1 Baho, nie nili mfungigwa kwavija nomsang'hanila Mndewa, nompulani mkale goya, kwa kukala kama vija viilonda sang'hano imkemeligwe na Mulungu. 2 Mkale mazua gose kwa kutegeleza na kwa uhole na wenye kufunya moyo, muifunyile moyo mweye kwa mweye kwa wende.

3 Muiyohe ng'hani kwika ukalahamwe ugaligwa na Muhe wa Mulungu kwa kuwinza utindiwala uli hagati yenu. 4 Hana lukuli lumwe na Muhe imwe, kama vija tamanilo dimkemeligwe na Mulungu ni dimwe. 5 Hana Mndewa imwe, kutogola kumwe na kubatizigwa kumwe, 6 hana Mulungu imwe na Tata wa wose, yolongoza vinhu vose, kosang'hana sang'hano kwa vose na kauko kwa wanhu wose. 7 Chila munhu mmwetu kabokela unovu wa Mulungu kuilinga na vija Kilisito viyalondile kumwing'ha. 8 Iyo mana Mayandiko golonga,

"Viyasoligwe uchanha ng'hani kuulanga,

kawagela wanhu mmakono,

na kaweng'ha wanhu nhunza."

9 Ivo, viyalongile, Kasoligwa uchanha," yolagusa choni? Yolagusa kua, mosi kahulumuka mbaka hasi kabisa muiisi. 10 Baho, iyo yahulumuke hano muiisi iyo yasoligwe uchanha kuulanga kose ili yawe chila hanhu. 11 Iyo yaweng'ile wanhu nhunza, wamwenga kawetenda wawe wasenga wa Mulungu, wamwenga walagusi wa Mulungu, wamwenga wawe wapwililisaji Usenga Unogile, wamwenga wasusilaji na wafundaji. 12 Kasang'hana ivo ili yawatande wanhu wose wa Mulungu kwambuli ya sang'hano ya kumsang'hanila Kilisito wagangamale kama viili lukuli lwa Kilisito. 13 Ivo chose chivikile kuilumba na chiwe wanhu wamwe kwa kumtogola Mulungu na kummanya Mwana wa Mulungu, chiwe wanhu wakangale kama Kilisito mwenyego. 14 Baho, hachiwa kama wana kaidi, chasigwe na kuhembelusigwa na ufundaji wa chila namna. 15 Kama chahawa chowinza ukweli kwa moyo wa wende chokua mchila mbuli kuilinga na Kilisito, iyo ditwi da chila yomtogola. 16 Muulongozi wake, vilungo vose va lukuli voilumba mui nyuge imwe, na lukuli lose lotumanila kutazigwa na vilungo vake. Baho, chila chilungo chihasang'hana sang'hano yake viilondeka, lukuli lose lokula na kuizenga wenyego muuwende.

17 Baho, kwa udaho zina da Mndewa, nomzumani, sekemkale kaidi kama wanhu hawammanyile Mulungu, waja kutonga kwao wotonga gehile 18 na umanyi wao mdiziza. Wanhu wao wakutali na ugima wa Mulungu kwambuli ya ubozi uli mgati yao na udulu wao. 19 Wabanangika na wabule chinyala, wengila muubavi mkulu, wohondomoka kusang'hana mbuli za chinyala.

20 Mbali mweye hamfundigwe ivo kwambuli ya Kilisito. 21 Ni ukweli kua muhulika mnzila mbuli zake, na mwahawa wajalusona wake mfundigwe ukweli vuuli kwambuli ya Yesu. 22 Baho, mfundigwa mleke ubananzi umkalile mosang'hana baho mwaka, kwavija uja unhu wenu wa umwaka ukalile wobanangigwa na maya zake za uvwizi. 23 Sambi muike goya mmoyo na mzi nhonga zenu, 24 baho muwe na ugima wa sambi, kama vija Mulungu kawalumba muilinge nayo, mkale kwa kutogolingwa kabisa na Mulungu bila kulongigwa na munhu. 25 Kwaivo, lekeni uvwizi. Chila munhu kolondeka kumlongela miage ukweli, kwavija chila imwe mmwenu ni chilungo cha lukuli lwa Kilisito. 26 Kama muhawa na ludoko, sekemtogole ludoko lwenu lumtendani mloze, hebu seke mkale na ludoko zua jose. 27 Sekemmwing'he Mwenembago nyafasi ya kukuhuma kwa ludoko lwenu. 28 Mbavi, sekeyebe kaidi, mbali yasonge kusang'hana sang'hano inogile kwa makono gake, yawe na chinhu cha kumtaza munhu yeli chikumbi muyega. 29 Mbuli zihile sekezihulikike mmwenu kabisa, chila mala mbuli zenu ziwe zinogile na zija za kugela moyo na kutaza wamwenga, ili gawanogeze waja wowategeleza. 30 Sekemmwing'he giogio Muhe wa Mulungu, kwavija Muhe iyo ni chija Mulungu chiyalongile kokwinza kuweng'ha wanhu wake, na wolagusa kua zua dokwiza baho Mulungu honda yawakomboleni. 31 Ivo, lekeni uhasanyi na fundogolo na ludoko na nyangi na maligo. Lekeni ubananzi wa chila namna! 32 Muwe na moyo unogile na uli na kuionela bazi, chila munhu na agele kumgongo ga miage kama nayo Mulungu viyagele kumgongo malozo genu kwa nzila ya Kilisito.