1 Nie Paulo, kama viyalondile Mulungu niwe mtumigwa wa Kilisito Yesu

Kama viyalonda Mulungu, nowandikila mweye wanhu wa uko Efeso, imukala kwa kutogoligwa kwa kuilumba na Kilisito Yesu.

2 Mkale na ganogile ga Mulungu na utindiwala ulawa kwa Tata yetu Mulungu na kwa Mndewa Yesu Kilisito.

3 Yatogoligwe Mulungu na Tata wa Mndewa wetu Yesu Kilisito! Kwavija, kwa kuilumba na Kilisito kaching'ha ganogile kwa kuchigolela nhuza zose za muhe wa kuulanga kwa Mulungu. 4 Kulawa isi hainalumbigwa, Mulungu kachibagula chiwe wake kwa kuilumba na Kilisito ili chiwe chinang'hanigwa bila kua na nhale haulongozi wake, kwambuli ya wende wake. 5 Hata isi ikala ing'hali kulumbigwa, Mulungu kachisagula chiwe wake kwanzila ya kuilumba na Yesu Kilisito. Ivo viyalondile na kunuila. 6 Ivo, nachimtogole Mulungu kwambuli ya ganogile gake na ukulu uyaching'ile kwa Mwanage yeli na wende nayo! 7 Kwavija kwa damu yake Kilisito cheye chikomboligwa, kwavija malozo getu golekeseligwa. Uvo uli ukulu wa unovu wa Mulungu, 8 gayachimemezele bila chipimo!

Kwa nzewele na umanyi wake wose 9 Mulungu kasang'hana chija chiyanuile, kachilongela mbuli yake ifisike, ija iyanuile kuisang'hana kwanzila ya Kilisito. 10 Ili gadahe kuvikila mchipindi chija hasa chilondeka, yani kuvigela vinhu vose va kuulanga kwa Mulungu na va muiisi, vihekigwa hamwe muulongozi wa mlongozi imwe, iyo Kilisito.

11 Vinhu vose vosang'hanika kuilinga na viyalonda Mulungu, na Mulungu kachisagula cheye chiwe wanhu wake kwakuilumba na Kilisito kwambuli ya dija diyalonda, kwandusa haumosi. 12 Baho, cheye chilongole kumtumanila Kilisito cholondeka kuwing'ha nhogolwa ukulu wa Mulungu!

13 Na mweye ivija wanhu wa isi zimwenga muhulika mbuli ya kweli yani Usenga Unogile uwagalileni ulohozi, mumtogola Kilisito, nayo Mulungu, ili kulagusa kua mweye mwa wanhu wake, kawagela ndonya kwa kumwing'heni ija Muhe wa Mulungu ija yachilalike. 14 Muhe ino iyo lehani ya kubokela gaja gose Mulungu gayawalalike wanhu wake, na mbuli ino yochigangamizila kua Mulungu kowagombola kabisa waja wose weli wake. Nachiwing'he nhogolwa ukulu wa Mulungu!

15 Kwambuli iyo, kulawa vimuhulike kwambuli ya nhogola yenu kwa Mndewa Yesu, na wende wenu kwa wanhu wose wa Mulungu, 16 sinaleka kumwing'ha hewela Mulungu kwambuli yenu. Siwasemwa chila nihapula kwa Mulungu 17 ili Mulungu wa Mndewa wetu Yesu Kilisito, Tata yeli na ukulu, yamwing'heni Muhe wake yeze kumwing'heni nzewele na kumfunhulileni mdahe kummanya Mulungu. 18 Nompula Mulungu yamfunhuleni mmoyo mdahe kuona bung'hulo jake, ili mdahe kudimanya dija tamanilo diyawakemeleni na ukulu wa ganogile gake gayawalalike wanhu wake, 19 ili mvimanye vija udaho wake vuuli mkulu ng'hani kwambuli ya cheye chimtogola. Udaho uo usang'hana sang'hano mgati yetu uilinga na udaho uja ulimkulu ng'hani, 20 uja yautumile haja hayamzilibule Kilisito, kamwika yakale ubanzi uja wa nhogolwa wa kuulanga kwa Mulungu. 21 Uko, Kilisito kolongoza chila aina ya ulongozi, ukulu wa kubita mazina gose gotambuligwa, sio muiisi tu, mbali hata isi ija ikwiza. 22 Mulungu kavika vinhu vose mmagulu gake Kilisito, na kamlava kwa wanhu waja womtogola Kilisito, yawe ditwi da vinhu vose kwambuli ya bumbila da wamtogola Kilisito. 23 Bumbila da wamtogola Kilisito ni lukuli lwa Kilisito, na ukomelezo wake iyo yonda yakomeleze vinhu vose chila hanhu.