୍‌ତଡ଼୍‌। 3 ମେଣ୍ଡେ, ଅଡ଼୍‌ ନିଜେ ନିଜେ ପଡ଼୍‌ୟେତାଗ୍‌ ନିସ୍‌ ଦିନ୍‌ତେ ମୁଣ୍ଡ୍‌ଗଣ୍ଟା ଏୱୁନା ସଦାପ୍ରବୁ ମିକିଙ୍କ୍‌ ପରମେଶ୍ୱରତେ ନିୟମ୍‌ ବଇକନ୍‌ କାରିୟିତଡ଼୍‌ ନୁ ୱେର୍‌ତ୍‌ ମୁଣ୍ଡ୍‌ଗଣ୍ଟା ଏୱୁନା ଅଡ଼୍‌ ପାପ୍‌ ମାନେମ୍‌ ଆସ୍‌ ସଦାପ୍ରବୁ ପରମେଶ୍ୱରତିଙ୍କ୍‌ ମଡ଼୍‌କତଡ଼୍‌। 4 ମେଣ୍ଡେ, ଲେବିୟଡ଼୍‌, ଯେଶୂୟ ନୁ ବାନି, କଦ୍‌ମୀୟେଲ, ଶବନୀୟ, ବୁନ୍ନି, ଶେରେବୀୟ, ବାନି ନୁ କନାନି ପାଉଞ୍ଚ୍‌ତାଗ୍‌ ନିସ୍‌ ସଦାପ୍ରବୁ ପରମେଶ୍ୱରଦିଙ୍କ୍‌ ଗାଟି ଲେଙ୍ଗ୍‌ଦେ କାର୍‌ଙ୍ଗ୍‌ତଡ଼୍‌।

5 ଯେଶୂୟ ନୁ କଦ୍‌ମୀୟେଲ, ବାନି, ହଶବନୀୟ, ଶେରେବୀୟ, ହୋଦୀୟ, ଶବନୀୟ ନୁ ପତାହିୟ, ନୁ ଲେବିୟଡ଼୍‌ କେତ୍‌ତଡ଼୍‌, ତେଦାଟ୍‌, ମୁନେତ୍‌ କାଲାକନ୍‌ ଅନନ୍ତ ସାରେଦିନାତ୍‌ ମାଇଦିଙ୍କ୍‌ ସଦାପ୍ରବୁ ମିଇ ପରମେଶ୍ୱରଦେ ଦନ୍ୟବାଦ୍‌ ମାଡ଼ାଟ୍‌; ମେଣ୍ଡେ, ସାରେ ଦନ୍ୟବାଦ୍‌ ନୁ ପ୍ରଶଂସାକନ୍‌ ଉନ୍ନତି ମିଇ ପ୍ରତାପାନ୍ୱିତ ପେଦେର୍‌ ଦନ୍ୟ ଆୟି। 6 କେବଳ ମିଡ଼େ ହିଁ ସଦାପ୍ରବୁ ନି; ମିଡ଼୍‌ ସ୍ୱର୍ଗ, ସ୍ୱର୍ଗତେ ସ୍ୱର୍ଗ ନୁ ଆଗେତ୍‌ ସାରେ ଦୁତ ବାହିନି ପୃଥିବି ନୁ ଆଗେତ୍‌ ସାରେ ବସ୍ତୁ, ସମୁଦ୍ର ନୁ ଆଗେତ୍‌ ସାରେ ବସ୍ତୁ ତିଆର୍‌ ମାଡ଼ିମିନ୍ଦେଡ଼ି ନୁ ନିମେ ସାରେତଡ଼୍‌ ଜିୱେ ଇସ୍‌ମିନ୍ଦେନି ସ୍ୱର୍ଗୀୟ ଦୁତ ବାହିନି ନିକିଙ୍କ୍‌ ମଡ଼୍‌କିତା। 7 ମିଡ଼୍‌ ହିଁ ସଦାପ୍ରବୁ ପରମେଶ୍ୱର, ମିଡ଼େ ଅବ୍ରାମ୍‌ତିଙ୍କ୍‌ ହେଞ୍ଚିତିନ୍‌ ନୁ କଲଦିୟଡ଼୍‌ ଊର୍‌ ଦେଶକନ୍‌ ଆଦିଙ୍କ୍‌ ପେସ୍ପିତାସ୍‌ ଅବ୍ରାମ୍ ପେଦେର୍‌ ଇତ୍‌ତିନ୍‌; 8 ମିଡ଼୍‌ ନିଜର ମୁନେ ଅନ୍‌ ଅନ୍ତଃକରଣ ବିଶ୍ୱସ୍ତ ଉଡ଼୍‌ତିଡ଼୍‌, ମେଣ୍ଡେ କିଣାନୀୟ ନୁ ହିତ୍ତୀୟ, ଇମୋରିୟ, ପରିଷୀୟ, ଯିବୂଷୀୟ ନୁ ଗିର୍ଗାଶୀୟ ନାରୁଡ଼୍‌ ଦେଶ ଇଦାନଙ୍କ୍‌, ବା ଅନ୍‌ ପିଲୁଡ଼ତିଙ୍କ୍‌ ଇଦାନ୍‌ମାଇଦିଙ୍କ୍‌ ଅଂକିଙ୍କ୍ ଗଟ୍‌ ଇତ୍‌ତଡ଼୍‌, ମେଣ୍ଡେ ନିଜର ବାକ୍ୟ ସଫଳ ମାଡ଼ିମିନ୍ଦେଡ଼ି; ବାତେଙ୍କ୍‌ଇତ୍କେ ମିଡ଼୍‌ ଦର୍ମମୟ। 9 ଆଗାକନ୍‌ ମିଡ଼୍‌ ମିସର ଦେଶତେ ମା ଆନିଦାଦିଡ଼୍‌ କଷ୍ଟ ଉଡ଼୍‌ତିଡ଼୍‌ ନୁ ସୂଫ ସାଗର୍‌ତେ ଗାରେ ଅଡ଼୍‌ କେୟାନାଦ୍‌ କେଞ୍ଜ୍‌ତିଡ଼୍‌; 10 ମେଣ୍ଡେ, ଫାରୋ ନୁ ଅନ୍‌ ସାରେ ଦାସଡ଼୍‌ ନୁ ଅନ୍‌ ଦେଶତେ ସାରେ ନାରୁଡ଼୍‌ ପର ବାତ୍‌ବାତେ ଚିନ୍ନେ ନୁ ବାକ୍‌ୱା ପାଡ଼ିୟ୍‌ ତତ୍‌ତିଡ଼୍‌; ବାତେଙ୍କ୍‌ ଇତ୍କେ ମିସ୍ରୀୟଡ଼୍‌ ଅଡ଼୍‌ ବିରୁଦ୍ଦତେ ଗର୍ବ ମାଡ଼ାନାଦ୍‌ ମିଡ଼୍‌ ପୁତ୍‌ତିଡ଼୍‌; ଇଦିଙ୍କ୍‌ ମିଡ଼୍‌ ନେଣ୍ଡ୍‌ ଆୟିନା ନିଜର ପେଦେର୍‌ ପ୍ରସିଦ୍ଦ ମାଡ଼ିମିନ୍ଦେଡ଼୍‌। 11 ମେଣ୍ଡେ, ମିଡ଼୍‌ ଅଡ଼୍‌ ମୁନେ ସମୁଦ୍ରତିଙ୍କ୍‌ ଦୁଡ଼୍‌ ମାଡ଼୍‌ତିନ୍‌, ଆସୁଙ୍କ୍‌ ଅଡ଼୍‌ ୱାସ୍ତେ ବୁମ ଇସ୍‌ ଆଦାନ୍‌ଲେ ସମୁଦ୍ରକନ୍‌ ଆତ୍‌ତଡ଼୍‌; ମାତର୍‌ ନାର୍ଗେ ଏର୍‌ଦାଗ୍‌ କାଲ୍‌ ଲେକାମ୍‌ ମିଡ଼୍‌ ଅଡ଼୍‌ ପେର୍‌କେ ତଲାନ୍‌ ନାରୁଡ଼୍‌କିଙ୍କ୍‌ ନାର୍ଗେ ଗୁଇନ୍ଦେ ସମୁଦ୍ରତାଗ୍‌ ହେସ୍‌ତିନ୍‌। 12 ମେଣ୍ଡେ, ନିମେ ନାର୍କାତ୍‌ ୱେଲେ ମୟଲ୍‌ ଗୁଞ୍ଜେତ୍‌ ତଡ଼୍‌ ନୁ ନାର୍କା ଅଡ଼୍‌ ଆଦାନ୍‌ ଆର୍‌ଦାଗ୍‌ ୱେସ୍‌ ଆଦାନ୍‌ ମାଇଦିଙ୍କ୍‌ କିସ୍‌ଗୁଞ୍ଜେ ତଡ଼୍‌ ଅଡ଼୍‌କିଂଙ୍କ୍‌ ତାସ୍କ୍‌ତିନ୍‌। 13 ବା ନିମେ ସିନୟ ମେଟେତାଗ୍‌ ଡ଼ିଗିୱାସ୍‌ ସ୍ୱର୍ଗକନ୍‌ ଅଡ଼୍‌ ତଡ଼୍‌ ତିରିୟାତିରିୟି ମାଡ଼୍‌ତିନ୍‌ ନୁ ଅଡ଼୍‌କିଂଙ୍କ୍‌ ନିଜାମ୍‌ତେ ଶାସନ ନୁ ସତ୍‌ ନିୟମ, ସାହେ ରୀତି ନୁ ଆଦେଶ୍‌ ଇତ୍‌ତିନ୍‌; 14 ମେଣ୍ଡେ, ଅଡ଼୍‌କିଂଙ୍କ୍‌ ନିଜରତେ ପବିତ୍ର ରମାନ୍ ଦିନାମ୍‌ ପୁଞ୍ଜ୍‌ପ୍‌ତିନ୍‌ ନୁ ନି ଦାସ ମୋଶାନ୍‌ କାଇଦେ ଅଡ଼୍‌କିଂଙ୍କ୍‌ ଆଦେଶ୍‌ ନୁ ରୀତି ନୁ ନିୟମ ଆଦେଶ୍‌ ମାଡ଼୍‌ତିନ୍‌; 15 ମେଣ୍ଡେ, ଅଡ଼୍‌ କାର୍‌ୱିକନ୍‌ ଗେଲ୍‌ସ୍ପାନଙ୍କ୍‌ ଅଡ଼୍‌କିଂଙ୍କ୍‌ ସ୍ୱର୍ଗକନ୍‌ କାଦି ଇତ୍‌ତି ନୁ ଅଡ଼୍‌କିଂଙ୍କ୍‌ ଏର୍‌ ଉନ୍ଦେୱାତାଙ୍କ୍‌ ଅଡ଼କ୍‌ ଇଦାନଙ୍କ୍‌ କାଲ୍‌ଦେକଞ୍ଜ୍‌ ଏର୍‌ ପେସ୍ପିତିନ୍‌, ମେଣ୍ଡେ ନିମେ ଅଡ଼୍‌କିଂଙ୍କ୍‌ ବେନ୍‌ଦେଶ୍‌ ଇଦାନ୍‌ ମାଇଦିଙ୍କ୍‌ କାଇ ତେସ ମାତ୍‌ତିନ୍‌, ଆ ଦେଶ ଅଦିକାର୍‌ଦେ ଆଗାକନ୍‌ ନେଙ୍ଗାନଙ୍କ୍‌ ଆଦେଶ୍‌ ମାଡ଼୍‌ତିନ୍‌। 16 ମାତର୍‌ ଅଡ଼୍‌ ନୁ ମା ଆନିଦାଦିଡ଼୍‌ ଗର୍ବ ମାଡ଼୍‌ତଡ଼୍‌ ନୁ ନିଜର ନିଜେତିଙ୍କ୍‌ ଡ଼ୁଟାଙ୍କ୍‌ ମାଡ଼୍‌ତଡ଼୍‌ ନୁ ମିଇ ଆଦେଶ୍‌ତେ କେଞ୍ଜଡ଼୍‌ ଆତ୍‌ତଡ଼୍‌, 17 ମେଣ୍ଡେ ଅଡ଼୍‌ ପାଲେମ୍‌ ମାଡ଼ାଙ୍କ୍‌ କେଞ୍ଜଡ଼୍‌ ଆତ୍‌ତଡ଼୍‌, ବା ମିଡ଼୍‌ ଅଡ଼ାଗ୍‌କଞ୍ଜ୍‌ ବେନ୍‌ ଆଶ୍ଚର୍ଯ୍ୟ ପାଡ଼୍‌ୟି ମାଡ଼ିମାତ୍‌ତିଡ଼୍‌, ଆଦ୍‌ ଏତ୍‌ମାଡ଼ି ଲେକ୍‌ୱି ଆତ୍‌ତିଡ଼୍‌; ମାତର୍‌ ନିଜର ନିଜର ମନ୍‌ଦିଙ୍କ୍‌ ଡ଼ୁଟାଙ୍କ୍‌ ମାଡ଼୍‌ତଡ଼୍‌ ନୁ ଦାସତାଗାଙ୍କ୍‌ ମାଲ୍‌ସ୍ ଆଦାନ୍‌ ମାଇଦିଙ୍କ୍‌ ଗଲକିନ୍‌ ଲେକେ ଅର୍ତୁଙ୍କ୍‌ ବାଡ଼୍‌ୟି ମାଡ଼ି ଏଞ୍ଚ୍‌ତଡ଼୍‌; ଆଗେକ୍‌ବା ମିଡ଼୍‌ କ୍ଷମା ମାଡ଼ାଙ୍କ୍‌ ଚେଷ୍ଟା, ଦୟା ନୁ ସ୍ନେହତଡ଼୍‌, କପାତେ ଜେୟି ନୁ ଦୟାତେ ନିଣ୍ଡି ପରମେଶ୍ୱର, ଆଦିଙ୍କ୍‌ ଅଡ଼୍‌କିଂଙ୍କ୍‌ ୱିଡ଼୍‌ସ୍‌ୱିନ୍‌ ଆତ୍‌ତି। 18 ହିଁ, ଇଦ୍‌ବେଲାନେ ଅଡ଼୍‌ ସାମ୍‌ଡ଼େତାଗ୍‌ ଡ଼ାଲେ ଅଣ୍ଡୟ୍‌ ଗଦପିଲେ ତିଆର୍‌ ମାଡ଼ି କେତ୍‌ତଡ଼୍‌, "ବେନ୍‌ ଦେୟାମ୍‌ ମିକିଙ୍କ୍‌ ମିସର ଦେଶକନ୍‌ ପେସ୍ପିତାତ୍‌ତଡ଼୍‌, ଅଣ୍ଡ୍‌ ଇଣ୍ଡ୍‌," ଇଲା କେସ୍‌ ପ୍ରବୁଙ୍କ୍‌ ବାଡ଼ିୟେ ଅପମାନ୍ ମାଡ଼୍‌ତଡ଼୍‌; 19 ଆସୱେଲେ ମିଡ଼୍‌ ନିଜର ନାର୍ଗେ ଦୟାତେ ଅଡ଼୍‌କିଂଙ୍କ୍‌ ଆଞ୍ଚିନାଗ୍‌ ୱିଡ଼୍‌ସିୱିଡ଼୍‌ ଆତ୍‌ତିଡ଼୍‌; ଆର୍‌ ଲାଗାନ୍‌ ମାଇଦିଙ୍କ୍‌ ପାୟାଲ୍‌ତେ ମୟଲଗୁଞ୍ଜେ, ବା ଅଡ଼୍‌କିଂଙ୍କ୍‌ ୱେସ୍‌ ନୁ ଆଦାନ୍‌ ଆର୍‌ ତତାନ୍‌ ମାଇଦିଙ୍କ୍‌ ନାର୍କାତେ କିସ୍‌ଗୁଞ୍ଜେ ଅଡ଼୍‌ ମୁନେ ଆନ୍‌ ଆତ୍‌ତେ। 20 ମେଣ୍ଡେ, ମିଡ଼୍‌ ଅଡ଼୍‌କିଂଙ୍କ୍‌ ଶିକ୍ଷା ଇଦାନ୍‌ ମାଇଦିଙ୍କ୍‌ ନିଜରତେ ମଙ୍ଗଲମୟ ଆତ୍ମା ଇତ୍‌ତିନ୍‌ ନୁ ଅଡ଼୍‌ ମକତାଗ୍‌ ନିଜରତିଙ୍କ୍‌ ମାନ୍ନା ଅଟ୍‌କାମାଡ଼ ଆତ୍‌ତେ ନୁ ଅଡ଼୍‌ ଏର୍‌ ଉନ୍ଦେୱାତ୍‌ତାଙ୍କ୍‌ ଅଡ଼୍‌କିଂଙ୍କ୍‌ ଏର୍‌ ଇତ୍‌ତିନ୍‌। 21 ମିଡ଼୍‌ ଚାଳିଶ ବର୍ଷ ଏୱୁନା ଆଞ୍ଚିନାଗ୍‌ ଅଡ଼୍‌କିଂଙ୍କ୍‌ ପଡ଼୍‌ପ୍‌ତିନ୍‌, ଅଡ଼୍‌କିଂଙ୍କ୍‌ ବାତେବା ଅବାବ୍‌ ଆୟ; ଅଡ଼୍‌ ସିଲେ ଆରିୟ ଆତ୍‌ତେ ନୁ ଅଡ଼୍‌ ପାଦାମ୍‌ ତୟ ଆତ୍‌ତେ। 22 ମେଣ୍ଡେ, ମିଡ଼୍‌ ଅଡ଼୍‌କିଂଙ୍କ୍‌ ୱେରେ ରାଜ୍ୟ ନୁ ଗୋଷ୍ଟୀ ଇତ୍‌ତିନ୍‌ ନୁ ଆଦ୍‌ ଅଡ଼୍‌ ବାଗ୍‌ ଅନୁସାର୍‌ତେ ତିଆର୍‌ ମାଡ଼୍‌ତି; ଆସୁଙ୍କ୍‌ ଅଡ଼୍‌ ସୀହୋନ ଦେଶ, ବା, ହିଷ୍‌ବୋନ ରାଜାନ୍‌ ଦେଶ ନୁ ବାଶନତେ ଓଗ ରାଜାନ୍‌ ଦେଶ ଅଦିକାର ମାଡ଼୍‌ତଡ଼୍‌। 23 ମେଣ୍ଡେ, ମିଡ଼୍‌ ଅଡ଼୍‌କିଂଙ୍କ୍‌ ମାର୍‌କିଡ଼୍‌କ୍‌ ମାବ୍‌ତେ ଉକାକ୍‌ ଇନା ନାର୍ଗେସଂକ୍ୟା ମାଡ଼୍‌ତିନ୍‌ ନୁ ବେନ୍‌ଦେଶ୍‌ ଅଡ଼୍‌ ଅଦିକାର ମାଡ଼ାନଙ୍କ୍‌ ଆଦ୍‌ତିଡ଼୍‌ ଇଞ୍ଜ ମିଡ଼୍‌ ଅଡ଼କ୍‌ ବାବାଲଡ଼୍‌କିଙ୍କ୍‌ କେତ୍‌ତିଡ଼୍‌, ଆ ଦେଶତିଙ୍କ୍‌ ଅଡ଼୍‌କିଂଙ୍କ୍‌ ତାତ୍‌ତିନ୍‌। 24 ଇଲାନେ ଆ ମାର୍‌କିଡ଼୍‌ ଦେଶତେ ନେଙ୍ଗି ଅଦିକାର ମାଡ଼୍‌ତଡ଼୍‌, ମେଣ୍ଡେ ମିଡ଼୍‌ ଅଡ଼୍‌ ମୁନେ ଆ ଦେଶତେନଡ଼୍‌ କିଣାନୀୟଡ଼୍‌କିଙ୍କ୍‌ ଆରାମାଡ଼୍‌ତିଡ଼୍‌ ନୁ ଅଡ଼୍‌ ବେଲାନେ ଇଚ୍ଛାତେ ବେବାର ମାଡ଼ିତଡ଼୍‌, ଇଦିନ୍‌ମାଇଦିଙ୍କ୍‌ ଅଡ଼୍‌କିଂଙ୍କ୍‌ ଅଡ଼୍‌ ରାଜାଲଡ଼୍‌କ୍‌ ନୁ ଦେଶତେ ୱେରେ ଗୋଷ୍ଟିତିଙ୍କ୍‌ ଅଡ଼୍‌ କାଇଦାଗ୍‌ ପସ୍ପିତ୍‌ତଡ଼୍‌। 25 ଆସୁଙ୍କ୍‌ ଅଡ଼୍‌ ନେଟାନେ ଗାରେତ୍‌ ନଗରସାରେ ନୁ କାତାମ୍‌ ବୁମଦେ ନେଲ୍‌ ଅତ୍‌ତଡ଼୍‌, ସାରେଲେକାତ୍‌ ସାୟେତ୍‌ ସାମାନ୍‌ ନିଣ୍ଡି ମାନ୍ଦାନ୍‌ ଲନ୍‌, ଡ଼େୱୁତେ ନୁୟି, ଅଙ୍ଗୁର୍‌ୱାୟେତାଗ୍‌ ନୁ ଜୀତ ମାଡ଼େତ୍‌ ୱାୟେତାଗ୍‌ ନୁ ନାର୍ଗେ କାୟାମାଡ଼ାକ୍‌ ଅଦିକାର ମାଡ଼୍‌ତଡ଼୍‌; ଆସୁଙ୍କ୍‌ ଅଡ଼୍‌ ତିଞ୍ଜ୍‌ ପାଞ୍ଜି ମେନ୍ଦୁଲ୍‌ଆତ୍‌ତଡ଼୍‌ ନୁ ମିଇ ତାମ୍‌ ଜିଉତାଗ୍‌ ୱେଡ଼୍‌କେ ମାଡ଼୍‌ତଡ଼୍‌। 26 ଆଗେକ୍‌ବା ଅଡ଼୍‌ ଆଦେଶ୍‌ମାନେମ୍‌ ଆୟଡ଼୍‌ ଆତ୍‌ତଡ଼୍‌ ନୁ ମିଇ ବିରୁଦ୍ଦତେ ରାମ୍‌କ୍‌ ମାଡ଼୍‌ତଡ଼୍‌ ନୁ ମିଇ ନିୟମ ନିଜର ପେର୍‌କେ ୱାଟ୍‌ତଡ଼୍‌, ମେଣ୍ଡେ ମିଇ ବେନ୍‌ ବବିଷ୍ୟଦ୍‌ବକ୍ତାଲଡ଼୍‌ ଅଡ଼୍‌କିଂଙ୍କ୍‌ ମିଇ ପର ମେଣ୍ଡନ୍‌ଦାମ୍‌ ମାଲପାନ୍‌ ମାଇଦିଙ୍କ୍‌ ଅଡ଼୍‌କିଂଙ୍କ୍‌ ଚେତ୍‌ତେ ଇତ୍‌ତଡ଼୍‌, ଆଦିଙ୍କ୍‌ ଅଡ଼୍‌କିଂଙ୍କ୍‌ ଆୱୁକ୍‌ତଡ଼୍‌ ନୁ ସିଗ୍‌ଲେକାତ୍‌ ପାଡ଼୍‌ୟି ମାଡ଼୍‌ତଡ଼୍‌। 27 ଇଦିନ୍‌ମାଇଦିଙ୍କ୍‌ ମିଡ଼୍‌ ଅଡ଼୍‌ ପାକେତ୍‌ ନାରୁଡ଼୍‌ କାଇଦେ ସର୍ପାମାଡ଼୍‌ୱାନାକେ, ଅଡ଼୍‌ ଅଡ଼୍‌କିଂଙ୍କ୍‌ କଷ୍ଟ ଇତ୍‌ତଡ଼୍‌; ମାତର୍‌ କଷ୍ଟ ସମୟତେ ଅଡ଼୍‌ ମିଇ ଗାରେ କେୟୱାନାକେ, ମିଡ଼୍‌ ସ୍ୱର୍ଗକନ୍‌ ଆଦ୍‌ କେଞ୍ଜ୍‌ତିଡ଼୍‌; ମେଣ୍ଡେ, ନିଜରତେ ନାର୍ଗେ ରୀତି ଦୟାତେ ଅଡ଼୍‌କିଂଙ୍କ୍‌ ଅଡ଼୍‌ ପାକେତ୍‌ ନାରୁଡ଼୍‌ କାଇଦେ ଅଡ଼୍‌କିଂଙ୍କ୍‌ ଉଦ୍ଦାର୍‌ ମାଡ଼୍‌ତଡ଼୍‌। 28 ମାତର୍‌ ଅଡ଼୍‌ ରମ୍‌ତଡ଼୍‌ ମେଣ୍ଡନ୍‌ଦାମ୍‌ ମିଇ କଣ୍ଢେତେ କାରାପ୍‌ ପାଡ଼୍‌ୟି ମାଡ଼୍‌ତଡ଼୍‌; ଇଦିଙ୍କ୍‌ ମାଇଦିଙ୍କ୍‌ ନିମେ ଅଡ଼୍‌କିଂଙ୍କ୍‌ ଶତ୍ରୁଡ଼୍‌ କାଇଦାଗ୍‌ ପସ୍ପ୍‌ତଡ଼୍‌, ଅଡ଼୍‌ ଅଡ଼୍‌କିଂଙ୍କ୍‌ ପର ଶାସନ ମାଡ଼୍‌ତଡ଼୍‌, ଆଗେକ୍‌ବା ବେସୱେଲେ ଅଡ଼୍‌ ମାଲ୍‌ସ୍ ମିଇଗାରେ କେୟିତଡ଼୍‌, ଆସୁଙ୍କ୍‌ ମିଡ଼୍‌ ସ୍ୱର୍ଗକନ୍‌ ଆଦ୍‌ କେଞ୍ଜି; ମେଣ୍ଡେ, ବେସ୍କ୍‌ ଦାମ୍‌ ମିଡ଼୍‌ ନିଜର ଦୟା ଲେକାମ୍‌ ଅଡ଼୍‌କିଂଙ୍କ୍‌ ଉଦ୍ଧାର୍‌ ମାଡ଼୍‌ତିନ୍‌। 29 ମେଣ୍ଡେ, ଅଡ଼୍‌କିଂଙ୍କ୍‌ ମେଣ୍ଡନ୍‌ଦାମ ନିଜର ନିୟମରୁପ ତାତାନ୍‌ ମାଇଦିଙ୍କ୍‌ ଅଡ଼୍‌କିଂଙ୍କ୍‌ କବର୍‌ ଇତ୍‌ତିନ୍‌; ଆଗେକ୍‌ବା ଅଡ଼୍‌ ଗର୍ବମାଡ଼୍‌ତଡ଼୍‌ ନୁ ମିଇ ଆଦେଶ୍‌ତିଙ୍କ୍‌ କେଞ୍ଜଡ଼୍‌ ଆତ୍‌ତଡ଼୍‌, ମାତର୍‌ ବାତେ ପାଲନ ମାଡ଼୍‌କେ ନାରୁଣ୍ଡ୍‌ ଗେଲ୍ସିତଣ୍ଡ, ମିଇ ଆ ଶାସନ ବିରୁଦ୍ଦତେ ପାପ ମାଡ଼୍‌ତିଡ଼୍‌ ନୁ କେଞ୍ଜାନଙ୍କ୍‌ ଇଚ୍ଛା ମାଡ଼ଡ଼୍‌ ଆତ୍‌ତଡ଼୍‌। 30 ଆଗେକ୍‌ବା ନାର୍ଗେ ବର୍ଷ ଏୱୁନା ମିଡ଼୍‌ ଅଡ଼୍‌ ଗଟି ସହ୍ୟ ମାଡ଼୍‌ତିଡ଼୍‌ ନୁ ନିଜର ଆତ୍ମାତେ ନିଜର ବବିଷ୍ୟଦ୍‌ବକ୍ତାଲଡ଼୍‌ ଇସ୍‌ ଅଡ଼୍‌କିଂଙ୍କ୍‌ କବର୍‌ ଇତ୍‌ତିନ୍‌; ମାତର୍‌ ଅଡ଼୍‌ କେଞ୍ଜାନଙ୍କ୍‌ ଇଚ୍ଛା ମାଡ଼ଡ଼୍‌ ଆତ୍‌ତଡ଼୍‌; ଇଦିନ୍‌ମାଦିଙ୍କ୍‌ ମିଡ଼୍‌ ଅଡ଼୍‌କିଂଙ୍କ୍‌ ୱେର୍‌ଦେଶତେ ଗୋଷ୍ଟିୟଡ଼୍‌ କାଇଦେ ପସ୍ପିତ୍‌ତିଡ଼୍‌। 31 ଆଗେକ୍‌ବା ମିଡ଼୍‌ ନିଜର ନାର୍ଗେ ନିୟମ୍‌ତେ ଅଡ଼୍‌କିଂଙ୍କ୍‌ ନଷ୍ଟ ମାଡ଼୍‌ୱିଡ଼୍‌; ବା ଅଡ଼୍‌କିଂଙ୍କ୍‌ ୱିଡ଼୍‌ସ୍‌ୱିଡ଼୍‌; ବାତେଙ୍କ୍‌ ଇତ୍କେ ମିଡ଼୍‌ ଦୟା ନୁ ଅଦିକ୍‌ ନାର୍ଗେଦୟାତନି ପରମେଶ୍ୱର୍‌। 32 ଇଦିନ୍‌ ହେ ମା ପରମେଶ୍ୱର, ବାଡ଼ିୟେ, ପରାକ୍ରାନ୍ତ ନୁ ବୟଙ୍କାର୍‌ ପରମେଶ୍ୱର୍‌, ମିଡ଼୍‌ ନିୟମ ନୁ ଦୟା ପାଲନ୍‌ ମାଡ଼ ମାନ୍‌ତିନ୍‌, ଅଶୂରିୟ ରାଜାଲଡ଼୍‌ ସମୟକନ୍‌ ନେଣ୍ଡ୍‌ ଆୟିନା ମା ପର, ମା ରାଜାଲଡ଼୍‌ ପର, ମା ଅଦିପତିଡ଼୍‌ ପର ନୁ ମା ଯାଜକନଡ଼୍‌ ପର ନୁ ମାନ୍‌ ବବିଷ୍ୟଦ୍‌ବକ୍ତାଲଡ଼୍‌ ପର ନୁ ମା ଆନିଦାଦିଡ଼୍‌ ପର ନୁ ମିଇ ସାରେ ନାରୁଡ଼୍‌ ପର ବେନ୍‌ ବେନ୍‌ କଷ୍ଟ ଗଟେମ୍‌ ଆସ୍‌ମିନ୍ଦେ, ଆୱୁସାରେ ମିଇ କଣ୍ଢେତେ ସୁଦୁର୍‌ ତନ୍ଦମାକି। 33 ଆଗେକ୍‌ବା ମା ପର ବାତେ ବାତେ ଗଟେମ୍‌ ଆସ୍‌ ମିନ୍ଦେ, ଆସାରେତ୍‌ ମିଡ଼୍‌ ଦର୍ମମୟ; ବାତେଙ୍କଇତ୍କେ ମିଡ଼୍‌ ନିଜାମ୍‌ତେ ବ୍ୟବହାର ମାଡ଼ିମିନ୍ଦେଡ଼ି, ମାତର୍‌ ମାମ୍‌ ଦୁଷ୍କର୍ମ ମାଡ଼ିମିନ୍ଦେମ୍‌। 34 ମେଣ୍ଡେ, ମା ରାଜାଲଡ଼୍‌, ମା ଅଦିପତିଡ଼୍‌, ମା ଯାଜକିଡ଼୍‌ ବା ମା ବାବାଲଡ଼୍‌ ମିଇ ନିୟମ ପାଲନ ମାଡ଼ଡ଼୍‌, ବା ମିଡ଼୍‌ ନିଜର ବେନ୍‌ ଆଦେଶ୍‌ ନୁ ସାକ୍ଷ୍ୟତଡ଼୍‌ ଅଡ଼୍‌କିଂଙ୍କ୍‌ ଏର୍କେ ନେଃତାନଙ୍କ୍‌ ଇତ୍‌ତି, ଆଗେକ୍‌ବା ଅଡ଼୍‌ କେଞ୍ଜଡ଼୍‌। 35 ଆଦିଙ୍କ୍‌ ଅଡ଼୍‌ ମିଇ ରାଜ୍ୟତେ, ଅଡ଼୍‌ମୁନେ ମିଇକିଙ୍କ୍‌ କାଇଦାଗ୍‌ ଇତ୍‌ତେ ବେଡ଼ିୟାଦ୍‌ କାଲ୍‌ ନୁ ବେଡ଼ିୟେ ଦେଶ୍‌ତଡ଼୍‌ ମି ସେବା ମାଡ଼ଡ଼୍‌, ବା ନିଜର ନିଜର କାରାପ୍‌ କାମ୍‌କଞ୍ଜ୍‌ ମାଲ୍‌ୱଡ଼୍‌। 36 ଉଡ଼େ, ନେଣ୍ଡ୍‌ ମାମ୍‌ ଦାସ ଆସ୍‌ ମିନ୍ଦେମ୍‌ ମେଣ୍ଡେ ମିଡ଼୍‌ ମା ଆନିଦାଦିଡ଼୍‌କିଙ୍କ୍‌ ବେନ୍‌ ଦେଶତେ କାୟା ନୁ ସାହେ କାୟେ ତିନ୍ଦାନଙ୍କ୍‌ ଇସ୍‌ ମାତ୍‌ତିଡ଼୍‌, ଉଡ଼େ, ଆ ଦେଶତେ ମାମ୍‌ ଦାସଆସ୍ ମିନ୍ଦେମ୍‌। 37 ମେଣ୍ଡେ, ମାମ୍‌ ପାପ୍‌ତେ ମାଇଦିଙ୍କ୍‌ ମିଡ଼୍‌ ବେନ୍‌ ରାଜାଲଡ଼୍‌ ମା ପର ତିଆର ମାଡ଼ି ମିନ୍ଦେଡ଼ି, ଅଡ଼୍‌ ଆ ଦେଶତେ ନାର୍ଗେ କାୟା ପାଣ୍ଡ୍‌ସ୍ପି ମିନ୍ଦେଡ଼ି; ବା ମା ମେନ୍ଦୁଲ୍‌ ପର ନୁ ମା ପଶୁକିନ୍‌ ପର ନିଜେତ୍‌ ଇଚ୍ଛାତେ ମିନ୍ଦେମ୍‌, ମେଣ୍ଡେ ମାମ୍‌ ବାଡ଼ିୟେ କଷ୍ଟତେ ମିନ୍ଦେମ୍‌; 38 ଇସାରେ ଗଟେମ୍‌ ଆତ୍‌କେ ମାମ୍‌ ଅଣ୍ଡୟ ଲେକେତ୍‌ ନିୟମ ମାଡ଼ି ଆଦ୍‌ ମେଃକିମିନ୍ଦେମ୍‌; ମେଣ୍ଡେ, ମା ଅଦିପତିଡ଼୍‌, ମା ଲେବିୟଡ଼୍‌ ନୁ ମା ଯାଜକିଡ଼୍‌ ଆଦ୍‌ ଚିହ୍ନେ ମାଡ଼ମିନ୍ଦେଡ଼୍‌।