1 Mweye wana, wategelezeni tata na mami zenu Kikilisito kwavija ino ni mbuli inogile. Kwavija ikutenda ivo kokutenda kutogoligwa na Mulungu. 2 Mndewa kolonga, "Wategeleze tata na mami yako" ino iyo ndagizi ya mosi ija yongezigwe laliko, ili 3 "Wing'higwe ganogile ga Mulungu ukale milao mingi hano muiisi."

4 Namweye watata, seke muwatendele gehile wanenu mbali waleleni kwa nzewele na mafundo ga Kikilisito.

5 Mweye watumwa, wategelezeni wakulu wenu hano muiisi kwa kuwategeleza kwa kudumba, sang'haneni ivo kwa moyo umwe kama momsang'hanila Kilisito. 6 Sang'haneni ivo sio haja tu mwahawalola ili mwing'higwe nhogolwa na wao, mbali sang'hanikeni kwa moyo umwe kama viyalonda Mulungu kwavija mweye mwa watumwa wa Kilisito.

7 Msang'hanike kwa moyo wose kwa wakulu wenu kama vumsang'hana kwambuli ya Mndewa na sio kwambuli ya wanhu. 8 Mhamanya kua chila munhu yosang'hana ganogile, yeli mtumwa hebu heli mtumwa, kobokela nhunza yake kulawa kwa Mndewa.

9 Namweye wakulu, wasang'hanileni ivija watumwa wenu, lekeni kuwatenda wadumbe. Mvimanye kua mweye ivija kama wao, mnayo Mndewa iija kuulanga kwa Mulungu, nayo hasang'hana kwa kubagula.

10 Nokomeleza kwa kulonga vino, mgangamale kwa Mndewa na kwa kutazigwa na udaho wake mkulu. 11 Valeni migoha mwing'higwe na Mulungu mpate kuzihuma mbuli zihile za Mwenembago. 12 Ng'ondo yenu sio bung'hukila yetu na wanhu, ila ni bung'hukila na jeshi da ubananzi da isi ija haioneka kwa meso. Choitoa na walongozi wakulu na weli na ludabwa na wolongoza isi ija haioneka kwa meso. 13 Kwambuli iyo, soleni migoha ya Mulungu ili zua ijo dihavika mdahe kuihuma bung'hukila ya wahasanyi, na mwahaitoa mbaka hachikomelezo, mokua mng'hali mgangamale. 14 Ivo, itandeni goya. Muifunge mkwiji mvigudi venu, kutogola kwenu kuwe kama ngwamo ya kuikimila mzi mhambaga zenu, 15 kuitanda goya kupwilisa Usenga Unogile wa utindiwala ukale kama vilatu mmagulu genu. 16 Kulu kubita zose kumtogola Mulungu kwenu kuwe kama ngwamo mmakono genu, kuwadahize kuikimila misale ya moto ya ija Mwenembago.

17 Ubokeleni ulohozi kama kofia jenu da zuma, na usenga wa Mulungu kama panga dimwing'higwe na Muhe wa Mulungu. 18 Mfugamileni Mulungu mazua gose, kuno mopula utazi wa Mulungu. Chila mala mfugamileni kwa udaho wa Muhe wa Mulungu. Kaleni meso mpula bila kulegela mhafugama kwambuli ya wanhu wose wa Mulungu. 19 Mnipulile na nie ili nihenula mlomo kulonga Mulungu yaning'he chakulonga, niwalongele wanhu mbuli zija Mulungu hanawalongela wanhu za Usenga Unogile kwa kweli yeka. 20 Nie na msenga kwambuli ya Usenga Unogile ivo hata yahawa sambi na mchifungo. Ivo puleni, ili nigangamale kwa kupwililisa Usenga Unogile vija viilondeka.

21 Tikiko, walukolo wetu wa wende na mtumigwa wa kutogoligwa kwa kuilumba na Mndewa, komwing'hani usenga wangu wose mvimanye chinisang'hana. 22 Nomlagiza kumwenu yamwing'heni mbuli zetu na amgeleni moyo.

23 Walukolo wangu, nompula Mulungu Tata na Mndewa Yesu Kilisito yaweng'he utindiwala na wende na kutogola kulawa kwa Mulungu kukale na mweye mose. 24 Nompula Mulungu yaweng'he unovu kulawa kumwake uja haumala ukale na mweye mose mli na wende uja haumala wa Mndewa wetu Yesu Kilisito.